Yesaia 6 - ŊMALƐ KRƆŊKRƆŊ LƐ

Nyɔŋmɔ tsɛ Yesaia koni ebafee Gbalɔ

¹ Afi nɔ ni Maŋtsɛ Uzia gbo lɛ, mina Nuŋtsɔ lɛ ni eta maŋtsɛ sɛi ni kwɔ gojoo ko nɔ. Atade yuu ni ewo lɛ eyi Sɔlemɔ we lɛ obɔ̃.

² Serafim damɔ maŋtsɛ lɛ he kɛbɔle. Amɛteŋ mɔ fɛɛ mɔ yɛ fiji ekpaaekpaa. Ekɛ enyɔ haa ehiɛ, ni ekɛ enyɔ haa enaji ahe, ni ekɛ enyɔ hu filikiɔ.

³ Mɔnɛ boɔ ekɛɔ mɔnɛ akɛ, “Krɔŋkrɔŋ, krɔŋkrɔŋ, krɔŋkrɔŋ ji Yehowa, Taiatsɛ lɛ! Shikpɔŋ muu lɛ fɛɛ eyi obɔ kɛ enunyam lɛ.”

⁴ Serafim lɛ abolɔmɔ lɛ ha Sɔlemɔ we lɛ shinai lɛ ashishi hoso, ni Sɔlemɔ we lɛ yi tɔ kɛ lasu.

⁵ Kɛkɛ ni mikɛɛ akɛ, “Kpoo hã mi, shi milaaje! Ejaakɛ gbɔmɔ ni naabu he tseee ji mi; ni miyɛ maŋ ni emli bii awiemɔi ahe tseee ateŋ, ejaakɛ mihiŋmɛii ena maŋtsɛ ni ji Yehowa, Taiatsɛ lɛ!”

⁶ Kɛkɛ ni serafim lɛ ateŋ mɔ kome filiki kɛba miŋɔɔ. Ehiɛ ŋai ni miitso ni ekɛ abɛɛle yakɔ yɛ afɔleshãa latɛ lɛ nɔ.

⁷ Ekɛ ŋai ni tsoɔ lɛ sa minaabu he, ni ekɛɛ akɛ, “Naa, akɛni enɛ esa onaabu he nɛɛ lɛ, ajie onɔsha lɛ, ni akɛ ohe esha efa bo.”

⁸ Kɛkɛ ni minu Nuŋtsɔ lɛ gbee ni miikɛɛ akɛ, “Namɔ matsu, ni namɔ aaatee ahã wɔ?” Mikɛɛ akɛ, “Naa mi! Tsu mi!”

⁹ Ni Nuŋtsɔ lɛ kɛɛ mi akɛ, “Yaa koni oyakɛɛ maŋbii nɛɛ akɛ, ‘Nyɛkɛ nyɛtoi aaanu nɛ, shi nyɛnuŋ shishi, ni nyɛkɛ nyɛhiŋmɛii aaana nɛ, shi nyɛnaŋ shishi.’ ”

¹⁰ Kɛkɛ ni ekɛɛ mi akɛ, “Hã nɛkɛ maŋbii nɛɛ akpliŋ amɛtsui, ni ohã amɛtoi awa; asaŋ shwilamɔ amɛhiŋmɛii koni amɛkana nii; amɛkanu nii, asaŋ amɛkanu sane shishi ni amɛmiikpale ni amɛna tsamɔ.”

¹¹ Kɛkɛ ni mikɛɛ akɛ, “Ao, Nuŋtsɔ, kɛyaashi mɛɛ beyinɔ?” Eto he akɛ, “Kɛyaashi beyinɔ ni maji lɛ aaatsɔ̃mɔ amaŋfɔ̃i ni adesa ko bɛ amɛmli, ni shĩai lɛ aaajwere shi efoji ni gbɔmɛi bɛ mli, ni shikpɔŋ lɛ aaatsɔ̃ amaŋfɔ̃ kwraa.

¹² Yehowa aaakpala maŋbii lɛ kɛaatee shɔŋŋ, ni hei pii aaakamɔ shi efoji yɛ shikpɔŋ lɛ nɔ.

¹³ Ni kɛji eshwɛ maŋbii lɛ amlijaa nyɔŋma mli ekome tete yɛ shikpɔŋ lɛ nɔ lɛ, aaaku sɛɛ akpãtã amɛhiɛ. Shi amɛaatsɔ tamɔ tso kpele ni atoo agbee shi ni eshwɛ ekuku yɛ su mli. Tso kuku nɛɛ lɛ dumɔ wu krɔŋkrɔŋ ni.”