Yesaia 43 - ŊMALƐ KRƆŊKRƆŊ LƐ

Nyɔŋmɔ baahere emaŋbii lɛ

¹ Shi agbɛnɛ Yakob, bɔ ni Yehowa mɔ ni bɔ bo lɛ kɛɛ nɛ. Ao Israel, bɔ ni mɔ ni shɔ̃ bo lɛ kɛɛ nɛ, “Kaashe gbeyei ejaakɛ makpɔ̃ bo. Mikɛ ogbɛi etsɛ bo; mi, minɔ ji bo!

² Kɛji oofo faa ni mli kwɔ lɛ, mikɛ bo yɛ; ni oofo faa hu nu lɛ esuŋ bo; Kɛji onyiɛ la mli lɛ, eshaŋ bo, ni lalilɛi lɛ kpãtãŋ ohiɛ.

³ Ejaakɛ mi ji Yehowa, oNyɔŋmɔ lɛ, Israel Mɔ Krɔŋkrɔŋ, oYiwalaherelɔ lɛ. Miŋɔ Ijipt miha akɛ okpɔmɔnii; miŋɔ Kush kɛ Sheba miha mikɛtsake bo.

⁴ Akɛni ojara wa ha mi, ni ohiɛ yɛ nyam, ni misumɔɔ osane hewɔ lɛ, maŋɔ gbɔmɛi maha yɛ onajiaŋ ni maŋɔ majimaji maha kɛtsake bo.

⁵ Kaashe gbeyei, ejaakɛ mi mikɛ bo yɔɔ. Maŋɔ oshwiei kɛaajɛ bokã kɛba, ni mabua onaa kɛaajɛ anai.

⁶ Makɛɛ kooyigbɛ akɛ, ‘Ŋmɛɛmɔ amɛhe!’ Ni makɛɛ wuoyigbɛ akɛ, ‘Kaatsi amɛnaa;’ ŋɔɔ mibihii lɛ kɛjɛ shɔŋŋ kɛ mibiyei lɛ kɛjɛ shikpɔŋ lɛ naagbeehei kɛba,

⁷ mɔ fɛɛ mɔ ni aŋɔ mi, migbɛi awo lɛ lɛ, mɔ fɛɛ mɔ ni mi, mibɔ lɛ, koni ehã mihiɛ aba nyam lɛ.”

Israel ji Yehowa odasefonyo

⁸ Nyɔŋmɔ kɛɛ, “Tsɛ mimaŋbii lɛ kɛba kojomɔ. Amɛyɛ hiŋmɛii shi amɛnaaa nii; amɛyɛ toii, shi amɛnuuu nii.

⁹ Ha majimaji fɛɛ naa abakpe ni gbɔmɛi fɛɛ abua amɛhe naa. Te amɛnyɔŋmɔi lɛ ateŋ nɔ ni aaanyɛ agba nɔ ni baa hu? Te amɛteŋ nɔ ni tsɔ̃ hiɛ egba nɔ ni yaa nɔ amrɔ nɛɛ lɛ? Amɛhã amɛdasefoi lɛ aba amɛbatsɔ̃ɔ koni abu amɛ bem; asaŋ amɛbaye odase akɛ amɛwiemɔ lɛ eba mli anɔkwaleŋ.”

¹⁰ Yehowa kɛɛ akɛ, “Israelbii, nyɛ ji midasefoi, mɛi ni miŋɔ akɛ mitsuji koni nyɛle mi ni nyɛhe mi nyɛye, ni nyɛnu shishi akɛ, mi, mi koome ji Nyɔŋmɔ. Mi, misɛɛ lɛ, Nyɔŋmɔ ko Nyɔŋmɔ ko bɛ; eko bako dã ni ekoeko baŋ hu.

¹¹ “Mi, mi nɔŋŋ mi ji Yehowa lɛ, ni misɛɛ lɛ yiwalaherelɔ ko bɛ dɔŋŋ.

¹² Mikɛɛ nɔ ni baaba mito, ni mibahere nyɛyiwala Maŋsɛɛ nyɔŋmɔ ko efeko nakai dã; nyɛ ji midasefoi.”

