Yesaia 53 - ŊMALƐ KRƆŊKRƆŊ LƐ

¹ Maŋbii lɛ to he akɛ, “Namɔ aaahe sane ni wɔnu lɛ eye? Ni namɔ Yehowa ejie ehewalɛ nine lɛ kpo etsɔɔ?

² Ejaakɛ ekwɛ̃ yɛ ehiɛ tamɔ tso fɔ, tamɔ tso shishi fã ni etsɛ̃ kɛjɛ shikpɔŋ gbiŋ mli. Ehe bɛ nyam lɛ, ebɛ su ko hu ni aaaha wɔkwɛ lɛ; ni ehe bɛ fɛo ko hu ni aaaha ehe afee wɔ akɔnɔ.

³ Agbe ehe guɔ, ni gbɔmɛi kwa lɛ, eye awerɛho, ni ele hejaramɔ etamɔ mɔ ni atsɔ̃ɔ hiɛ atoɔ afã kɛ ana lɛ lɛ. Agbe ehe guɔ, ni wɔbuuu lɛ wɔhãaa fɛifɛi.

⁴ “Anɔkwa, wɔhelai lɛ, lɛ etere, ni wɔhejaramɔi lɛ, lɛ ehole eshwie enɔ. Shi wɔ lɛ, wɔbu lɛ akɛ mɔ ko kɛkɛ ni Nyɔŋmɔ gbala etoi, ni ena nɔ.

⁵ Shi apila lɛ yɛ wɔ moŋ wɔtɔ̃mɔi ahewɔ; atswia lɛ nii yɛ wɔnishaianii lɛ ahewɔ. Agbala etoi koni wɔna hejɔlɛ, ni ehe faji lɛ akɛtsaa wɔ.

⁶ Wɔ fɛɛ tswɛm wɔtamɔ toi ni edu gbɛ. Wɔteŋ mɔ fɛɛ mɔ ekɔ lɛ diɛŋtsɛ egbɛ, ni Yehowa kɛ wɔ fɛɛ wɔnɔsha lɛ fɔ̃ enɔ.

⁷ Afee lɛ niseniianii, ni apiŋ lɛ, kɛ̃lɛ etswaaa esɛŋ. Bɔ ni too gwantɛŋbi ni akɛ lɛ yaa ayagbe lɛ, loo too gwantɛŋbi feɔ dioo yɛ ehetsɔikulɔi ahiɛ lɛ, nakai etswaaa esɛŋ lɛ.

⁸ Aye lɛ toikɔdɔmɔ sane, ni aŋɔ lɛ kɛtee. Namɔ aaanyɛ asusu nɔ ni aaaba enɔ? Ejaakɛ asha lɛ kɛje hiɛkãalɔi ashikpɔŋ lɛ nɔ kɛtee. Mimaŋbii lɛ atɔ̃mɔi ahewɔ apiŋ lɛ lɛ!

⁹ Atsa ebu yɛ eshafeelɔi ateŋ, tsɛbelɛ efeko esha ko lɛ, emaleko hu dã, ni afu lɛ yɛ niiatsɛmɛi ateŋ.

¹⁰ “Eji Yehowa yiŋtoo akɛ atswa lɛ nɔ, ni apila lɛ. Kɛji eŋɔ ehe eshã afɔle yɛ esha hewɔ lɛ, ebaana shwiei ni ewala sɛɛ aaatsɛ, ni kɛtsɔ̃ lɛ enɔ lɛ, nɔ ni sa Yehowa hiɛ lɛ aaashwere.

¹¹ Esusuma haomɔ lɛ hewɔ lɛ, eeena nii ni aaahã etsui anyɔ emli. Kɛtsɔ̃ mitsulɔ jalɔ lɛ nilee nɔ lɛ, eeehã aŋɔ mɛi babaoo akɛ jalɔi, ni eeetere amɛnishaianii lɛ.

¹² No hewɔ lɛ, maha lɛ egbɛfaŋnɔ yɛ mɛi wuji ateŋ; ni ekɛ hewalɔi aaaja haanii, ejaakɛ eŋɔ ehe eha gbele, ni abu lɛ ashi mlanɔtɔlɔi anɔ, kɛ̃lɛ etere mɛi pii ahe eshai, ni edamɔ mli eha eshafeelɔi.”