Yesaia 45 - ŊMALƐ KRƆŊKRƆŊ LƐ

Yehowa fã Koresh

¹ Bɔ ni Yehowa kɛɔ Koresh mɔ ni efɔ lɛ mu, mɔ ni mimɔ eninejurɔ mli koni maba majimaji ashi yɛ ehiɛ, koni maba maŋtsɛmɛi ashi, ni magbele shinai yɛ ehiɛ, koni akaŋamɔ agboi awo lɛ lɛ nɛ,

² “Manyiɛ ohiɛ, ni maha hei ni yɔɔ dokoidokoi afee trɛnɛɛ, ni majwara akɔɔble agboi lɛ wɔtsɔwɔtsɔ, ni makumɔ amɛsɛɛ dade adabaŋi lɛ amli.

³ Maŋɔ jwetrii ni aŋɔ tee duŋ mli kɛ ojarawa nibii ni akɛtee yɛ teemɔhei lɛ mahã bo, koni ona ole akɛ mi ji Yehowa, Israel Nyɔŋmɔ lɛ, mɔ ni kɛ ogbɛi tsɛ bo lɛ.

⁴ Mitsulɔ Yakob ni ji Israel, mɔ ni miŋɔ lɛ lɛ hewɔ ni Kuros, mikɛ ogbɛi tsɛ bo, ni miwo bo gbɛi, tsɛbelɛ oleee mi lɛ.”

⁵ “Mi ji Yehowa, ni mɔ ko mɔ ko bɛ dɔŋŋ; mi misɛɛ lɛ Nyɔŋmɔ ko Nyɔŋmɔ ko bɛ. Mahã ona hewalɛ tsɛbelɛ oleee mi,

⁶ koni kɛjɛ hulushiteehe kɛyashwie anaigbɛ fɛɛ lɛ, adesa ana ale akɛ mi misɛɛ lɛ, mɔ ko mɔ ko bɛ dɔŋŋ.

⁷ Mi mihãa la kɛ duŋ fɛɛ baa; mihãa anaa hejɔlɛ, ni mihãa jaramɔ baa. Mi ji Yehowa, mɔ ni feɔ enɛɛmɛi fɛɛ lɛ.”

⁸ “Ao Ŋwɛi, nɛɛ nu kɛjɛ ŋwɛi! Ha atatui afɔse jalɛ ashwie shi! Shikpɔŋ agbele enaa koni yiwalaheremɔ aba, koni eha jalɛ saneyeli hu akwɛ̃ Mi, Yehowa, mafee enɛ!

Adebɔɔ kɛ Jeŋ sane Nuŋtsɔ

⁹ Kpoo hã mɔ ni kɛ Ebɔlɔ lɛ fuɔ daa! Sũ ni yɔɔ nishɔ̃lɔ dɛŋ ji lɛ. Ani shikpɔŋ sũ biɔ nishɔ̃lɔ akɛ, ‘Mɛni okɛ mi shɔ̃ɔ nɛɛ?’ Aloo, ekɛɔ akɛ, ‘Nɔ ni oshɔ̃ lɛ niji bɛ he?’

¹⁰ Kpoo ha bi ni kɛɔ etsɛ akɛ, ‘Mɛni bi obaafɔ?’ Aloo ebiɔ yoo ni miikɔmɔ akɛ, ‘Ni okɔmɔɔ nɛɛ mɛɛ bi obaafɔ?’

¹¹ Bɔ ni Yehowa, Israel Mɔ Krɔŋkrɔŋ kɛ Ebɔlɔ lɛ, kɛɔ nɛ, “Mɛɛ hegbɛ nyɛyɔɔ akɛ nyɛaabi mi mibii lɛ ahe sane, aloo nyɛaatsɔ̃ɔ mi nɔ ni esa akɛ mikɛ miniji afee?’

¹² Mi mibɔ shikpɔŋ lɛ, mi mibɔ gbɔmɔ mito nɔ. Mi mikɛ minine kpã ŋwɛi mli miha shi. Hulu, nyɔɔŋtsere kɛ ŋulamii, ŋwɛi nibii lɛ, mi mifamɔ naa ni amɛba.

¹³ Mi diɛŋtsɛ mitee Koresh shi koni etsu miyiŋtoo lɛ he nii, asaŋ koni ejaje nibii. Mahã egbɛi fɛɛ aja aha lɛ; eeesaa etswa mimaŋ lɛ, ni eeeŋmɛɛ minomii lɛ ahe jeee yɛ yinii loo sɛɛnamɔ ko hewɔ.” Yehowa, Taiatsɛ lɛ, kɛɛ.

