Yesaia 40 - ŊMALƐ KRƆŊKRƆŊ LƐ

Hiɛnɔkãmɔ Wiemɔi

¹ “Nyɛshɛjea, nyɛshɛjea mimaŋ lɛ mii!” WɔNyɔŋmɔ lɛ kɛɛ.

² “Nyɛkɛ Yerusalɛmbii awiea tsuijurɔ naa; ni nyɛkɛa Yerusalɛmbii akɛ amɛtawuu be lɛ sɛɛ efo, ni akɛ amɛnishaianii lɛ efa. Eshai ni amɛfee lɛ amɛna he nyɔmɔwoo toi enyɔ kɛjɛ Yehowa dɛŋ.”

³ Gbee ko miibo akɛ, “Nyɛsaa gbɛ yɛ ŋa lɛ nɔ nyɛhãa Yehowa; nyɛjajea gbɛjegbɛ yɛ ŋa lɛ nɔ nyɛhãa wɔNyɔŋmɔ lɛ.

⁴ Awó jɔɔ fɛɛ jɔɔ nɔ, ni aba gɔŋ fɛɛ gɔŋ shi; Ahã hei ni yɔɔ dokoidokoi lɛ afee trɛnɛɛ, ni hei ni yɔɔ gɔjigɔji lɛ afee kplanaa.

⁵ Kɛkɛ lɛ abaajie Yehowa anunyam kpo, ni gbɔmɛi adesai fɛɛ baana, ejaakɛ enɛ jɛ Yehowa diɛŋtsɛ naa.”

⁶ Gbee ko miibo akɛ, “bolɔmɔ!” Ni mikɛɛ, “Te mibolɔ mikɛɛ tɛŋŋ?” “Bolɔmɔ akɛ heloo fɛɛ heloo lɛ jwɛi ni; ni ehoɔ eyaa tamɔ ŋa nɔ fɔfɔi.

⁷ Jwɛi gbiɔ, ni fɔfɔi hu kpalaa kɛji Yehowa hã kɔɔyɔɔ tswa kɛtsɔ̃ nɔ. Eji anɔkwale akɛ gbɔmɛi fɛɛ lɛ jwɛi ni.

⁸ Jwɛi gbiɔ, ni fɔfɔi hu kpalaa shi wɔNyɔŋmɔ lɛ wiemɔ lɛ aaahi shi kɛaatee naanɔ.”

⁹ Ao Zion, miishɛɛ saneshiɛlɔ, kwɔɔ kɛya gɔŋ ni kwɔ ko nɔ. Yerusalɛm, miishɛɛ saneshiɛlɔ, wo ogbee nɔ kɛ hewalɛ, wo nɔ, kaashe gbeyei! Kɛɛmɔ Yuda maji lɛ akɛ “Naa, nyɛNyɔŋmɔ lɛ miiba!”

¹⁰ Naa, Nuŋtsɔ nyɛNyɔŋmɔ lɛ miibaa kɛ hewalɛ, ni eeeye nɔ kɛ nineshiwalɛ. Mɛi fɛɛ ni ehere amɛyiwala lɛ nyiɛ ehiɛ kɛmiiba.

¹¹ Eeelɛ etooku lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ; Eeeloo amɛ eshãkã etsitsiŋ ni eeekpala toonyɛmɛi lɛ blɛoo.

Israel Nyɔŋmɔ lɛ saso bɛ

¹² Namɔ kɛ edɛ̃ kɔkɔ esusu ŋshɔ falɛ pɛŋ; ni ekɛ edɛ̃lɛɛmɔ esusu ŋwɛi dã? Namɔ kɛ nikaakpolu eka shikpɔŋ su pɛŋ, ni eŋmɛ gɔji lɛ kɛ ŋmeŋmei lɛ yɛ nsɛni mli dã?

¹³ Namɔ etsɔ̃ɔ Yehowa Mumɔ lɛ bɔ ni efee dã, loo namɔ etsɔ̃ eŋaawolɔ ni etsɔ̃ɔ lɛ nii dã?

¹⁴ Namɔ Yehowa kɛtoɔ ajina bɔ ni afee ni etsɔ̃ɔ lɛ nii, ni namɔ tsɔ̃ɔ lɛ jalɛ saneyeli? Namɔ etsɔ̃ɔ lɛ nilee pɛŋ; namɔ etsɔ̃ɔ lɛ sanesɛɛkɔmɔ dã?

¹⁵ Naa, majimaji lɛ tete tamɔ nu kɔi kome yɛ goga mli ha Yehowa, ebuɔ amɛ tamɔ nsɛni he mlu. Ŋshɔkpɔi lɛ tamɔ mlu kulibii yɛ ehiɛ.

¹⁶ Lebanon kooloi lɛ afalɛ lɛ efaaa ha shãa afɔle, ni emli tsei shɛɛɛ lai ni akɛshãa afɔle.

¹⁷ Majimaji lɛ fɛɛ jeee nɔ ko nɔ ko, yɛ ehiɛ, ni ebuɔ amɛ akɛ yakanii, ni amɛjeee fɛifɛi hu yɛ ehiɛ.

¹⁸ Belɛ namɔ nyɛkɛaato Nyɔŋmɔ he, ni mɛni yɔɔ su ni tamɔ esu?

¹⁹ Amãgã? No lɛ ŋaalɔ ni shwieɔ, ni shikaŋaalɔ kɛ shika haa he; ni esɔ̃ɔ jwiɛtɛi kɔsɔŋkɔsɔi ewoɔ lɛ.

²⁰ Mɔ ni bