Yesaia 44 - ŊMALƐ KRƆŊKRƆŊ LƐ

Yehowa kome pɛ ji Nyɔŋmɔ

¹ Yehowa kɛɛ akɛ, “Ao mitsulɔ Israel, Yakob shwiei, miwebii ni mihala, nyɛboa toi agbɛnɛ.

² Bɔ ni Yehowa mɔ ni bɔ bo, mɔ hu ni shɔ̃ bo yɛ onyɛ musuŋ beebe, ni ebaaye ebua bo lɛ kɛɛ nɛ, Kaashe gbeyei, mitsulɔ Yakob, miwebii ni mihala, ni misumɔɔ,

³ Ejaakɛ mibanɛ nu mashwie shikpɔŋ ni yeɔ nu kumai nɔ, ni mahã fai atue yɛ shikpɔŋ gbiŋ lɛ nɔ. Mahã oshwiei ayimɔ obɔ̃bɔ̃ kɛ mimumɔ lɛ, ni mijɔɔmɔ aaahi oshwiei anɔ.

⁴ Amɛaakwɛ̃ tamɔ jwɛi ni ena nu, tamɔ faa toi ŋɔi.

⁵ Mɔnɛ baakɛɛ mɔnɛ akɛ, ‘Yehowa nɔ ji mi;’ ni mɔ kroko aaaŋɔ Yehowa gbɛi awo ehe, ni mɔ ko hu aaaŋma yɛ enine he akɛ, ‘Yehowa nɔ nɛ’, ni eeeŋɔ Yehowa gbɛi ewo ehe.”

⁶ Bɔ ni Yehowa, Israel maŋtsɛ, Israel Kpɔlɔ, Yehowa, Taiatsɛ lɛ, kɛɛ nɛ, “Mi ji klɛŋklɛŋ mɔ kɛ naagbee mɔ; kɛjɛ mi, misɛɛ lɛ Nyɔŋmɔ ko Nyɔŋmɔ ko bɛ dɔŋŋ.

⁷ Namɔ kɛ mi ye egbɔ? Ha mɔ lɛ akɛɛ, ha ejaje yɛ mihiɛ. Kɛjɛ blema, namɔ egba nii ni nyiɛ gbɛ kɛbaa dã. Amɛgba wɔ nii ni baaba hu.

⁸ Nyɛhe akakpokpoa ni nyɛkashea gbeyei! Ani jeee blema beebe mijɛ mikɛɛ nyɛ, ni nyɛnu kɛjɛ minaa? Nyɛ ji midasefoi! Ani misɛɛ lɛ Nyɔŋmɔ ko yɛ? Tɛsaa ko bɛ he ko he ko, mileee eko.”

Jwɛŋmɔ bɛ amãgãjamɔ mli

⁹ Mɛi ni feɔ amãgã bɛ nɔ ko mli, ni nibii ni amɛnaa he miishɛɛ lɛ ahe bɛ sɛɛnamɔ. Mɛi ni jaa amãgãi nɛɛ lɛ eshwila, ni amɛleee nii, ni aaawo amɛ hiɛgbele.

¹⁰ Namɔ hu gbaa ehe naa efeɔ nyɔŋmɔ aloo eshwieɔ amãgã ni he bɛ sɛɛnamɔ?

¹¹ Naa, amɛjalɔi lɛ fɛɛ ahiɛ aaagboi. Mɛi fɛɛ ni feɔ amãgãi lɛ, adesai kɛkɛ ji amɛ. Hã amɛ fɛɛ amɛbabua amɛhe naa; hã amɛ jie amɛhiɛ; amɛbaakpokpo, ni amɛ fɛɛ amɛhiɛ aaashwie shi.

¹² Sɔ̃lɔ ji mɔ ni sɔ̃ɔ. Ekɛ ŋai kɛ la tsuɔ he nii, ni ekɛ hamle tswiaa kɛ ekɔjiaŋ hewalɛ, ni esɔ̃ɔ. Hɔmɔ yeɔ lɛ, ni ehewalɛ tãa, shi enuuu nu, ni no hewɔ lɛ, etɔɔɔ biti.

¹³ Kapintafonyo ŋmɔɔ kpãa yɛ tso he; eyereɔ kpãa lɛ mli, ni ekɛ pɛnsil kadiɔ he. Egbɔɔ tso lɛ he kɛ dade, ni ekɛ kɔmpas tɛŋɔ nii yɛ tso lɛ nɔ; egbɔɔ tso lɛ gbɔmɔ su pɛpɛɛpɛ fɛɛfɛo, ni ekɛyawoɔ gbatsu mli.

¹⁴ Etoɔ tsenedrutsei, aloo eyahalaa kooŋ tsei loo odum, ni ehaa edaa ni enaa hewalɛ yɛ kooŋ tsei lɛ ateŋ. Etɛoɔ tsenedrutso, ni nu nɛɔ shwieɔ nɔ, ni edaa.

