Yesaia 42 - ŊMALƐ KRƆŊKRƆŊ LƐ

Nuŋtsɔ lɛ Tsulɔ lɛ

¹ Yehowa kɛɛ akɛ, “Naa mitsulɔ, mɔ ni mihiɛ emli, mɔ ni miŋɔ lɛ, ni minaa ehe tsuijurɔ lɛ. Mihã eyi obɔ̃ kɛ mimumɔ lɛ, Ebaahã majimaji lɛ ale nɔ ni ji jalɛ saneyeli.

² Ebolɔŋ, ni ewoŋ egbee nɔ, ni ehaŋ anu egbee yɛ blohuiaŋ.

³ Glã ni edɔ lɛ, ekuŋ, ni kane ni tsoɔ sulii lɛ, egbeŋ; eeejie jalɛ kpo anɔkwayeli mli.

⁴ Enitsumɔ naa baŋ shi, ni enijiaŋ ejeŋ wui kɛyaashi beyinɔ ni eeehã jalɛ saneyeli amã shi yɛ shikpɔŋ lɛ nɔ. Ŋshɔnaa maji lɛ miikwɛ emla gbɛ.”

⁵ Bɔ ni Nyɔŋmɔ mɔ ni ji Yehowa lɛ, mɔ ni bɔ ŋwɛi, ni ekpã mli, mɔ ni bɔ shikpɔŋ elɛɛ shi, kɛ nɔ fɛɛ nɔ ni yɔɔ nɔ, mɔ ni hãa mɛi ni yɔɔ shikpɔŋ lɛ nɔ mumɔ, kɛ mɛi ni nyiɛ nɔ lɛ wala lɛ kɛɛ nɛ,

⁶ “Mi ji Yehowa; mi mitsɛ bo yɛ jalɛ naa. Mimɔ onine mli, ni mibaa oyi; miŋɔ bo mifee kpãŋmɔ mihã maŋ lɛ kɛ la hã majimaji lɛ,

⁷ koni ogbele shwilafoi ahiŋmɛii, ni ojie gboklɛfoi yɛ gboklɛfoi atsuŋ; koni ojie gboklɛfoi ni tara kpabuŋ duŋ mli lɛ.

⁸ “Mi, mi ji Yehowa, migbɛi ji no; mikɛ minunyam haŋ mɔ kroko, ni mikɛ miyijiemɔ haŋ amãgãi.

⁹ Naa, tsuutsunii ni migba lɛ eba mli; agbɛnɛ nii hee mikɛɔ nyɛ nɛɛ; miikɛɛ nyɛ dani eba mli.”

Yijiemɔ Lala

¹⁰ Nyɛlaa lala hee nyɛhãa Yehowa; nyɛlaa nyɛkɛjiea eyi kɛjɛ shikpɔŋ lɛ naagbeehei lɛ! Nyɛjiea eyi, nyɛ mɛi ni nyɛnyiɛɔ ŋshɔ hiɛ; nyɛjiea eyi, nyɛ ŋshɔ mli bɔɔnii fɛɛ! Nyɛlaa, nyɛ ŋshɔ naa shikpɔji, ni nyɛ mɛi ni nyɛyɔɔ ŋshɔ naa shikpɔji lɛ anɔ hu, nyɛjiea eyi!

¹¹ Nyɛhãa shiaŋa lɛ kɛ enɔ maji lɛ ahole amɛgbei anɔ; nyɛhãa mɛi ni yɔɔ Kedar akrowai lɛ ajiea eyi! Nyɛhãa mɛi ni yɔɔ Sela maŋ wulu lɛ mli lɛ alaa nyamɔ lala; nyɛhãa amɛbɔa oshe kɛjɛ gɔji lɛ ayiteiaŋ.

¹² Nyɛhãa amɛwoa Yehowa hiɛ nyam, ni amɛ jie eyi yɛ ŋshɔnaa maji lɛ amli.

