Yesaia 55 - ŊMALƐ KRƆŊKRƆŊ LƐ

Nyɔŋmɔ dɛŋ Mɔbɔnalɛ lɛ

¹ Yehowa kɛɛ, “Huui! Nyɛ mɛi fɛɛ ni kumai yeɔ nyɛ, nyɛbaa nu he! Nyɛ mɛi hu ni bɛ shika, nyɛbaa nyɛbahea ŋmãa nyɛyea! Nyɛbaa! Nyɛbahea wain kɛ fufɔ, jeee kɛ shika shi moŋ kɛ nyɛdɛ folo.

² Mɛɛba nyɛkɔɔ shika nyɛkɛheɔ nɔ ni jeee ŋmãa? Ni nyɛkɛ nyɛnitsumɔŋ nyɔmɔwoo heɔ nɔ ni hãaa mɔ atɔ? Nyɛboa mi toi jogbaŋŋ, ni nyɛfea nɔ ni makɛɛ nyɛ lɛ, ni nyɛaaye niyenii kpakpa fe fɛɛ, ni nyɛmii aaashɛ.

³ “Nyɛfea toi, ni nyɛbaa miŋɔɔ! Nyɛboa mi toi, ni nyɛyi aaana wala. Mi kɛ nyɛ baakpãŋ naanɔ kpãŋmɔ, ni ji mimɔbɔnalɛ ni sɛɛ efooo ni mikɛwo David shi lɛ.

⁴ Naa, mifee lɛ majimaji lɛ ahiɛnyiɛlɔ kɛ tatsɛ, koni etsɔ̃ mihe odaseyelɔ ehã majimaji lɛ.

⁵ Naa, ooofɔ̃ nine otsɛ maji ni oleee; ni maji ni leee bo hu aaahiɛ foi kɛaaba oŋɔɔ, yɛ Yehowa, oNyɔŋmɔ lɛ hewɔ, ejaakɛ ewo ohiɛ nyam!

⁶ Nyɛtaoa Yehowa be mli ni eeehã ana lɛ. Nyɛtsɛa lɛ be mli ni ebɛŋkɛ.

⁷ Ha mɔ fɔŋ lɛ akwa ejeŋba fɔŋ lɛ; ni nɔshafeelɔ atsake ejwɛŋmɔ. Ha eku esɛɛ kɛba Yehowa ŋɔɔ ni emusuŋ aaatsɔ lɛ yɛ ehewɔ. Ekpale kɛba wɔNyɔŋmɔ lɛ ŋɔɔ, ni ekɛaafa lɛ aahu.

⁸ Yehowa kɛɛ, “Ejaakɛ jeee mijwɛŋmɔi ji nyɛjwɛŋmɔi lɛ, ni jeee nyɛgbɛi lɛ ji migbɛi lɛ.

⁹ Ejaakɛ bɔ ni ŋwɛi kwɔ fe shikpɔŋ lɛ, nakai migbɛi lɛ kwɔ fe nyɛgbɛi lɛ, ni mijwɛŋmɔ kwɔ fe nyɛjwɛŋmɔi lɛ.

¹⁰ “Ejaakɛ bɔ ni nu kɛ snoo nɛɔ kɛjɛɔ ŋwɛi shwieɔ shi, ni ekuuu esɛɛ kɛyaaa ŋwɛi, akɛ ja eha shikpɔŋ lɛ nu, ni eha eba nii, ni ewo yibii, ni eha nidulɔ wui, ni ekɛ niyenii eha mɔ ni yeɔ lɛ.

¹¹ Nakai nɔŋŋ ni wiemɔ ni jɛɔ midaaŋ lɛ hu aaafee. Ekuŋ esɛɛ kɛbaŋ miŋɔɔ efolo, shi moŋ eeetsu nɔ ni mito mihã lɛ lɛ; ni eeeye kunim yɛ nɔ hewɔ ni mitsu lɛ lɛ mli.

¹² “Ejaakɛ nyɛbaashi Babilon kɛ nyamɔ, ni aaakpala nyɛ kɛshi yɛ toiŋjɔlɛ mli. Gɔji lɛ kɛ gɔŋkpɔi lɛ aaawo nyamɔ lala nɔ yɛ nyɛhiɛ, ni ŋa nɔ tsei lɛ fɛɛ aaatswa amɛdɛ̃ kɛ miishɛɛ.

¹³ Ŋmeitso najiaŋ lɛ, sɛsɛo aaakwɛ̃, ni aklati najiaŋ lɛ, shɔ̃ aaakwɛ̃. Enɛ baatsɔ Nuŋtsɔ lɛ kaimɔ nɔ, kaimɔ nɔ ni aaahi shi kɛaatee naanɔ tɔ̃ɔ.”