Yesaia 48 - ŊMALƐ KRƆŊKRƆŊ LƐ

Nyɔŋmɔ pɛ ni le wɔsɛɛ sane

¹ Nyɛ Israelbii, nyɛ mɛi ni akɛ Israel gbɛi ewo nyɛ, ni nyɛjɛ Yuda mli, nyɛboa enɛ toi! Nyɛkɛ Yehowa gbɛi lɛ kãa kitã, ni nyɛkɛɔ akɛ Israel Nyɔŋmɔ lɛ, lɛ ji Nyɔŋmɔ, shi anɔkwale kome nɛkɛ bɛ mli.

² Nyɛtsɛɔ nyɛhe maŋ krɔŋkrɔŋ lɛ mli bii, ni nyɛkɛɔ akɛ nyɛkpasa Israel Nyɔŋmɔ lɛ. Mɔ ni gbɛi ji Yehowa, Taiatsɛ lɛ.

³ Bɔ ni Yehowa kɛɛ nɛ, “Mijɛ jeeŋmɔ ko mitsɔ̃ɔ nii ni baaba. Eje minaa, ni miha ana ale, ni trukaa lɛ mifee, ni amɛba mli.

⁴ Akɛni mile akɛ ofeɔ ntɛŋ, ni okuɛŋ ti tamɔ dade, ni ohiɛŋtso wa keketee tamɔ akɔɔble hewɔ lɛ,

⁵ mijɛ jeeŋmɔ ni migba bo. Mikɛɛ bo dani aba mli, koni okakɛɛ akɛ, mimãgã ni akɛ tso gbɔ loo amãgã ni ashwie lɛ fã, ni enɛɛmɛi fɛɛ ba.

⁶ Onu momo, ni agbɛnɛ ona nibii nɛɛ fɛɛ. Belɛ bɛ obaakpɛlɛ nɔ? Kɛjɛ kɛyaa nɛɛ lɛ mibaha onu nibii hei, nibii ni akɛtee nibii ni oleee.

⁷ Kpaako mifeɔ, amɛbɛ sa. Onuko amɛhe sane lɛ dã ja ŋmɛnɛ, koni okakɛɛ akɛ, ‘Naa, mile mito’.

⁸ Onuko dã, ni oleee otooo sa; otoi egbeko dã kɛjɛ blema beebe; ejaakɛ mile akɛ kutumpɔfoi anii ofeɔ, ni kɛjɛ ofɔmɔ mli beebe lɛ ale bo akɛ atuatselɔ.

⁹ Migbɛi lɛ hewɔ lɛ, miitsi mimlifu lɛ mato. Mi, miyijiemɔ hewɔ lɛ, miito mitsui shi maha bo koni mikakpãtã ohiɛ.

¹⁰ Naa, mitsuu ohe, shi oshɛɛɛ jwiɛtɛi. Mikɛ amanehulu fee la mikɛtsuu ohe, ni mikɛka bo mikwɛ akɛ oshɛɔ lo.

¹¹ Mi diɛŋtsɛ mihewɔ, mi diɛŋtsɛ mihewɔ ni mifeɔ enɛ, ejaakɛ mɛni hewɔ aaagbe migbɛi lɛ he guɔ? Mikɛ minunyam lɛ haŋ mɔ kroko.”

Kuros ji Hiɛnyiɛlɔ ni Nyɔŋmɔ efã

¹² “Ao, Yakob, bo mi toi; Israel, bo mɔ ni mitsɛ, bo mi toi. Mi ni, mi ji klɛŋklɛŋ mɔ, ni mi nɔŋŋ ji naagbee mɔ lɛ!

¹³ Mi, minine to shikpɔŋ lɛ shishi, ni mi, mihewalɛ lɛɛ ŋwɛi mli ha shi. Kɛji mitsɛ amɛ lɛ amɛ fɛɛ blublu amɛbadamɔɔ mihiɛ.

¹⁴ “Nyɛ fɛɛ, nyɛbuaa nyɛhe naa koni nyɛbaboa toi. Te nyɔŋmɔi lɛ ateŋ nɔ ni egba enɛɛmɛi eko lɛ? Mɔ ni Yehowa sumɔɔ lɛ lɛ, lɛ ebaatsu yiŋ ni Yehowa eto yɛ Babilon he lɛ he nii; ebaate shi ewo Babilon.

¹⁵ Mi, mi nɔŋŋ miwie, ni mifɔ̃ minaa mitsɛ lɛ. Mi nɔŋŋ mikɛ lɛ ba, ni egbɛ aaaja aha lɛ.

¹⁶ Nyɛtsia nyɛbɛŋkɛa mi nyɛbaboa enɛ toi. Kɛjɛ shishijee lɛ miwieee yɛ dujiaŋ; ni dani nɔ ko baaba mli lɛ, miyɛ jɛi. Ni agbɛnɛ Nuŋtsɔ Nyɔŋmɔ etsu mi kɛ Emumɔ lɛ.”

Yehowa yiŋtoo yɛ Ewebii ahe

¹⁷ Bɔ ni Yehowa, bo-Kpɔ̃lɔ, Israel Mɔ Krɔŋkrɔŋ lɛ kɛɛ nɛ, “Mi ji Yehowa, oNyɔŋmɔ lɛ, mɔ ni tsɔɔ bo nii ni hi ha bo, mɔ ni tsɔɔ bo gbɛ ni esa akɛ onyiɛ nɔ lɛ.

¹⁸ Ao, eji oye mikitãi lɛ anɔ kulɛ, oooshwere tamɔ faa; ni okunimyeli aaatsara nɔ tamɔ ŋshɔkei.

¹⁹ Omusuŋbii aaafa tamɔ shia, ni oshwiei aaafa tamɔ mlu. Agbeŋ amɛgbɛi, ni akpãtãŋ amɛhiɛ yɛ mihiɛ.”

²⁰ Nyɛshia Babilon nyɛjoa foi kɛjea Kaldea nyɛyaa. Nyɛbɔa oshe kɛ miishɛɛ; nyɛhaa anua yɛ je lɛ naagbeehe akɛ, “Yehowa ekpɔ̃ etsulɔ Israel.”

²¹ Be ni ekɛ amɛ nyiɛ shiaŋa lɛ nɔ lɛ, kumai yeee amɛ. Eha nu jɛ tɛsaa mli ho hã amɛ; egba tɛsaa lɛ mli, ni nu lɛ tue kɛje kpo.

²² “Hejɔlɛ ko bɛ hã mɛi fɔ̃ji” Yehowa kɛɛ.