Yesaia 5 - ŊMALƐ KRƆŊKRƆŊ LƐ

Waintrom he lala

¹ Hã mala suɔmɔ lala mahã mishieŋtsɛ lɛ yɛ ewaintrom lɛ he. Mishieŋtsɛ lɛ yɛ waintrom yɛ gɔŋ ni baa nii jogbaŋŋ nɔ.

² Etsa mli, ni efamɔ emli tɛi ni etɛo waintsei kpakpai yɛ mli; ema mɔɔ yɛ teŋ, ni etsa wain bu hu yɛ mli. Ehiɛ kã nɔ akɛ trom lɛ baawo wainyibii kpakpai, shi ewo kooŋ wainyibii moŋ.

³ No hewɔ lɛ, nɔ ni mishieŋtsɛ lɛ kɛɔ nɛ, “Agbɛnɛ nyɛ Yerusalɛmbii kɛ nyɛ Yudabii, nyɛ fai nɛ, nyɛkojoa mi kɛ miwaintrom lɛ teŋ.

⁴ Mɛni esa akɛ afee mitrom lɛ lolo ni mifeko? Be ni mihiɛ kã nɔ akɛ ewo wainyibii kpakpai lɛ, mɛni hewɔ ni ewo kooŋ wainyibii moŋ nɛɛ?

⁵ “Agbɛnɛ mibatsɔ̃ɔ nyɛ nɔ ni mibafee miwaintrom lɛ. Mibajie ehe afabaŋ lɛ koni kooloi akpãtã ehiɛ. Mibakumɔ ehe gbogbo lɛ hu koni anaanaa enɔ kɛho.

⁶ Mibahã emli atsa; akpɔlɔŋ emli tsei lɛ ahe, ni ahuŋ he; kpitikpitii kɛ ŋmeii baatsa yɛ mli. Mibawo atatui lɛ kitã akɛ amɛkanɛ nu amɛshwie nɔ.”

⁷ Israel ji Yehowa, Taiatsɛ lɛ, waintrom lɛ, ni Yudabii lɛ ji waintsei kpakpai ni etɛo lɛ; ni ekwɛ jalɛ saneyeli gbɛ ni naa lashishwiemɔ moŋ ena, ni yɛ ekpakpafeemɔ najiaŋ lɛ, yaafo moŋ afo!

Efɔŋ ni adesa feɔ

⁸ Kpoo hã nyɛ, nyɛ mɛi ni nyɛheheo mɛi ashĩai nyɛfataa shĩai ni nyɛyɔɔ ahe, ni nyɛŋɔɔ mɛi aŋmɔji nyɛfataa nyɛŋmɔji ahe. Nyɛhiɛ nɛkɛ ni eshwɛŋ shikpɔŋ ko dɔŋŋ yɛ he ko ni abaashi nyɛ pɛ koni nyɛhi shikpɔŋ lɛ nɔ.

⁹ Yehowa, Taiatsɛ, wie yɛ mi diɛŋtsɛ mitoiŋ akɛ, “Bɔ fɛɛ bɔ ni fee lɛ, shĩai pii baatsɔmɔ amaŋfɔ̃, shĩai wuji fɛɛfɛji baakamɔ shi ni gbɔmɛi bɛ mli.

¹⁰ Ejaakɛ waintrom kpãi nyɔŋma dalɛ, wain litai kpaanyɔ pɛ abaana kɛjɛ mli, ni abele kiloi oha kɛ nyɔŋmai kpaanyɔ ni adu lɛ, abaana abele kiloi nyɔŋma kɛ kpaanyɔ pɛ kɛjɛ mli.”

¹¹ Ni kpoo hã mɛi ni teɔ shi maŋkɛ mra ni amɛyanyiɛɔ dãatseiaŋ, mɛi ni taraa shi yɛ dãa he kɛyashiɔ jenamɔ yi waa, ni wain hãa amɛhiɛ feɔ laŋlaŋ.

¹² Amɛkɛ saŋku kɛ obenta kɛ milɛ̃ kɛ blɛ kɛ wain yeɔ amɛgbiijuji lɛ, shi amɛbuuu Yehowa, nifeemɔnii, ni amɛnãaa eninenaa nitsumɔi lɛ hu.

¹³ No hewɔ lɛ, abaaŋɔ miwebii lɛ nom, ejaakɛ amɛleee nii. Hɔmɔ miigbe amɛhiɛnaanɔbii lɛ, ni maŋbii babaoo baagboi kɛ kumai.

¹⁴ No hewɔ lɛ, gbohiiaje elɛɛ esɛŋ, ni egbɛ edaaŋ hatoo fe nine kɛmiimɛ Yerusalɛm lumɛi lɛ kɛ esafo yuu lɛ kɛ mɛi ni feɔ hoo lɛ kɛ mɛi ni mli filiɔ amɛ lɛ koni emi amɛ.

¹⁵ Abaawo mɔ fɛɛ mɔ hiɛgbele, ni abaaba nuu fɛɛ nuu shi, ni hewolɔi lɛ hu aaaba amɛ shi.

