Yesaia 50 - ŊMALƐ KRƆŊKRƆŊ LƐ

¹ Bɔ ni Yehowa kɛɛ nɛ, “Nɛgbɛ nyɛnyɛ shwiemɔ wolo ni mikɛshwie lɛ lɛ yɔɔ? Minyɔjiatsɛmɛi lɛ ateŋ namɔ mihɔɔ nyɛ miha? Dabida! Nyɛnishaianii lɛ ahewɔ ni ahɔɔ nyɛ, ni nyɛtɔ̃mɔi lɛ ahewɔ ashwie nyɛnyɛ.

² “Mɛɛba miba, ni mɔ ko mɔ ko bɛ? Mɛɛba mibo mitsɛ, ni mɔ ko mɔ ko hereee mi nɔ lɛ? Ani minine efo kuku bɔ ni minyɛɛɛ mɔ yiwala mahere? Aloo mibɛ hewalɛ ni mikɛaakpɔ̃ mɔ? Naa, mifãa, ni ŋshɔ miiɔ. Mihãa fai gbiɔ ni amɛtsɔmɔɔ tamɔ shiaŋa, ni amɛmli loi gboiɔ ni amɛshaa, ejaakɛ amɛnaaa nu.

³ Mihãa ŋwɛi dĩɔ, ni ebuɔ kpekpe.”

Su ni sa ni Yehowa Tsulɔ ahi

⁴ Nuŋtsɔ Nyɔŋmɔ eha mi nilelɔ lilɛi bɔ ni afee ni male bɔ ni mikɛ miwiemɔ akanya mɔ ni egbede aha. Daa leebi lɛ, ehɛleɔ mi shi, ni egbeleɔ mitoiŋ koni mibo nɔ ni eyɔɔ mi tsɔ̃ɔmɔ toi akɛ kaselɔ.

⁵ Nuŋtsɔ Nyɔŋmɔ lɛ eha mi niiashishinumɔ, ni mitseko ehiɛ atua, asaŋ minaaa sɛɛsɛɛ.

⁶ Mitsɔ mikotosɛɛ miha yilɔi kɛ midabii hu miha mɛi ni famɔɔ tsɛŋ; ni mijooo hiɛgbele kɛ lajɔ̃ naa foi.

⁷ Ejaakɛ Nuŋtsɔ Nyɔŋmɔ yeɔ ebuaa mi; no hewɔ lɛ, mihiɛ eshwieko shi; no hewɔ ni mimia mihiɛ kɛdamɔ naa; ni mile akɛ mihiɛ eshwieŋ shi.

⁸ Mɔ ni buɔ mi bem lɛ ebɛŋkɛ. Namɔ kɛ mi aaaye sane? Ha wɔ fɛɛ wɔdamɔ shi. Namɔ ji mɔ ni ekɛ mi ena? Ha ekɛ mi akpe!

⁹ Naa, Nuŋtsɔ Nyɔŋmɔ lɛ ji mɔ ni yeɔ buaa mi. Namɔ aaabu mi fɔ? Naa, amɛ fɛɛ amɛaasuu tamɔ atade ni omlɛgɛ aaaye amɛ.

¹⁰ Nyɛteŋ namɔ sheɔ Yehowa gbeyei? Namɔ boɔ etsulɔ lɛ gbee toi? Kɛji mɔ lɛ nyiɛ duŋ mli, ni la etsooo hãaa lɛ po, hã ekɛ ehiɛ afɔ Yehowa gbɛi lɛ nɔ, ni ekɛ ehe akpasa eNyɔŋmɔ lɛ.

¹¹ Naa, nyɛ mɛi ni nyɛwoɔ la koni eshã mɛi, nyɛ moŋ nyɛhiɛ aaakpãtã. Nɔ ni nyɛbaana kɛaajɛ midɛŋ nɛ, Haomɔ mli nyɛaajwere. Nyɛ diɛŋtsɛ moŋ nyɛaanyiɛ la ni nyɛwo lɛ mli.