Yesaia 54 - ŊMALƐ KRƆŊKRƆŊ LƐ

Bɔ ni Yehowa sumɔɔ Israel ehãa

¹ “Yerusalɛm, yoo kene, wó nyamɔ lala nɔ! Bo ni okɔ̃mɔko dã, blɔmɔ kɛ miishɛɛ! Ejaakɛ mɔ ni ewu kwa lɛ lɛ, ebii ayi baafa fe mɔ ni yɔɔ wu lɛ bii.”

² Yehowa kɛɛ, “Lɛɛmɔ obuu lɛ mli, kpã oshihilɛhe lɛ mamai lɛ amli. Kaalɛte he; ha etaŋkpei lɛ akɛlɛ, ni okala oshiŋmlitsei lɛ ni awa.

³ Ejaakɛ ooolɛɛ shi kɛya ninejurɔgbɛ kɛ abɛkugbɛ fɛɛ; ni oshwiei aaaye majimaji anɔ, ni amɛaahe shi yɛ maji ni kamɔ shi amaŋfɔ̃i lɛ amli.

⁴ Kaashe gbeyei! Ejaakɛ ohiɛ eshwieŋ shi; ni ohe akajara bo, ejaakɛ agbeŋ ohiɛ dɔŋŋ. Ejaakɛ ohiɛ aaakpa oblayeiaŋ hiɛgbele lɛ nɔ, ni okulafeemɔ mli hejaramɔ lɛ okaiŋ dɔŋŋ.

⁵ Ejaakɛ obɔlɔ lɛ aaatsɔ̃ wu aha bo. Yehowa Taiatsɛ ji egbɛi, ni Israel Mɔ Krɔŋkrɔŋ Koome lɛ ji Okpɔ̃lɔ lɛ. Je lɛ fɛɛ Nyɔŋmɔ ji egbɛi.

⁶ Yehowa miitsɛ bo kɛba eŋɔɔ, ni ekɛɛ, “Israel, otamɔ yoo ni ewu ekwa lɛ, ni eeye ŋkɔmɔ yɛ mumɔ mli, tamɔ oblahiiaŋ ŋa ni ashwie lɛ.

⁷ Hiŋmɛitswaa kɛkɛ mikwa bo, shi mikɛ mlitsɔlɛ kpele baabua onaa.

⁸ Mikɛ mihiɛ tee bo hiŋmɛitswaa yɛ mlifu ni eteke nɔ naa; shi mikɛ naanɔ suɔmɔ aaahã mimusuŋ atsɔ̃ mi yɛ ohewɔ.” Bɔ ni Yehowa, bo-Kpɔ̃lɔ lɛ kɛɛ nɛ,

⁹ “Be nɛɛ tamɔ Noa be lɛ ha mi. Bɔ ni mikã kitã akɛ Noa be lɛ mli nu afua lɛ ebahaŋ shikpɔŋ lɛ nɔ dɔŋŋ lɛ, nakai mikãa kitã akɛ mimli fuŋ bo, ni mikaŋ ohiɛ.

¹⁰ Gɔji lɛ aaaje amɛshihilɛhei lɛ aya, ni gɔŋkpɔi lɛ hu aaafamɔ kɛaatee nɛ, shi suɔmɔ ni miyɔɔ ha bo lɛ tsakeŋ, ni mi kɛ bo teŋ toiŋjɔlɛ kpãŋmɔ lɛ hu mikuŋ mli.” Bɔ ni Yehowa mɔ ni musuŋ tsɔ̃ɔ lɛ yɛ ohe lɛ kɛɛ nɛ,

¹¹ “Ao Yerusalɛm ni apiŋ bo, maŋ ni ahum tswa bo, shi ashɛjeee omii, naa, mikɛ ojarawatɛi baatswa bo mama shi, ni mikɛ safiro tɛ baatswa oshishitoo lɛ.

¹² Mikɛ rubi tɛ baatswa omɔji lɛ, ni mikɛ ojarawa tɛ baafee ogboi lɛ, ni ohe gbogbo lɛ hu, mikɛ tɛi ni jara wa baatswa.

¹³ Yehowa diɛŋtsɛ ni baatsɔ̃ɔ omli bii lɛ nii, ni amɛbaashwere jogbaŋŋ.

¹⁴ Jalɛ shihilɛ aaahe shi yɛ omli. Yiwalɛ nifeemɔ kɛ bo teŋ baajekɛ, no hewɔ lɛ, osheŋ gbeyei; ni tsuifãa nifeemɔ bɛŋkɛŋ bo; no hewɔ lɛ otsui efaŋ.

¹⁵ Kɛji mɔ ko aaabatua bo lɛ, jeee mi ejɛ; mɔ fɛɛ mɔ ni aaate shi awo bo lɛ, lɛ moŋ ebaagbee shi.

¹⁶ “Naa, mi, mibɔ sɔ̃lɔ mɔ ni huɔ ŋai la ekɛsɔ̃ɔ tawuunii lɛ. Ni mi nɔŋŋ mibɔ tabilɔ mɔ ni kpãtãa nibii ahiɛ lɛ.

¹⁷ Shi tawuunii ko kwraa bɛ ni asɔ̃ ni aaanyɛ bo awui aye. Ooona hetoo oha wiemɔ fɛɛ wiemɔ ni aaawie ashi bo. Enɛ ji nɔ ni asaa ato. Yehowa tsuji agboshinii kɛ amɛjalɛ ni jɛ midɛŋ lɛ.” Yehowa kɛɛ.