Yesaia 51 - ŊMALƐ KRƆŊKRƆŊ LƐ

Yerusalɛm miishɛjemɔ

¹ Yehowa kɛɛ, “Nyɛ mɛi ni nyɛtaoɔ ni akpɔ̃ nyɛ lɛ, nyɛboa mi toi! Nyɛ mɛi ni nyɛtaoɔ Nuŋtsɔ lɛ sɛɛgbɛ, nyɛjwɛŋa tɛsaa ni agba nyɛ kɛjɛ mli lɛ, kɛ tɛ bu ni atsa nyɛ kɛjɛ mli lɛ he.

² Nyɛkwɛa nyɛtsɛ Abraham kɛ Sara, mɛi amli ni nyɛjɛ lɛ. Be ni mitsɛ Abraham lɛ, ekome ni; shi mijɔɔ lɛ, ni mihã ewo shwiei babaoo.

³ Ejaakɛ Yehowa baashɛje Yerusalɛm mii; ebaashɛje hei fɛɛ ni efee koikoi lɛ amii; ebaahã eŋa lɛ nɔ atsɔ̃ tamɔ Eden; ni eshiaŋa lɛ baatsɔ tamɔ Yehowa diɛŋtsɛ abɔɔ. Jɛi baasɔ kɛ mliflimɔ kɛ nyamɔ kɛ shidaa lalai.

⁴ “Mimaŋbii, nyɛboa mi toi! Mimaŋ, nyɛfea toi nyɛhãa mi! Ejaakɛ mibawo mla, ni mijalɛ saneyeli aaatso la aha majimaji lɛ.

⁵ Midɛŋ yiwalaheremɔ be lɛ ebɛŋkɛ etã; miyiwalaheremɔ lɛ baaje kpo, ni mi diɛŋtsɛ maye majimaji lɛ anɔ. Ŋshɔnaa shikpɔji lɛ miikwɛ mi gbɛ, ni amɛhiɛ kã mihewalɛ lɛ nɔ.

⁶ Nyɛwoa nyɛhiɛ nɔ nyɛkwɛa ŋwɛi; ni nyɛkwɛa shikpɔŋ ni yɔɔ ŋwɛi shishi hu. Ejaakɛ ŋwɛi baalaaje tamɔ lasu, ni shikpɔŋ lɛ baasuu tamɔ atade ni enɔ gbɔmɛi aaagboi tamɔ adɔdɔji; shi miyiwalaheremɔ lɛ aaahi shi kɛaatee naanɔ, ni mikpɔmɔ lɛ bɛ naagbee.

⁷ “Nyɛ mɛi fɛɛ ni le nɔ ni ji jalɛ, nyɛboa toi, nyɛ maŋbii ni mimla lɛ yɔɔ nyɛtsuiiaŋ, nyɛkashea adesa dɛŋ ahorabɔɔ gbeyei! Asaŋ nyɛtsuii akafãa yɛ limɔ ni aaali nyɛ hewɔ.

⁸ Ejaakɛ amɛhiɛ aaakpãtã tamɔ mama ni omlɛgɛ eye, loo kuŋtu ni gɔgɔmii eye. Shi mikpɔmɔ lɛ aaahi shi kɛaatee naanɔ; ni miyiwalaheremɔ lɛ aaahi shi yinɔi fɛɛ.

⁹ Tee shi, tee shi koo! Yehowa, wo ohewalɛ nine lɛ nɔ. Tee shi tamɔ ofee blema ko lɛ, tamɔ yɛ jeeŋmɔ yinɔi komɛi anɔ lɛ. Aso jeee bo ofolɔ ŋshɔŋ kooloo Rahab lɛ mli dukuduku lɛ? Aso jeee bo ofolɔ kooloo drako gbeyeigbeyei lɛ mli lɛ?

¹⁰ Aso jeee bo oha ŋshɔ mii lɛ? Ani jeee bo oha bu kwɔŋkwɔŋ lɛ mli nu mii, ni ogba gbɛ yɛ ŋshɔ lɛ mli oha mɛi ni okpɔ̃ amɛ lɛ, ni amɛfo mli kɛho lɛ?

