Yesaia 41 - ŊMALƐ KRƆŊKRƆŊ LƐ

Nyɔŋmɔ hã Israel hiɛnɔkãmɔ

¹ Nyɔŋmɔ kɛɛ: “Ao nyɛ ŋshɔnaa maji ni yɔɔ shɔŋŋ, nyɛfea diŋŋ, nyɛboa mi toi! Majimaji anɔ bii ana hewalɛ hee! Hã amɛtsi amɛbɛŋkɛ koni amɛwie amɛsane lɛ. Nyɛhãa wɔ fɛɛ wɔkpea koni wɔkojoa!

² Namɔ ji mɔ ni tee mɔ ko shi kɛjɛ bokãgbɛ, mɔ ni yeɔ kunim yɛ he fɛɛ he ni eyaa lɛ? Namɔ hãa eyeɔ maŋtsɛmɛi kɛ majimaji anɔ lɛ? Ekɛ eklante lɛ hãa amɛtsɔ̃ɔ tamɔ mlu, ni egãi lɛ gbɛɔ amɛ eshwãa tamɔ tutuu yɛ kɔɔyɔɔ hiɛ.

³ Enyiɛɔ amɛsɛɛ, ni ehoɔ amɛhe shweshweeshwe ni enane esaaa shikpɔŋ tete.

⁴ Namɔ tsu enɛ, ni namɔ fee enɛ? Namɔ tsɛɔ yinɔbii kɛjɛɔ jeŋ shishitoohe tɔ̃ɔ? Mi, Yehowa, mi ji klɛŋklɛŋ mɔ; ni mi, Yehowa, mi kɛ naagbee mɔ aaafee naagbelɔ.

⁵ Ŋshɔnaa maji lɛ ena, ni amɛmiishe gbeyei! Shikpɔŋ lɛ naagbeehei lɛ miikpokpo! Amɛtsi amɛbɛŋkɛ, ni amɛba.

⁶ Mɔ fɛɛ mɔ miiye miibua enaanyo. Amɛmiikɛɛkɛɛ amɛhe akɛ, ‘Na tsui.’

⁷ Kapintafonyo woɔ shikaŋaalɔ ekãa, ni mɔ ni kɛ hamle jajeɔ nii ahiɛ lɛ hu feɔ mɔ ni tswiaa nii yɛ sɔ̃ŋmɛtɛ nɔ nakai nɔŋŋ. Ekɛɔ yɛ nii ni asɔ̃ɔ lɛ he akɛ ‘Ehi!’ Ni amɛkalaa mli plɛkoo koni ekakpɔ!

⁸ Shi bo Israel, mitsulɔ Yakob, mishieŋtsɛ Abraham shwie, ni miŋɔ bo;

⁹ bo ni miŋɔ bo kɛjɛ shikpɔŋ lɛ naagbeehei kɛba, bo ni mitsɛ bo kɛjɛ shikpɔŋ lɛ koji shɔŋŋ, ni mikɛɛ bo akɛ, ‘Mitsulɔ ji bo, miŋɔ bo; ni mishɛŋ bo mifɔŋ.’

¹⁰ Kaashe gbeyei, shi mi mi kɛ bo yɔɔ; kaakwɛkwɛɛ ohe ejaakɛ mi ji oNyɔŋmɔ lɛ!” Mibawaje bo, mibaye mabua bo; mibahiɛ omli kɛ mikunimyeli ninejurɔ lɛ!

¹¹ “Naa, mɛi fɛɛ ni mli efu bo lɛ, ahiɛ aaagboi, ni amɛhiɛ aaashwie shi! Mɛi ni kɛ bo tswaa lɛ, aaafee shwɛm, ni amɛhiɛ aaakpãtã.

¹² Obaatao mɛi ni kɛ bo ena lɛ, shi onaŋ amɛ; mɛi ni kɛ bo wuɔ lɛ aaafee shwɛm.

¹³ Ejaakɛ mi, Yehowa, oNyɔŋmɔ lɛ, mihiɛ oninejurɔ mli. Mi, mikɛɔ bo akɛ, ‘Kaashe gbeyei, mibaye mabua bo lɛ.’ ”

¹⁴ Yehowa kɛɛ, “Kaashe gbeyei, bo gɔgɔmi Yakob! Kaashe gbeyei, bo Israel, gɔgɔmi bibioo! Miikɛɛ bo akɛ maye mabua bo! Okpɔlɔ lɛ ji Israel Mɔ Krɔŋkrɔŋ lɛ.

