Yesaia 59 - ŊMALƐ KRƆŊKRƆŊ LƐ

Akã maŋbii ahiɛ yɛ amɛhe eshai ahewɔ

¹ Naa, Yehowa nine efoko kuku bɔ ni no hewɔ lɛ, enyɛɛɛ yiwala ehere; asaŋ etoii hu tsimɔko bɔ ni enuuu nii.

² Shi moŋ nyɛnishaianii lɛ ji nii ni egbala nyɛ kɛ Nyɔŋmɔ teŋ lɛ. Nyɛhe eshai lɛ ji nii ni etsĩ nyɛhiɛ, hewɔ ni ebooo nyɛ toi lɛ.

³ Ejaakɛ nyɛkɛ lá ebule nyɛniji, ni nyɛkɛ nishaianii ebule nyɛwaobii; nyɛnaabu wieɔ amale wiemɔi, kutumpɔo wiemɔi ji nɔ ni kã nyɛlilɛi nɔ.

⁴ Mɛi ni asane ejaaa lɛ moŋ ji mɛi ni samaa mɛi, ni mɔ ni sane bɛŋ moŋ ni kɛ sane yaa kojomɔ sɛi hiɛ; ejaakɛ amɛkɛ amɛhiɛ fɔ̃ɔ amale naajiemɔi anɔ, ni amɛtoɔ abla; amɛtoɔ yiŋ sha, ni no kɛ nɔshafeemɔ baa.

⁵ Yiŋ shai ni amɛtoɔ lɛ yeɔ awui tamɔ shinɔ ni naa joɔ wɔji. Kɛji wɔji lɛ eko fɛ lɛ, onufu ji nɔ ni jɛɔ mli baa. Mɔ fɛɛ mɔ ni yeɔ wɔlɔ lɛ eko lɛ gbo egboɔ. Amɛnifeemɔ tamɔ anaanu ntaŋ;

⁶ ni ntaŋi lɛ nyɛɛɛ atsɔ̃ mama ni aaanyɛ aha. Nishaianii pɛ amɛfeɔ, ni niseniianii pɛ amɛkɛ amɛniji tsuɔ.

⁷ Amɛhe yɛ oya kɛ efɔŋfeemɔ, ni amɛyeɔ oyai kɛshwieɔ mɔ ni fɔbuu ko bɛ ehe lɛ lá shi. Nɔ he pɛ ni amɛjwɛŋɔ ji nɔsha, ni nifitemɔ kɛ niihiɛkpãtãmɔ anaa yɛ he ni amɛyɔɔ.

⁸ Toiŋjɔlɛ ni ji toiŋjɔlɛ lɛ amɛleee eko, ni jalɛ saneyeli bɛ he ni amɛyɔɔ. Amɛkɔ̃dɔkɔdɔ̃ɔ amɛgbɛi, ni mɔ ni tsɔ̃ɔ nakai gbɛi lɛ anɔ lɛ he ejɔɔɔ lɛ kɔkɔɔkɔ.

Maŋbii lɛ jaje amɛhe esha

⁹ Maŋbii lɛ kɛɛ akɛ, “No hewɔ ni jalɛ saneyeli kɛ wɔteŋ jɛkɛ lɛ, ni yiwalaheremɔ bɛŋkɛɛɛ wɔ lɛ. Wɔkwɛɔ gbɛ akɛ la akpɛ aha wɔ, shi moŋ duŋ mli wɔnyiɛɔ.

¹⁰ Wɔtatraa yɛ gbogbo he tamɔ shwilafoi, ni wɔgbugbuɔ shi tamɔ mɛi ni bɛ hiŋmɛii; wɔtɛrɛɔ shwane fintiŋŋ tamɔ nɔ ni hiɛ ebu, ni wɔnyiɛɔ hiɛkãalɔi ateŋ tamɔ mɛi ni egboi.

¹¹ Wɔ fɛɛ wɔhuuɔ tamɔ oshishibrishii, wɔyeɔ ŋkɔmɔ tamɔ okpoi; wɔkwɛɔ jalɛ saneyeli gbɛ, shi ekoeko ejeee gbɛ; wɔshweɔ yiwalaheremɔ, shi ekɛ wɔteŋ jɛkɛ.

¹² “Nuŋtsɔ, wɔtɔ̃mɔi lɛ fa tsɔ yɛ ohiɛ, ni wɔhe eshai lɛ yeɔ odase shiɔ wɔ, ejaakɛ wɔtɔ̃mɔi lɛ jwere wɔhiɛ, ni wɔnishaianii lɛ hu wɔle fɛɛ.

¹³ Wɔtɔ̃, ni wɔkwa Yehowa, ni wɔkpale yɛ wɔNyɔŋmɔ lɛ sɛɛ. Yiwalɛ kɛ atuatsemɔ wiemɔi wɔwieɔ; amale wiemɔi ni wɔtoɔ yɛ wɔtsuiiaŋ lɛ jeɔ kpo yɛ wɔnaa.

¹⁴ Jalɛ saneyeli ekpale kɛtee sɛɛ, ni jalɛ eyadamɔ sɛɛ flɛŋŋ, ejaakɛ anɔkwale etã yɛ blohuŋ, ni anɔkwale bɛ nɔ ko mli.

¹⁵ Anɔkwale elaaje, ni mɔ ni wiɔ ehe kɛjɛɔ efɔŋ he lɛ ayɔseɔ moŋ akɛ lɛ moŋ etɔ̃.” Yehowa na, ni edɔ lɛ akɛ ayeee jalɛ sane.

Yehowa saa Emaŋbii aheremɔ eto

¹⁶ Ena, ni enaa kpɛ ehe akɛ mɔ ko kwraa bɛ ni edamɔ mli eha mɔ ni ayeɔ lɛ amim; ni no hewɔ lɛ, ekɛ lɛ diɛŋtsɛ ehewalɛ here eyiwala, ni ejalɛ lɛ ye bua lɛ.

¹⁷ Jalɛ aaatsɔ dama ni eeewo, ni yiwalaheremɔ aaatsɔ dade fai ni eeebu, ni oweletɔɔ aaatsɔ bo ni eeeha, ni hiɛdɔɔ ni naa wa ekɛaafee emama.

¹⁸ Bɔ ni amɛfee lɛ, nakai nɔŋŋ ebaafee amɛ eto najiaŋ. Emli aaawo la awo mɛi ni kɛ lɛ ena lɛ, ni eeewo henyɛlɔi lɛ anyɔmɔ pɛpɛɛpɛ kɛyanina ŋshɔnaa maji lɛ tɔ̃ɔ.

¹⁹ No hewɔ lɛ, amɛaashe Yehowa gbɛi lɛ gbeyei yɛ anaigbɛ; aaashe ehewalɛ lɛ gbeyei yɛ hulushiteehe, ejaakɛ ebaaba tamɔ faa ni etue ni Yehowa mumɔ lɛ etsi eyisɛɛ.

²⁰ Yehowa kɛɛ emaŋbii lɛ akɛ, “Mibaba Zion taakɛ kpɔ̃lɔ, akɛ kpɔ̃lɔ ha Yakob shwiei ni ekpale kɛje nifɔɔjianiifeemɔ mli lɛ.

²¹ Ni naa, mi lɛ kpãŋmɔ ni mi kɛ nyɛ kpãŋɔ nɛ: Mimumɔ lɛ ni yɔɔ omli lɛ, kɛ miwiemɔi ni mikɛwo onaa lɛ, ha akã bo kɛ oshwiei ashwiei fɛɛ anaa kɛjɛ be nɛɛ mli kɛyashi naanɔi anaanɔ.”