¹¹ No hewɔ lɛ, mɛi ni Yehowa ekpɔ̃ amɛ lɛ aaaku amɛsɛɛ, ni amɛaaba Zion kɛ lala. Amɛaanya, ni amɛmii aaashɛ; amɛyeŋ awerɛho lɛ, amɛdɔmɔŋ ŋtsɔi dɔŋŋ.”

¹² Yehowa miikɛɛ akɛ, “Mi mishɛjeɔ nyɛmii! Mɛɛba osheɔ adesa ni baagbo, adesa ni etamɔ jwɛi gbeyei,

¹³ ni ohiɛ ekpa Yehowa, obɔlɔ lɛ, moŋ nɔ? Ohiɛ ekpa mɔ ni lɛɛ ŋwɛi mli eha shi, ni eto je lɛ shishi lɛ nɔ? Mɛɛba osheɔ gbeyei jenamɔ tuu yɛ haolɔ lɛ grimɔ kɛ ehe ni esaa kɛkpãtã ohiɛ lɛ hewɔ? Ni nɛgbɛ haolɔ lɛ grimɔ lɛ yɔɔ po?

¹⁴ Etsɛŋ kwraa ni aaaŋmɛɛɛ gboklɛfoi lɛ ahe; amɛgboiŋ, ni amɛwala sɛɛ baatsɛ, ni nɔ ni amɛaaye ebɔŋ amɛ.

¹⁵ Ejaakɛ mi ji Yehowa, oNyɔŋmɔ lɛ, mɔ ni teɔ ŋshɔ shi, ni emli ŋshɔkei feɔ hamahama lɛ. Migbɛi ji Yehowa, Taiatsɛ.

¹⁶ Mi milɛɛ ŋwɛi mli miha shi, ni mito je lɛ shishi. Mikɛɛ Yerusalɛm akɛ, ‘Miwebii ji nyɛ! Mikɛ miwiemɔi lɛ ewo nyɛnaa, ni mikɛ minine miibu nyɛhe.’ ”

Yerusalɛm nɔnaa naagbee

¹⁷ Ao Yerusalɛm, wo ohe nɔ! Wo ohe nɔ! Tee shi odamɔ shi! Onu toigbalamɔ kpulu lɛ mli dãa ni jɛ Yehowa diɛŋtsɛ dɛŋ lɛ. Ni onu owo omli, ni olɛmɔ kpulu lɛ mli, ni eha oodidãa.

¹⁸ Mɔ ko mɔ ko bɛ ebii ni efɔ lɛ ateŋ ni aaatsɔ̃ɔ lɛ gbɛ; mɔ kome folo nɛkɛ bɛ bii ni elɛ lɛ ateŋ ni aaamɔ enine mli.

¹⁹ Saji enyɔ nɛɛ eba onɔ: ta ekpãtã oshikpɔŋ lɛ hiɛ, ni hɔmɔ hu eye omaŋbii. Namɔ aaashɛje omii?

²⁰ Obii lɛ etɔ biti; amɛkamɔkamɔɔ shi yɛ blohui lɛ fɛɛ akoji tamɔ baayelɔ ni adu lɛ yɛ tsɔne mli. Amɛyimɔ obɔ̃bɔ̃ kɛ Yehowa mlila kɛ oNyɔŋmɔ lɛ kãmɔ lɛ.

²¹ No hewɔ lɛ, nyɛ Yerusalɛm nɔnalɔi ni nyɛdidãa tsɛbelɛ nyɛtɔrɔko dãa, nyɛboa toi,

²² Bɔ ni Nuŋtsɔ Yehowa, oNyɔŋmɔ, mɔ ni yeɔ emaŋ lɛ sane ehaa lɛ lɛ kɛɛ nɛ, “Naa, mihe didãamɔ dãa kpulu lɛ yɛ nyɛdɛŋ; nyɛnuŋ mimlifu naa kpulu lɛ mli dãa lɛ dɔŋŋ.

²³ Maŋɔ maha nyɛhaolɔi lɛ, mɛi ni kɛɔ nyɛ akɛ, ‘Nyɛkamɔa shi koni wɔnyiɛa nyɛnɔ kɛhoa.’ Ni nyɛtsɔ tamɔ gbɛjegbɛ koni wɔnyiɛ nyɛnɔ lɛ.”