¹⁴ Bɔ ni Yehowa kɛɔ Israel nɛ, “Nii ni Ijipt yɔɔ lɛ kɛ Kush hu jarayeli mli sɛɛnamɔnii lɛ fɛɛ aaatsɔ̃ onii; ni Sebahii, hii gojogojoo lɛ, aaatsɔmɔ onyɔji. Amɛaakamɔ gboklɛi amli kɛaanyiɛ osɛɛ; amɛaaba ni amɛaakoto bo. Amɛaakpa bo fai amɛkɛɛ, ‘Bo pɛ Nyɔŋmɔ kɛ yɔɔ, ni Lɛ esɛɛ lɛ, mɔ ko bɛ dɔŋŋ.

¹⁵ Anɔkwale mli lɛ, bo ji Nyɔŋmɔ ni etee ehe. Ao, Israel Nyɔŋmɔ, Yiwalaherelɔ!

¹⁶ Mɛi fɛɛ ni feɔ amãgãi lɛ, amɛhiɛ aaagboi, ni amɛhiɛ aaashwie shi, amɛ fɛɛ amɛaanyiɛ kɛ hiɛgbele.

¹⁷ Shi Yehowa aaahere Israel yiwala kɛya naanɔ; nyɛhiɛ gboiŋ, ni asaŋ nyɛhiɛ eshwieŋ shi kɔkɔɔkɔ kɛyaashi naanɔ.’ ”

¹⁸ Ejaakɛ bɔ ni Yehowa mɔ ni bɔ ŋwɛi lɛ, Nyɔŋmɔ mɔ ni shɔ̃ shikpɔŋ lɛ, ni ewaje lɛ ema shi shiŋŋ, ni ebɔɔɔ lɛ koni ekã shi efolo, shi ebɔ lɛ koni ahi nɔ lɛ kɛɛ nɛ, “Mi ji Yehowa, ni kɛjɛ mi, misɛɛ lɛ mɔ ko bɛ dɔŋŋ.”

¹⁹ Jeee teemɔ mli miwie yɛ, yɛ shikpɔŋ ni enɔ ewo duŋ ko nɔ. Mikɛɛ Israelbii lɛ akɛ, “Nyɛtaoɔ mi yaka; nyɛtaoɔ mi yɛ he ni nɔ ko nɔ ko bɛ. Mi Yehowa, miwieɔ anɔkwale. Nɔ ni ja lɛ, no mikɛɔ.”

Je lɛ Nuŋtsɔ lɛ kɛ Babilon Amãgãi lɛ

²⁰ Yehowa kɛɛ akɛ, “Nyɛbuaa nyɛhe naa koni nyɛbaa, nyɛ fɛɛ nyɛbaa kutuu, nyɛ, maji lɛ amli bii ni nyɛje hiɛkpãtãmɔ mli! Mɛi ni tereɔ amɛtso amãgãi lɛ kɛnyiɛɔ, ni amɛsɔleɔ amɛhãa nyɔŋmɔ ni nyɛɛɛ mɔ yiwala ehere lɛ, amɛleee nii.

²¹ Nyɛbaa koni nyɛbajajea nyɛsane lɛ; nyɛhãa amɛyaa ajina! Namɔ ji mɔ ni jeeŋmɔ ko lɛ egba nɔ ni eba nɛɛ? Namɔ kɛɛ enɛ kɛjɛ blema? Aso jeee mi, Yehowa, ni? Ni misɛɛ lɛ Nyɔŋmɔ ko bɛ dɔŋŋ ni ji Nyɔŋmɔ jalɔ kɛ Yiwalaherelɔ? Misɛɛ lɛ mɔ ko mɔ ko bɛ dɔŋŋ.”

²² “Jeŋ gbɔmɛi fɛɛ, nyɛkua nyɛsɛɛ kɛbaa miŋɔɔ, koni ahere nyɛyiwala. Ejaakɛ mi pɛ ji Nyɔŋmɔ, ni kɛjɛ misɛɛ lɛ mɔ ko bɛ dɔŋŋ.

²³ Mikɛ mi diɛŋtsɛ migbɛi ekã mihe kitã: Jalɛ wiemɔ ko eje minaa, ni ekuŋ esɛɛ efolo. Nakutso fɛɛ nakutso aaakũla mi, ni lilɛi fɛɛ lilɛi aaakã kitã akɛɛ akɛ,

²⁴ “Yehowa kɛkɛ mli jalɛ kɛ hewalɛ yɔɔ. Mɛi fɛɛ ni te shi wo lɛ lɛ, aaaba eŋɔɔ ekoŋŋ kɛ hiɛgbele.

²⁵ Yehowa mli Israel shwiei fɛɛ aaaye bem yɛ, ni enɔ amɛaashwã amɛfɔ̃.