¹⁵ Naa, mibafee bo gbɛlɛmɔ tsɔne kɛ enyanyɔji hei ni naa ba; ni obaagbɛlɛ gɔji lɛ, ni oooshimɔ amɛ muɛmuɛ, ooohã gɔŋkpɔi lɛ atsɔ̃ tamɔ tutuu.

¹⁶ Ooosha amɛmli ni kɔɔyɔɔ aaaloo amɛ kɛaatee, ni ahum aaagbɛ amɛ ashwã. Shi bo lɛ, omii aaashɛ ohe yɛ Yehowa hewɔ, ni oooshwã ofɔ̃ Israel Mɔ Krɔŋkrɔŋ lɛ nɔ.”

¹⁷ “Kɛji ohiafoi kɛ mɛi ni efi amɛ ye nu he kumai, shi nu bɛ, ni amɛlilɛii anɔ gbi kɛ kumai lɛ, Mi, Yehowa, mibabo amɛ toi, kɛji amɛtsɛ mi. Mi, Israel Nyɔŋmɔ lɛ, mikwaŋ amɛ.

¹⁸ Mibahã fai aho yɛ gɔŋ kpataai anɔ, ni nuhiŋmɛii baatsɛ̃rɛ yɛ nujɔi lɛ amli, Mahã kpaakpo abua shi yɛ shiaŋa lɛ mli, ni nu baaho yɛ shikpɔŋ gbiŋ nɔ.

¹⁹ Mahã tsenedru kɛ yɔɔyi kɛ mirtotsei kɛ mu tso akwɛ̃ yɛ shiaŋa nɔ. Mibatɛo sɛsɛo kɛ papao kɛ wawa koni amɛtsɔ̃ koo yɛ shiaŋa nɔ.

²⁰ Ni mɛi baana, ni amɛaasusu he, ni amɛaanu shishi, ni amɛaale akɛ Yehowa ninenaa nitsumɔ ni, Israel Mɔ Krɔŋkrɔŋ lɛ ji mɔ ni fee.”

Yehowa tswa amale nyɔŋmɔi lɛ mpoa

²¹ Yehowa kɛɛ akɛ, “Nyɛkɛ nyɛsane lɛ abaa, nyɛ jemawɔji!” Yakob Maŋtsɛ lɛ kɛɛ, “Nyɛkɛ nyɛklamɔ nibii lɛ abaa

²² koni amɛgba nɔ ni baaba amɛtsɔ̃ɔ wɔ. Nyɛtsɔ̃a wɔ blema nibii lɛ, nɔ ni amɛ ji, koni wɔsusu he, koni wɔle nɔ ni baajɛ mli aba, aloo nyɛ diɛŋtsɛ nyɛgbaa wɔ nibii ni baaba lɛ.

²³ Nyɛtsɔ̃a wɔ wɔsɛɛ nibii ni baaba koni wɔkɛna wɔle akɛ nyɔŋmɔi ji nyɛ. Nyɛfea nɔ kpakpa loo nɔ fɔŋ ko koni wɔtsui afã ni wɔshe gbeyei.

²⁴ Naa, nyɛjeee nɔ ko nɔ ko ni nyɛnitsumɔ lɛ hu jeee fɛifɛi. Mɔ ni jaa nyɛ lɛ, musubɔlɔ ni.

²⁵ “Mitee mɔ ko shi kɛjɛ kooyigbɛ, ni eeba; eeeja mi kɛjɛ hulu shitee mli, ni eeenaa nɔyelɔi anɔ tamɔ gbɛshɔ̃lɔ naa su.

²⁶ Namɔ gba kɛjɛ shishijee mli koni wɔle? Ni namɔ tsɔ̃ hiɛ egba dani eba mli, koni wɔkɛɛ akɛ, ‘Ewiemɔ lɛ ja.’ Mɔ ko mɔ ko bɛ ni lɛ ekɛɛ; mɔ ko kwraa ejajeko nɔ ko; mɔ ko mɔ ko bɛ ni nuɔ nyɛwiemɔ lɛ.

²⁷ Mi tsuutsu mikɛɛ Zion akɛ, “Mitsu bɔfo kɛ sane kɛ ŋɔɔmɔ kɛtee Yerusalɛm akɛ ebii miiba.

²⁸ Shi be ni mikwɛ lɛ, mɔ ko mɔ ko bɛ, ŋaawolɔ ko bɛ mɛnɛɛmɛi ateŋ mɔ ni kɛji mibi lɛ sane ko ni eeehã mi hetoo.

²⁹ Naa, nyɔŋmɔi nɛɛ fɛɛ lɛ, lakamɔnii ni; amɛnitsumɔi lɛ hu jeee fɛifɛi, ni amɛmãgãi lɛ hu kɔɔyɔɔ folo ni.”