¹³ Yehowa kɛɛ, “Mi ji Nyɔŋmɔ, ni kɛjɛ kɛyaa nɛɛ fɛɛ lɛ mi ni. Mɔ ko bɛ ni aaanyɛ ashɔ̃ mɔ ko yɛ midɛŋ. Kɛji miifee nɔ ko lɛ, namɔ aaanyɛ naa atsi?”

Israel je Babilon dɛŋ

¹⁴ Bɔ ni Yehowa, nyɛ-Kpɔlɔ, Israel Mɔ Krɔŋkrɔŋ lɛ kɛɛ nɛ, “Nyɛ, nyɛhewɔ lɛ, mibatsu ta kɛya koni eyatua Babilon. Mibakumɔ amɛgboi lɛ fɛɛ mashwie shi, ni Babilonbii anyamɔ lɛ baatsɔ̃ awerɛhoo.

¹⁵ Mi ji Yehowa, nyɛMɔ Krɔŋkrɔŋ lɛ nyɛMaŋtsɛ, mɔ ni bɔ Israel lɛ.”

¹⁶ Bɔ ni Yehowa kɛɛ nɛ, “Be ko lɛ Yehowa gba gbɛ kɛtsɔ̃ ŋshɔ lɛ mli; egba tɛmpɔŋ kɛtsɔ̃ nu hamahama mli.

¹⁷ Ekpala ta kpele kɛtee hiɛkpãtãmɔ mli, tawuu shwiilii kɛ okpɔŋɔi babaoo. Amɛjwere shi, amɛnyɛŋ shi amɛte dɔŋŋ; amɛgboi tamɔ kane mli odonti.”

¹⁸ Shi Yehowa kɛɛ, “Nyɛjiea nyɛjwɛŋmɔ yɛ tsutsu saji lɛ anɔ, ni nyɛkahiɛa blema nibii lɛ amli.

¹⁹ Naa, mibafee nɔ ko hee ko. Amrɔ nɛɛ po epue. Aso nyɛnaaa lo? Mibaje gbɛ yɛ ŋa lɛ mli, ni mahã faa atue yɛ shiaŋa lɛ mli.

²⁰ Ŋaŋkooloi tete aaawo mihiɛ nyam, ŋaŋ gbei kɛ okpɔŋɔ loofɔji fɛɛ, ejaakɛ mahã nu aba ŋa lɛ nɔ; ni fai hu baatue yɛ shiaŋa lɛ nɔ, koni mimaŋ, mɛi ni mihala lɛ, ana nu amɛnu.

²¹ Koni mɛi ni mibɔ mihã mihe lɛ ajie miyi.”

Israel fee esha

²² Yehowa kɛɛ, “Israel, ojaaa mi! Israel, ogbaaa ohe naa yɛ mihe!

²³ Okɛ otoo lɛ ebahãaa mi koni akɛshã shãaafɔle; ni okɛ oshãa afɔlei lɛ wooo mihiɛ nyam. Mikɛ niyenii afɔle gbako onaa, ni mihãaa etɔ bo kɛ krɔbɔohamɔ.

²⁴ Okɛ oshika heee tsofakɛŋma obahãaa mi; ni okɛ okooloi amli fɔ lɛ ebashɛjeee mimii. Moŋ okɛ ohe eshai lɛ ehao mi, ni okɛ onishaianii lɛ eha etɔ mi.”

²⁵ “Kɛ̃lɛ mi, mi nɔŋŋ ji mɔ ni ŋɔɔ ohe eshai lɛ efaa, yɛ mi diɛŋtsɛ mihewɔ, ni mikaiŋ ohe eshai lɛ dɔŋŋ.

²⁶ Kaimɔ mi. Ha ni wɔkojo. Jajemɔ osane lɛ akɛ aaabu bo bem lo!

²⁷ Oklɛŋklɛŋ tsɛ fee esha, ni mɛi ni damɔɔ mli hãa bo lɛ tɔ̃ minɔ.

²⁸ No hewɔ lɛ, mibule He Krɔŋkrɔŋ lɛ mli lumɛi lɛ. Mikɛ Israel hã ni akpãtã ehiɛ, Israel he guɔ gbo.”