¹³ Yehowa efã tamɔ tabilɔ; etee emlifu shi tamɔ kãkãlɔ. Eebo waa; eebɔ oshe! Eetsɔ̃ɔ ehenyɛlɔi lɛ ehewalɛ.

Nyɔŋmɔ wo shi akɛ ebaaye ebua ewebii

¹⁴ Mimua minaa be kplaŋŋ nɛ, mifee dioo; migbe mitsui. Shi agbɛnɛ mibabolɔ tamɔ yoo ni miikɔmɔ; mamu kɛ tsuisuu, mimumɔ shiŋ shi.

¹⁵ Makpãtã gɔji kɛ gɔŋkpɔi ahiɛ, ni mahã amɛnɔ jwɛi fɛɛ agbi, mahã fai atsɔ̃mɔ faakpɔi, ni mahã kpaakpoi hu amii.

¹⁶ Ni makpala shwilafoi kɛtsɔ̃ tɛmpɔŋi ni amɛtsɔ̃ko nɔ dã nɔ; mabu amɛhe kɛtsɔ̃ nanegbɛ ni aleee nɔ. Mahã amɛhiɛ duŋ lɛ atsɔ̃ la, ni hei ni yɔɔ dokoidokoi lɛ afee trɛnɛɛ. Nii nɛɛ mafee mahã amɛ, ni mikwaŋ amɛ.

¹⁷ Shi mɛi fɛɛ ni kɛ amɛhiɛ fɔɔ amãgãi anɔ, ni amɛkɛɔ amãgãi ni ashwie lɛ akɛ, “Nyɛ ji wɔnyɔŋmɔi lɛ,” aaashwie amɛ kɛku amɛsɛɛ, ni amɛhiɛ aaagboi.

Israel nyɛɛɛ nii ekase

¹⁸ Yehowa kɛɛ akɛ, “Nyɛ toimulɔi, nyɛboa toi! Ni nyɛ shwilafoi, nyɛwoa nyɛhiɛ nɔ koni nyɛna nii!

¹⁹ Namɔ eshwila tamɔ mitsulɔ lɛ, ni namɔ emu toi tamɔ Yehowa bɔfo lɛ? Namɔ eshwila tamɔ mɔ ni ajɔɔ enɔ ahã mi lɛ? Namɔ eshwila tamɔ Yehowa tsulɔ lɛ?

²⁰ Israel, ona nibii babaoo, shi otɛ̃jeee ohiɛ okwɛɛɛ amɛ. Otoii anaa kã nɛ, shi onuuu nii.”

²¹ Esa Yehowa hiɛ, yɛ ejalɛ lɛ hewɔ akɛ egbala mla lɛ mli koni ehã mla lɛ hiɛ aba nyam.

²² Shi emaŋbii lɛ aju amɛ, ni aha amɛ, ni amɔmɔ amɛ awo bui amli, ni aŋɔ amɛ atee gboklɛfoi atsuiaŋ; amɔmɔ amɛ ni jielɔ ko bɛ he ko ni mɔ ko hu bɛ ni kɛɔ akɛ, “Akɛ amɛnii ni aha lɛ ahã amɛ”.

²³ Nyɛteŋ namɔ baabo enɛ toi, namɔ eka etoi koni enu nii ni baaba lɛ?

²⁴ Namɔ ŋɔ Israel ehã nihalɔ lɛ; ni namɔ ŋɔ Yakob ehã ojotswalɔi lɛ? Ani jeee Yehowa? Mɔ ni wɔfee esha wɔshi lɛ, mɔ ni wɔkpɛ̃lɛɛɛ egbɛi lɛ anɔ nyiɛmɔ, ni wɔbooo emla lɛ toi lɛ ni?

²⁵ No hewɔ lɛ, efɔse emlifu ni naa wa lɛ eshwie wɔnɔ, ni ehã wɔna ta joomɔ. Eshɛre la ewo wɔhe kpula, shi wɔnuuu shishi, eshã wɔ, shi no gbaaa wɔnaa.