Yesaia 49 - ŊMALƐ KRƆŊKRƆŊ LƐ

Israel ji jeŋ majimaji lɛ ala

¹ Ao, nyɛ ŋshɔnaa maji, nyɛboa mi toi; ni nyɛ majimaji ni yɔɔ shɔŋŋ, nyɛfea toi. Yehowa tsɛ mi dani afɔ mi. Be ni miyɔɔ minyɛ musuŋ beebe ni Yehowa wo mi gbɛi.

² Ehã miwiemɔ naa ba tamɔ klante; ekɛ mi tee yɛ dɛkɔkɔ teŋ. Eha mitsɔ tamɔ gãimlibi ni asha he kaŋkaŋ; ni eŋɔ mi etee egãimlibii akotoku lɛ mli.

³ Ni ekɛɛ mi akɛ, “Israel, mitsulɔ ji bo; bo onɔ baatsɔ̃ ni abaawo mihiɛ nyam.

⁴ Shi mi lɛ mikɛɛ akɛ, “Migbo deŋme yakatswaa; mifite mihewalɛ efolo yakatswaa.” Kɛ̃lɛ mihiɛ kã Yehowa nɔ, ni minyɔmɔwo yɛ miNyɔŋmɔ lɛ dɛŋ.

⁵ Agbɛnɛ Yehowa kɛɛ, Yehowa mɔ ni shɔ̃ mi yɛ musuŋ koni mibatsɔ̃ etsulɔ ni maŋɔ Israel kɛba eŋɔɔ, koni abua Israel naa abaha lɛ. Akɛni mihiɛ eba nyam yɛ Yehowa hiɛ, ni miNyɔŋmɔ lɛ etsɔ mihewalɛ.

⁶ Ekɛɛ, “Efaaa akɛ ooofee mitsulɔ ni otee Israel akutsei lɛ ashi, ni okɛ Israelbii ni abaa amɛyi lɛ aku sɛɛ kɛba amɛjaku shikpɔŋ nɔ kɛkɛ; shi moŋ miiŋɔ bo mafee jeŋ majimaji lɛ ala, koni midɛŋ yiwalaheremɔ lɛ ayashɛ je lɛ naagbeehe.”

⁷ Bɔ ni Yehowa, Israel Kpɔ̃lɔ, kɛ eMɔ Krɔŋkrɔŋ lɛ, kɛɔ mɔ ni agbe ehe guɔ, ni jeŋ majimaji lɛ hi ehiɛ, nɔyelɔi anyɔŋ lɛ, kɛɔ nɛ, “Maŋtsɛmɛi aaana lɛ ni amɛaate shi amɛhã lɛ; ni lumɛi hu aaana lɛ ni amɛaakamɔ shi yɛ ehiɛ ejaakɛ Yehowa ehala lɛ, Israel Mɔ Krɔŋkrɔŋ lɛ, eji anɔkwafo.”

Abaasaa atswa Yerusalɛm

⁸ Yehowa kɛɛ akɛ, “Mibo bo toi yɛ be ni sa mli, ni yiwalaheremɔ gbi nɔ hu miye mibua bo yɛ, ni mibaa oyi koni kɛtsɔ̃ onɔ lɛ, mi kɛ maji fɛɛ akpãŋ, koni otee shikpɔŋ lɛ shi oma shi, ni oja amɛgboshinii ni etsɔ̃ amaŋfɔ̃ lɛ oha amɛ.

⁹ Okɛɛ mɛi ni awo amɛ tsuŋ lɛ akɛ, ‘Nyɛjea kpo koni nyɛye nyɛhe;’ ni mɛi ni yɔɔ duŋ mli lɛ kɛɛmɔ amɛ hu akɛ, ‘Nyɛbaa la hiɛ.’ Amɛaaye nii yɛ gbɛjegbɛi atoi, ni gɔji ni koo bɛ nɔ lɛ fɛɛ aaatsɔ̃ amɛniyelihe.

¹⁰ Hɔmɔ yeŋ amɛ, ni kumai hu yeŋ amɛ. Hulu eshaŋ amɛ, ni shiaŋa nɔ kɔɔyɔɔ ni mli edɔ hu esaŋ amɛhe, ejaakɛ mɔ ni musuŋtsɔ̃ɔ lɛ yɛ amɛhe lɛ aaakpala amɛ, ni eeetsɔ̃ɔ amɛ gbɛ kɛaatee nubui ahe.

¹¹ “Maha migɔji lɛ anɔ atsɔ gbɛ, ni aaasaa migbɛjegbɛi lɛ afee amɛ tɛmpɔŋi.

¹² Naa, miwebii aaajɛ shɔŋŋ aba; ni naa, aaajɛ kooyigbɛ kɛ anaigbɛ hu aba, ni mɛi aaajɛ Aswan shikpɔŋ lɛ nɔ yɛ wuoyigbɛ aba.”

