Yesaia 57 - ŊMALƐ KRƆŊKRƆŊ LƐ

Akã Israel hiɛ yɛ emagãjãmɔ hewɔ

¹ Jalɔ hiɛ kpãtãa, ni mɔ ko mɔ ko kɛ esane lɛ wooo etsuiŋ. Aŋɔɔ gbɔmɛi kpakpai kɛjeɔ jeŋ kɛyaa ni mɔ ko mɔ ko nuuu shishi. Ejaakɛ aŋɔɔ gbɔmɔ kpakpa lɛ kɛyaa kɛjeɔ haomɔ mli, ni eboteɔ hejɔlɛ mli.

² Mɛi ni ba amɛjeŋ yɛ jalɛ naa lɛ, amɛyɛ toiŋjɔlɛ mli yɛ gbohiiaje.

³ Shi nyɛ lɛ, nyɛtsia nyɛbaa biɛ, nyɛ klamɔfoi abii kɛ gbalafitelɔi abii kɛ ajwamãŋi abii.

⁴ Namɛi ahe fɛo nyɛyeɔ lɛ. Namɛi nyɛgbɛɔ nyɛdaaŋ hatoo nyɛwoɔ, ni nyɛliɔ lɛ? Ani jeee toigbolɔi kɛ amalelɔi ashwiei ji nyɛ lo?

⁵ Nyɛkɛ heloo akɔnɔ fɔŋ feɔ yakayakanii yɛ tso fɛɛ tso ni ebu kusuu shishi. Nyɛgbeɔ nyɛmusuŋbii nyɛkɛshãa afɔle yɛ jɔi amli kɛ tɛsaa fɔji amli.

⁶ Nyɛkɔlɔɔ fai anaa fɔbitɛi, ni nyɛ diɛŋtsɛ nyɛjaa amɛ akɛ wɔŋ. Nyɛfɔseɔ dãa nyɛshwieɔ shi nyɛhaa amɛ akɛ afɔle, ni nyɛshãa niyenii afɔle nyɛkɛhaa amɛ. Aso mitsui aaanyɔ mimli yɛ enɛɛmɛi ahewɔ?

⁷ Nyɛyaa gɔji ni kwɔlɔ somromoo lɛ anɔ nyɛyashãa afɔle, ni nyɛkɛ nyɛhe wɔɔ yɛ jɛi.

⁸ Nyɛkɛ nyɛmãgãi ni anyaŋeɔ lɛ mamɔɔ nyɛshinai ashi. Nyɛkwaa mi, nyɛjieɔ nyɛyayai amli, ni nyɛkɛ nyɛsuɔlɔi kwɔɔ kɛyaa nyɛsaatsei ni lɛɛlɛɛ anɔ; nyɛwoɔ amɛ nyɔmɔ koni amɛkɛ nyɛ awɔ; jɛi nyɛgbeɔ nyɛkɔnɔ yɛ.

⁹ Nyɛwoɔ ojeŋmai, ni nyɛkpaa muŋma kɛyaa, ni nyɛyajaa wɔŋ Molek. Otsuɔ obɔfoi kɛyaa shɔŋŋ, kɛyaa gbohiiaje tete.

¹⁰ Ogba ohe naa kɛtao wɔji krokomɛi, shi okɛɛɛ ohe akɛ, “Sɛɛnamɔ ko bɛ he. Ona hewalɛ hee, no hewɔ lɛ, ogbɔjɔɔɔ.

¹¹ “Namɔ gbeyei oshe, ni otsui fã, hewɔ ni omale, ni okaiii mi, ni oyasusuuu mihe lɛ? Aso diŋŋ ni mifee ni miŋamɔ mihiŋmɛii nɛɛ lɛ hewɔ ni osheee mi gbeyei lɛ?

¹² Mibajaje ojalɛ ni osusuɔ akɛ oja lɛ kɛ onifeemɔnii hu fɛɛ matsɔ̃ɔ, shi ooona akɛ onaŋ sɛɛ ko yɛ mli.

¹³ Kɛji obolɔ waa lɛ, ha owɔji lɛ ni obua naa lɛ ahere bo! Kɔɔyɔɔ aaaloo amɛ kɛaatee; gugɔ mli kɔɔyɔɔ tete aaaloo amɛ kɛaatee. Shi mɛi ni baa mi abo lɛ aaaŋɔ shikpɔŋ lɛ amɛye, ni migɔŋ krɔŋkrɔŋ, Zion, lɛ aaatsɔ̃ amɛnɔ.”

Nyɔŋmɔ baaye ebua

¹⁴ Yehowa kɛɛ akɛ, “Nyɛjea gbɛ lɛ, nyɛjea! Nyɛjajea gbɛ lɛ. Nyɛjiea pampi fɛɛ pampi yɛ mimaŋbii lɛ agbɛ lɛ nɔ.

¹⁵ “Ejaakɛ bɔ ni Mɔ Koome ni yɔɔ ŋwɛi flooflo, naanɔ Mɔ ni gbɛi ji Krɔŋkrɔŋ lɛ kɛɛ nɛ, ‘Ŋwɛi shɔŋŋ kɛ He krɔŋkrɔŋ lɛ mihiɔ; asaŋ mikɛ mɔ ni tswiaa shi kɛ dɔlɛ ni ebaa ehe shi yɛ mumɔ mli lɛ hiɔ shi,’ koni maha heshibalɔi amumɔ ana wala hee, ni mɛi ni tswiaa shi kɛ dɔlɛ lɛ atsuii ana wala hee.’

¹⁶ Ejaakɛ mibeŋ kɛyaŋ naanɔ, ni jeee daa mimli aaawo la, ejaakɛ mi midɛŋ mumɔ jɛɔ, ni mi mibɔ wala mumɔ.

¹⁷ Nɔ sha ni yɔɔ ehiɛkɔ̃ɔ lɛ mli hewɔ lɛ, mimli wo la; migwao lɛ, ni mikɛ mihiɛ tee lɛ, ni mimli fu; shi etee nɔ ekwa mi, ni eye etsui naa sane.

¹⁸ “Mina gbɛ fɔŋ ni enyiɛ lɛ, shi mibatsa lɛ. Mibakpala lɛ, ni mibashɛje lɛ kɛ mɛi ni ekɛyeɔ ŋkɔmɔ lɛ amii.

¹⁹ Hejɔlɛ, hejɔlɛ aha mɔ ni yɔɔ shɔŋŋ kɛ mɔ ni bɛŋkɛ fɛɛ. Mibatsa miwebii lɛ.

²⁰ Shi mɛi fɔ̃ji lɛ amɛtamɔ ŋshɔ ni efee hamahama, ejaakɛ enyɛɛɛ eŋmɛ dɛmm, ni ŋshɔkei lɛ loɔ muji kɛ ŋmɔtɔ ebubuaa shi.

²¹ Hejɔlɛ ko bɛ ha mɛi fɔ̃ji.” MiNyɔŋmɔ lɛ kɛɛ.