¹⁶ Shi Yehowa, Taiatsɛ lɛ, jieɔ egbojee kpo kɛtsɔ̃ jalɛnii ni efeɔ nɔ, ni Nyɔŋmɔ Krɔŋkrɔŋ lɛ tsɔ̃ɔ akɛ ehe tse krɔŋkrɔŋ lɛɛlɛŋ kɛtsɔ̃ jalɛ sane ni eyeɔ lɛ nɔ.

¹⁷ Too gwantɛŋbii aaaye nii yɛ ŋa nɔ he ni jwɛifɔ yɔɔ, ni abotiabii ni eshwishwii aaaye nii kɛnyiɛ amaŋfɔ̃ tsui koi lɛ ateŋ.

¹⁸ Kpoo hã mɛi ni kɛ amale kpãa gbalaa nɔsha, ni amɛkɛ shwiili he taŋkpee diɛŋtsɛ gbalaa esha lɛ.

¹⁹ Amɛkɛɔ akɛ, “Yehowa he afee oya; nɔ ni eto akɛ ebaafee lɛ, efee koni wɔkwɛ. Ha ni Israel Mɔ Krɔŋkrɔŋ Koome lɛ yiŋ ni eto lɛ abɛŋkɛ wɔ ni aba mli koni wɔle.”

²⁰ Kpoo hã mɛi ni tsɛɔ nɔ fɔŋ akɛ nɔ kpakpa ni amɛtsɛɔ nɔ kpakpa akɛ nɔ fɔŋ lɛ. Kpoo hã mɛi ni ŋɔɔ duŋ amɛfeɔ la, ni amɛŋɔɔ la hu amɛfeɔ duŋ lɛ. Kpoo hã mɛi hu ni ŋɔɔ nɔ ni joɔ amɛfeɔ nɔ ni ŋɔɔ, ni amɛŋɔɔ nɔ ni ŋɔɔ amɛfeɔ nɔ ni joɔ lɛ.

²¹ Kpoo hã mɛi ni buɔ amɛhe nilelɔi kɛ mɛi ni tsɛɔ amɛhe hiɛtɛ̃lɔi lɛ!

²² Kpoo hã mɛi ni feɔ ekãa kɛ wainnumɔ! Kpoo hã mɛi ni waa amɛ kɛ dãa ni wa futumɔ!

²³ Kpoo hã mɛi ni heɔ nyɔɔŋnii ni no hãa amɛŋmɛɔ mɔ ni efe efɔŋ he tswaa lɛ, ni amɛhãa mɔ ni sane ja gbɛnaanii ŋmɛɔ lɛ lɛ!

²⁴ No hewɔ lɛ, bɔ ni lalilɛi shãa gbetseli, ni la ni tsoɔ shãa jwɛi gbiŋ lɛ, nakai nɔŋŋ amɛfãi lɛ aaakpɔtɔ, ni kɔɔyɔɔ baatswa amɛfofro lɛ ashwie, ejaakɛ amɛkwa Yehowa, Taiatsɛ, mla lɛ, ni amɛgbe Israel Mɔ Krɔŋkrɔŋ Koome lɛ wiemɔ lɛ he guɔ.

²⁵ Enɛ hewɔ lɛ, Yehowa mli fu ewebii lɛ, ni ewo enine nɔ yɛ amɛnɔ, ni egbala amɛtoi. Gɔji lɛ hoso, ni amɛgbohii lɛ jwere blohui amli oookɛɛ shĩaŋ jwɛi ni abɛɛ ashwie. Shi fɛɛ sɛɛ lɛ Yehowa mlifu lɛ naa bako shi, shi ekpã enine lɛ mli lolo.

²⁶ Yehowa baato okadi ekɛtsɛ maŋ ko ni yɔɔ shɔŋŋ; ebaakpã blɛ ekɛtsɛ lɛ kɛjɛ jeŋ naagbeehe lɛ. Ni naa, maŋ nɛɛ baafee oya aba mramra.

²⁷ Etɔŋ amɛteŋ mɔ ko mɔ ko, ni amɛteŋ mɔ ko mɔ ko tɛŋ; amɛteŋ mɔ ko hɛfiinii fɛneŋ, mɔ ko mɔ ko tokota naa kpãa tseŋ.

²⁸ Amɛgãimlibii anaa ba, ni amɛtataa amɛgãi lɛ; amɛkpɔŋɔ akoklotoi tamɔ tswɛrɛbo, ni amɛshwiilii anaji lɛ tsɔ̃mɔɔ amɛhe oyaoya tamɔ lasuogbele.

²⁹ Amɛhuuɔ tamɔ jata, amɛhuuɔ tamɔ jata oblahii pɛ; amɛshiɔ amɛsɛŋ ni amɛyeɔ kooloo ni amɛgbɔbiɔ lɛ nɔ, ni amɛmɔɔ lɛ kɛyaa, ni mɔ ko nyɛɛɛ kooloo ni amɛmɔ lɛ yiwala ahere.

³⁰ Amɛaashi amɛsɛŋ amɛwo Israel nakai gbi lɛ, ni amɛsɛŋshimɔ lɛ aaagbɛɛ tamɔ ŋshɔ gbɛɛmɔ. Ni kɛji akwɛ shikpɔŋ lɛ nɔ lɛ, nɔ ni aaana ji duŋ kɛ awerɛhoo sɔŋŋ, ni oblɔtu aaaha hulu la hiɛ.