Yesaia 46 - ŊMALƐ KRƆŊKRƆŊ LƐ

¹ “Babilon nyɔŋmɔi lɛ anaagbee nɛ! Be ko ni eho lɛ, aja Bel kɛ Nebo. Shi amrɔ nɛɛ afimɔ amɛ ashwie tejii akotosɛɛ akɛ jatsu ni kooloi tere ni etɔ amɛ.

² Amãgãi lɛ kotokotoo shi amɛ fɛɛ amɛmamɔmamɔɔ amɛhiɛ shi; amɛnyɛɛɛ amɛhe amɛfɛne, ni aŋɔ amɛ nom kɛmiiya.

³ “Ao, Yakob shwiei, nyɛ mɛi fɛɛ ni eshwɛ, nyɛboa mi toi. Nyɛ mɛi ni mihiɛ nyɛ kɛjɛ nyɛfɔmɔ mli, ni mikura nyɛ kɛjɛ nyɛhɔŋɔɔ mli beebe,

⁴ ni kɛyaashi gbɔlɛ mli lɛ mi nɔŋŋ ni; ni kɛyaashi nyɛwaŋjee mli tete mi nɔŋŋ ni. Mi, mibɔ nyɛ, ni mi nɔŋŋ mahiɛ nyɛ; mi miwa nyɛ, ni mahere nyɛyiwala.

⁵ Namɔ nyɛkɛbaato mihe, ni ekɛ mi aaaye egbɔ? Namɔ nyɛkɛbaato mihe, ni ekɛ mi aaafee pɛ?

⁶ Mɛi ni fɔseɔ shika kɛjɛɔ flɔtɔ mli shwieɔ shi, ni amɛŋmɛɔ jwiɛtɛi yɛ nsɛni mli lɛ, amɛbɔɔ shikaŋaalɔ apaa, ni efeɔ nyɔŋmɔ ko ehãa amɛ, ni amɛhoɔ amɛkotoɔ shi, ni amɛjaa lɛ.

⁷ Amɛwoɔ lɛ amɛtswaa amɛkɔŋ, ni amɛtereɔ lɛ kɛyaa; amɛkɛ lɛ yamaa shi yɛ he ko, ni jɛi emaa; enyɛɛɛ ehe etsi kɛjɛ emaahe lɛ. Kɛji abolɔ atsɛ lɛ lɛ, ehereee mɔ nɔ; ni ehereee mɔ yiwala kɛjɛɛɛ ehaomɔ mli.

⁸ “Nyɛ eshafeelɔi, nyɛkaia sane nɛɛ, ni nyɛsusua he. Nyɛkaia lɛ jogbaŋŋ.

⁹ Nyɛkaia blema teteetenii lɛ. Mi nɔŋŋ ji Nyɔŋmɔ, ni mɔ ko mɔ ko bɛ sɛɛ dɔŋŋ. Mi ji Nyɔŋmɔ, ni mɔ ko mɔ ko bɛ ni tamɔ mi.

¹⁰ Mi, mijɛ shishijee lɛ mli ni mitsɔ̃ɔ naagbee mli nibii ni baaba; Mi, mijɛ blema beebe mitsɔ̃ɔ nibii ni anako afee tete. Mi, mikɛɔ akɛ; ‘Miyiŋtoi aaaba mli, ni mibafee nibii fɛɛ ni yɔɔ miyiŋ.’

¹¹ Miitsɛ miyiŋtoo naa nuu ko kɛmiijɛ maŋsɛɛ shɔŋŋ. Ebaagba shi kɛba tamɔ okropɔŋ. Mina miwie, ni mahã eba mli; mito miyiŋ, ni mafee hu.

¹² Nyɛ tsuisalɔi, nyɛboa mi toi, nyɛ ni nyɛkɛ yiwalaheremɔ teŋ ejekɛ!

¹³ Miha miyiwalaheremɔ ebɛŋkɛ; ebɛ shɔŋŋ. Midɛŋ yiwalaheremɔ lɛ etsɛŋ. Mibahere Yerusalɛm, ni mahã Israel hiɛ aba nyam.”