¹³ “Ŋwɛi, lá kɛ miishɛɛ! Shikpɔŋ, bɔɔ oshe kɛ nyamɔ! Gɔji, nyɛlaa nyamɔ lala! Ejaakɛ Yehowa eshɛje emaŋ lɛ mii; ni emɛi ni nii yɔɔ mɔbɔ lɛ, emusuŋ aaatsɔ̃ lɛ yɛ amɛhe.

¹⁴ Shi Yerusalɛm kɛɛ akɛ, “Yehowa ekwa mi, miNuŋtsɔ lɛ hiɛ ekpa minɔ!”

¹⁵ Yehowa to he akɛ, “Aso yoofɔyoo hiɛ aaakpa ebi fufɔoo nɔ, ni emusuŋ etsɔŋ lɛ yɛ emusuŋbi he? Kɛji yoofɔyoo tete hiɛ aaakpa ebi nɔ lɛ, mi lɛ, mihiɛ kpaŋ onɔ.

¹⁶ Yerusalɛm, naa, miŋma ogbɛi yɛ midɛkɔkɔŋ; mihiɛ kpaŋ onɔ kɔkɔɔkɔ.”

¹⁷ “Mɛi ni baasaa atswa bo ama shi lɛ miiba nɔŋŋ, ni mɛi ni fee bo amaŋfɔ̃ lɛ baashi omli ni amɛya.

¹⁸ Wo ohiɛ nɔ ni okwɛ ohe kɛkpe; Owebii lɛ miibua amɛhe naa; amɛmiiba oŋɔɔ. Gbii abɔ ni mi, Yehowa, mihiɛ kã nɛɛ lɛ, amɛaatsɔ tamɔ jwine, ni okɛ amɛaawula ohe tamɔ ayɛmforo feɔ lɛ.”

¹⁹ “Eyɛ mli akɛ afite oshikpɔŋ lɛ, ni afee lɛ amaŋfɔ̃ moŋ nɛ, shi agbɛnɛ, mɛi baaba omli aahu bɔ ni onaŋ gbɛ ohã amɛ; ni mɛi ni ha afee bo amaŋfɔ̃ lɛ kɛ bo teŋ aaajekɛ shɔŋŋ.

²⁰ Bii ni ofɔ yɛ ojaramɔ be lɛ mli lɛ aaakɛɛ yɛ otoiŋ akɛ, ‘Shikpɔŋ nɛɛ yɛ fintɔŋŋ tsɔ ha wɔ; tsi oya koni wɔna shihilɛhe.’

²¹ Kɛkɛ lɛ ooobi ohe akɛ ‘Namɔ fɔ bii nɛɛ ha mi? Akpakpaa mibii yɛ mihe ni mitsɔ̃ kene ni bɛ bi. Aŋɔ amɛ nom kɛtee. No hewɔ lɛ, namɔ lɛ amɛ? Naa, ashi mi koome pɛ kɛkɛ; belɛ nɛgbɛ Mɛnɛɛmɛi jɛ mɔ?’ ”

²² Bɔ ni Nuŋtsɔ Nyɔŋmɔ kɛɔ nɛ, “Naa, mawo minine nɔ mafɔ majimaji lɛ anine, ni amɛaahiɛ obihii lɛ yɛ amɛkpɔkɔiaŋ kɛaaba.

²³ Maŋtsɛmɛi aaatsɔmɔ tamɔ tsɛmɛi aha nyɛ, ni maŋnyɛmɛi aaatsɔmɔ tamɔ yei fufɔhalɔi ahã nyɛ. Amɛkɛ amɛhiɛ aaabumɔ shi, amɛaakoto nyɛ, ni amɛaalɛmɔ nyɛnaji ahe mlu. Kɛkɛ lɛ nyɛaana nyɛle akɛ mi ji Yehowa. Mɛi ni hiɛ kã minɔ lɛ, amɛhiɛ gboiŋ.”

²⁴ Ani anyɛɔ ashɔ̃ɔ nii ni kãkãlɔ eyaha yɛ edɛŋ? Aloo anyɛɔ ashɔ̃ɔ nomii ni hewalɔ emɔmɔ yɛ edɛŋ?

²⁵ Shi bɔ ni Yehowa kɛɔ nɛ, “Aashɔ̃ kãkãlɔ dɛŋ nomii lɛ, ni hewalɔ haanii lɛ, aaahe yɛ edɛŋ, ejaakɛ mɔ ni kɛ bo aaana lɛ, mi kɛ lɛ ena, ni mahere bii lɛ ayiwala.

²⁶ Maha ohaolɔi lɛ agbegbee amɛ diɛŋtsɛ amɛhe, ni amɛ diɛŋtsɛ amɛlá aaatɔ amɛ dãa. Kɛkɛ lɛ adesai fɛɛ aaana ale akɛ Mi ji Yehowa, nyɛ-Kpɔ̃lɔ kɛ Yiwalaherelɔ, Israel Nyɔŋmɔ Ofe lɛ.”