Yesaia 52 - ŊMALƐ KRƆŊKRƆŊ LƐ

Nyɔŋmɔ baahere Yerusalɛm

¹ Ao Yerusalɛm, ohiɛ atsɛ̃! Ohiɛ atsɛ̃! Teemɔ ohewalɛ lɛ shi! Ao Yerusalɛm, maŋ krɔŋkrɔŋ, wulamɔ kɛ otadei fɛɛfɛji lɛ, ejaakɛ foolɔi kɛ mɛi ni he tseee boteŋ ogboi lɛ mli dɔŋŋ!

² Ao Yerusalɛm ni aŋɔ bo nom, tee shi? Kpokpomɔ ohe mlu lɛ, Tee shi ota shi! Zion biyoo ni aŋɔ bo nom, fɛnemɔ kpãa ni yɔɔ okuɛ lɛ.

³ Ejaakɛ bɔ ni Yehowa kɛɛ nɛ, “Be ni ahɔɔ nyɛ lɛ aheee nyɛyi shika ko; ni jeee shika hu akɛbaakpɔ nyɛ. Shi bɔ ni Nuŋtsɔ Nyɔŋmɔ kɛɛ nɛ,

⁴ “Jeeŋmɔ ko lɛ, mimaŋ lɛ diɛŋtsɛ tee Ijipt ni eyahi jɛi akɛ gbɔi. Shi Asiriabii lɛ wa amɛyi yakatswaa.

⁵ No hewɔ lɛ, agbɛnɛ mɛni mafee yɛ he akɛni miina mimaŋ lɛ ni Babilonbii ŋɔ amɛ nom yakatswaa lɛ? Amɛnɔyelɔi lɛ shwãa kɛkɛ amɛshwãa, Yehowa kɛɛ, ni gbi muu fɛɛ lɛ amɛgbeɔ migbɛi lɛ he guɔ.

⁶ No hewɔ lɛ, mimaŋbii lɛ aaale migbɛi lɛ; ejaakɛ nakai gbi lɛ nɔ lɛ, amɛaale akɛ mi ji mɔ ni kɛɔ akɛ, ‘Naa, mi nɛ lɛ.’ ”

⁷ Kwɛ bɔ ni sanekpakpashiɛlɔ ni shiɛɔ hejɔlɛ, sanekpakpashiɛlɔ ni shiɛɔ yiwalaheremɔ lɛ naji yɔɔ fɛo yɛ gɔji lɛ anɔ, mɔ ni kɛɔ Zion akɛ, “Naa, oNyɔŋmɔ lɛ ni yeɔ maŋtsɛ agbɛnɛ.”

⁸ Bo toi! Omɛi ni buɔ maŋ lɛ he lɛ fɛɛ tswɛm ehole amɛgbei anɔ, ni amɛmiila kɛ miishɛɛ, ejaakɛ amɛmiina faŋŋ akɛ Yehowa eku esɛɛ kɛmiiba Zion!

⁹ Yerusalɛm tsui koikoi, nyɛ fɛɛ tswɛm nyɛwoa nyamɔ lala nɔ! Ejaakɛ Yehowa eshɛje emaŋ lɛ mii, ehere Yerusalɛm yiwala.

¹⁰ Yehowa ejie ehewalɛ krɔŋkrɔŋ lɛ kpo etsɔ̃ɔ majimaji lɛ fɛɛ, ni jeŋ muu lɛ fɛɛ aaana wɔNyɔŋmɔ lɛ dɛŋ yiwalaheremɔ lɛ.

¹¹ Nyɛ mɛi fɛɛ ni nyɛtereɔ Sɔlemɔ we lɛ nibii lɛ, nyɛkataa nɔ ko ni he tseee he; nyɛtsuua nyɛhe, ni nyɛshĩa, nyɛshĩa Babilon nyɛyaa.

¹² Shi moŋ nyɛshĩŋ nyɛyaŋ yɛ hejojomɔ naa; ni asaŋ jeee yɛ foijee naa hu; ejaakɛ Yehowa baanyiɛ nyɛhiɛ ni Israel Nyɔŋmɔ lɛ baanyiɛ nyɛsɛɛ.

Tsulɔ Nɔnalɔ lɛ

¹³ Bɔ ni Yehowa kɛɛ nɛ, “Naa, mitsulɔ lɛ baashwere, aaawo ehiɛ nyam, ni aaawo enɔ; aaawo enɔ gojoo.

¹⁴ Mɛi babaoo ahe aaajɔ̃ amɛhe yɛ ehewɔ; ejaakɛ ehiɛ efite bɔ ni ehiɛɛɛ gbɔmɔ hiɛ dɔŋŋ; egbɔmɔtso su tamɔɔɔ gbɔmɛi adesai anɔ dɔŋŋ.

¹⁵ Nakai nɔŋŋ eeehã maji babaoo anaa akpɛ amɛhe; Maŋtsɛmɛi aaamua amɛnaa yɛ ehewɔ, ejaakɛ amɛbaana nii ni agbako amɛ dã, ni amɛbaanu nɔ ni amɛnuko dã lɛ shishi.”