Yesaia 47 - ŊMALƐ KRƆŊKRƆŊ LƐ

Abaakojo Babilon

¹ Yehowa kɛɛ akɛ, “Babilon, oblayoo foro, kpelekemɔ shi koni obata mlu mli! Ta shikpɔŋ; maŋtsɛ sɛi ko bɛ ha bo, bo Kaldeabii abiyoo, ejaakɛ atsɛŋ bo oje kɛ mɔ ni ahiɛɔ lɛ dɔdɔɔdɔ dɔŋŋ.

² Kɔlɔmɔ wiɛbii ni owiɛ ma, jiemɔ ohiɛhaa nɔ lɛ, jiemɔ otade yuu lɛ, dɔrɔmɔ onaji ahe mama kɛya ŋwɛi koni ofo faa lɛ.

³ Aaajie oyayaiaŋ kpo, ni ohiɛgbele aaabakã shi. Matɔ owele, ni mɔ ko mɔ ko etsiŋ minaa.”

⁴ Wɔ-Kpɔ̃lɔ lɛ ni gbɛi ji Yehowa, Taiatsɛ lɛ, lɛ ji Israel Mɔ Krɔŋkrɔŋ lɛ.

⁵ Ao Babilon, ta shi kpoo yɛ duŋ mli, ejaakɛ atsɛŋ bo nɔyelihei amaŋnyɛ dɔŋŋ.

⁶ Mimli wo mimaŋ lɛ la, ni mibule minɔyeli nɔ lɛ, ni miŋɔ amɛ miwo odɛ̃ŋ. Omusuŋ etsɔ̃ɔɔ bo yɛ amɛhe; hiimeji tete po okɛ amɛ ye kɛ joomɔ.

⁷ Osusu akɛ obaaye maŋnyɛ kɛya naanɔ. No hewɔ lɛ, okɛ sane nɛɛ wooo otsuiŋ, ni oyajwɛŋŋ bɔ ni naagbee lɛ aaatamɔ ahã.

⁸ No hewɔ lɛ, bo enɛ toi, bo ni onyaa jeŋ ŋɔɔmɔyeli he, ni ota shi ni ohe ejɔ bo, ni okɛɔ ohe akɛ, “Mi ji mi, ni mi, misɛɛ lɛ mɔ ko mɔ ko bɛ dɔŋŋ, mitsɔŋ okulafo, ni migboŋ bi hu.”

⁹ Nibii enyɔ nɛɛ aaaba onɔ trukaa yɛ gbi kome nɔ. Okunyaayeli babaoo kɛ osɛbɛi babaoo lɛ ahewalɛ fɛɛ sɛɛ lɛ, aaakpakpaa obii yɛ ohe, ni oootsɔ̃ okulafo hu.

¹⁰ Onifɔɔjianii lɛ mli lɛ, efee bo akɛ oyɛ shweshweeshwe; ni okɛɛ ohe akɛ, “Mɔ ko enaaa mi.” Oŋaa kɛ onilee lɛ ha odu gbɛ, ni okɛɛ ohe akɛ, “Mi ji mi, ni mi, misɛɛ lɛ mɔ ko mɔ ko bɛ dɔŋŋ.”

¹¹ Shi sane fɔŋ baaye bo, ni oleŋ bɔ ni ooofee ni oje mli. Osharã aaasharã bo, ni onyɛŋ okpa oshwie. Hiɛkpãtãmɔ aaabanina bo trukaa bɔ ni okpaaa gbɛ.

¹² “Yaa nɔ kɛ okablɛfiimɔ kɛ okunyaayeli babaoo ni ogbo he deŋme kɛjɛ oblahiiaŋ lɛ, akɛ aleee nɔ eeenyɛ eye ebua bo lo; akɛ aleee nɔ ohe aaafee gbeyei.

¹³ Ŋaawoo pii lɛ eje otsine. Ha mɛi ni le ŋwɛi nibiiaŋ lɛ kɛ ŋulamiiaŋkwɛlɔi lɛ, mɛi ni kɛji nyɔŋ je ni amɛtsɔ̃ɔ nii ni baaba onɔ lɛ, ate shi koni amɛhere oyiwala!

¹⁴ Naa, amɛtamɔ gbetseli, ni la aaakpãtã amɛhiɛ wɛɛ; amɛnyɛŋ amɛhe amɛhere kɛje la lɛ naawalɛ mli. Enɛ jeee ŋai la ni awereɔ, loo la ni ataa he awereɔ.

¹⁵ Mɛi ni ogbo amɛhe deŋme lɛ, bɔ ni amɛaatsɔ̃ amɛha bo nɛ; oŋulamiiaŋkwɛlɔi ni wo bo ŋaa lɛ, amɛ fɛɛ amɛaashi bo; mɔ ko mɔ ko bɛ ni aaahere oyiwala.”