¹⁵ Gbɔmɔ ŋɔɔ tso lɛ eko ekɛfeɔ lai, ni ekɛ eko hu feɔ amãgã. Ekɛ eko shɛreɔ la ewereɔ, ni ekɛshãa aboloo hu; kɛkɛ lɛ ekɛ tso lɛ eko nɔŋŋ feɔ nyɔŋmɔ, ni ejaa. Ekɛ eko gbɔɔ amãgã, ni ekotoɔ shi ejaa lɛ.

¹⁶ Ekɛ tso lɛ eko shɛreɔ la, ni ekɛshãa loo eyeɔ ni etɔɔ; asaŋ ewereɔ tso lɛ la, ni ekɛɔ akɛ, “Yiɛ, mihe edɔ, mina la!”

¹⁷ Tso ni eshwɛ lɛ ekɛgbɔɔ amãgã efeɔ enyɔŋmɔ, ni ekotoɔ lɛ, ni ejaa lɛ, ni esɔleɔ etsɛɔ lɛ, ni ekɛɔ akɛ, “Heremɔ mi, ejaakɛ bo ji minyɔŋmɔ.”

¹⁸ Amɛleee nii, asaŋ amɛkɔɔɔ sane sɛɛ hu, ejaakɛ amɛhiŋmɛii eshwila ni amɛnaaa nii; ni amɛjwɛŋmɔi anaa eŋamɔ hu, ni amɛnuuu nii ashishi.

¹⁹ Mɔ ko mɔ ko jwɛŋmɔ baaa nɔ, asaŋ nilee loo sanesɛɛkɔmɔ hɛleee mɔ ko kwra shi ni ekɛɛ akɛ, “Mikɛ tso lɛ fã shã ŋai, ni mikɛ ŋai lɛ shã aboloo kɛ loo fɛɛ ni miye. Esa akɛ makoto tsoku lɛ lo?”

²⁰ Mɔ ni yeɔ lamlu tete po, aaanu lɛ shishi. Esusumɔ kɔɔdɔŋ lɛ eha edu gbɛ, ni enyɛŋ eyiwala ehere, ni ekpɛlɛŋ nɔ, ni eeekɛɛ akɛ, “Kwɛ, nɔ ni yɔɔ mininejurɔ mli lɛ, jeee lakamɔnii ni lo?”

Yehowa ji Bɔlɔ kɛ Kpɔlɔ

²¹ Yehowa kɛɛ akɛ, “Ao Israel, kaimɔ enɛ, kaimɔ akɛ mitsulɔ ji bo. Mi mibɔ bo; mitsulɔ ji bo. Ao Israel, mihiɛ kpaŋ onɔ!

²² Mihã ohe eshai lɛ ekpalaŋ kɛtee tamɔ atatu, ohe eshai lɛ emii tamɔ afua. Kpalemɔ kɛba miŋɔɔ, ejaakɛ mi, mikpɔ̃ bo.”

²³ Ao ŋwɛi, la ejaakɛ Yehowa etsu enii! Ao shikpɔŋ lɛ shishi, bɔɔ oshe! Ao gɔji, nyɛwoa lala nɔ! Ao koo kɛ tso fɛɛ tso ni yɔɔ mli, nyɛlaa! Ejaakɛ Yehowa ekpɔ̃ Israel ni aawo ehiɛ nyam yɛ Israel.”

²⁴ “Bɔ ni Yehowa, oKpɔlɔ lɛ kɛɛ nɛ, ‘Mi ji Yehowa, mɔ ni bɔ nii fɛɛ, mɔ ni ekome too ekpã ŋwɛi mli eha shi, ni ekome pɛ elɛɔ shikpɔŋ lɛ mli.

²⁵ Mɔ ni hãa amalelɔi agbalɛi feɔ yaka, ni ehãa klamɔi tsɔ̃ɔ kwashiai, mɔ ni kũɔ nilelɔi anaa, ni ehãa amɛnilee lɛ tsɔ̃ɔ kwashiai anii lɛ.

²⁶ Emaa etsulɔ wiemɔ nɔ mi, ni ehãa ebɔfoi agbalɛ baa mli taakɛ ekɛɛ yɛ Yerusalɛm he akɛ, ‘Mɛi baahi mli ekoŋŋ’, ni ekɛɛ yɛ Yuda maji wuji lɛ ahe akɛ, ‘Abaasaa amãmɔ amɛ, ni maha tsui ni akumɔ ate shi ekoŋŋ’ lɛ.

²⁷ Lɛ ekɛɔ ŋshɔ akɛ, ‘Omli nu agbi, mibahã ofai lɛ hu amii?’

²⁸ Ekɛɛ yɛ Koresh he akɛ, ‘Mitookwɛlɔ ji lɛ, ni ebaafee nii ni sa mihiɛ’; ni ekɛɛ yɛ Yerusalɛm he akɛ, ‘Abaasaa ama’, ni ekɛɛ yɛ Sɔlemɔ we lɛ hu he akɛ, ‘Abaato oshishi ekoŋŋ.’ ”