Yesaia 58 - ŊMALƐ KRƆŊKRƆŊ LƐ

Anɔkwa ŋmaahilɛ

¹ Yehowa kɛɛ akɛ, “Bolɔmɔ waa! Kaaha onaa miiba shi. Wo ogbee nɔ tamɔ tɛtɛrɛmantɛrɛ. Jajemɔ mimaŋbii lɛ ahe eshai lɛ otsɔɔ amɛ; tsɔɔmɔ Israel we lɛ amɛhe eshai lɛ.

² Tsɛbelɛ gbi fɛɛ gbi lɛ amɛtaoɔ misɛɛgbɛ, ni amɛshweɔ akɛ amɛle migbɛi lɛ tamɔ maŋ ni yeɔ jalɛ sane, ni amɛkwako amɛNyɔŋmɔ lɛ mlai lɛ. Amɛtaoɔ akɛ mabu amɛ bem akɛ jalɔi, ni amɛsumɔɔ akɛ amɛtsi amɛbɛŋkɛ Nyɔŋmɔ.”

³ Amɛkɛɔ akɛ, “Mɛɛba wɔhiɔ ŋmaa, ni bo, Yehowa, onaaa lɛ? Mɛɛba wɔhumiɔ shi, ni onaaa lɛ?” Shi Yehowa kɛɛ, “Naa, nyɛŋmãahilɛ gbi lɛ nɔ lɛ, nyɛ diɛŋtsɛ nyɛnɔ mli nyɛfoɔ, ni nyɛwaa nyɛnitsulɔi fɛɛ ayi.

⁴ Naa, nyɛŋmãahilɛ be mli lɛ, nɔ ni eshwɛ nyɛ kɛkɛ ji bei kɛ nɔmɔ, ni nyɛmamɔɔ nyɛhe atswɛrɛi kɛ yiwalɛ. Nɛkɛ ŋmãa ni nyɛhiɔ ŋmɛnɛŋmɛnɛ nɛɛ lɛ haŋ anu nyɛgbee yɛ ŋwɛi.

⁵ Ani nɛkɛ ŋmaahilɛ mito lɛ? Enɛ ji ŋmaahilɛ ni gbɔmɔ kɛhumiɔ shi lɛ? Ani no ji yishimaa kɛ kpekpebumɔ kɛ lamlumlikamɔ lo? Enɛ nyɛtsɛɔ lɛ ŋmaahilɛ gbi ni sa Yehowa hiɛ lɛ?

⁶ “Ani jeee enɛ moŋ ji ŋmaahilɛ ni mito lɛ: akɛ akpa toikɔdɔmɔ saneyeli koni akplɔ toikɔdɔmɔ saneyeli kɔŋtso lɛ he ŋmei lɛ koni aha mɛi ni awaa amɛ yi lɛ aye amɛhe koni akumɔ apã fɛɛ apã?

⁷ Ani jeee no ji akɛ okɛ oboloo akuma mɔ ni hɔmɔ yeɔ lɛ, ni oŋɔ ohiafoi ni bɛ shihilɛhe lɛ kɛba owe lɛ, ni kɛji ona mɔ ko ni nyiɛ yayai lɛ ohã lɛ mama, ni okɛ ohe akatee bo diɛŋtsɛ ohe gbɔmɔ.

⁸ “No lɛ ojalɛ aaakpɛ tamɔ leebi hulu, ni otsamɔ hu aaafee oya, ni ojalɛ lɛ aaanyiɛ ohiɛ, ni Yehowa anunyam lɛ aaanyiɛ osɛɛ.

⁹ Kɛkɛ lɛ ooobo otsɛ, ni Yehowa aaahere bo nɔ; ooobo otsɛ yelikɛbuamɔ, ni eeekɛɛ akɛ ‘Naa mi!’ “Kɛji nyɛkpa mɛi gboklɛwoo yɛ nyɛteŋ, ni nyɛkpa wao kɛmɔtsɔɔmɔ kɛ mɔ he efɔŋ wiemɔ,

¹⁰ kɛji oha mɔ ni hɔmɔ yeɔ lɛ niyenii, ni oha mɔ ni ehĩa lɛ lɛ nɔ ni etaoɔ lɛ, no dani ola lɛ aaakpɛ yɛ duŋ lɛ mli, ni oduŋ kpii lɛ aaatsɔ̃ tamɔ shwane.

¹¹ Ni Yehowa aaakpala bo daa, ni eeeha bo ohiamɔnii yɛ fimɔ be mli, ni eeeha bo hewalɛ, ni oootsɔ̃ tamɔ trom ni nu hoɔ yɛ mli, loo tamɔ nuhiŋmɛi ni nu kpaaa yɛ mli.

¹² Omɛi lɛ aaasaa oblema tsui koi lɛ atswa; amɛaatswa tsui lɛ amɛmamɔ blema shishitoo srɔtoi lɛ anɔ. Aaatsɛ nyɛ mɛi ni saa gbogboi lɛ amɛtswa kɛ mɛi ni saa gbɛjegbɛi lɛ koni mɛi anyɛ nɔ ahi.”

Hejɔɔmɔ gbi lɛ he sɛɛnamɔ

¹³ Yehowa kɛɛ, “Kɛji oto hejɔɔmɔ gbi lɛ akɛ gbi krɔŋkrɔŋ, ni ofɔ̃ɔ bo diɛŋtsɛ onɔ mlifomɔ yɛ migbi krɔŋkrɔŋ lɛ nɔ lɛ, kɛji obu Yehowa gbi krɔŋkrɔŋ lɛ, ni ohiɛ sɔ Yehowa gbi krɔŋkrɔŋ lɛ, kɛji owo gbi lɛ, ni ofeee bo diɛŋtsɛ otsuinaa nii, ni ofooo bo diɛŋtsɛ onɔ mli, ni otsuuu bo diɛŋtsɛ onii lɛ, loo otiuuu otsuinaanii sɛɛ, aloo owieee yaka wiemɔi yɛ nɔ lɛ,

¹⁴ no lɛ maha oye shikpɔŋ lɛ nɔ hei grɔŋŋi fɛɛ anɔ, ni omii aaashɛ Yehowa he, ni oooye otsɛ Yakob gboshinii lɛ!” Yehowa kɛ enaabu ekɛɛ.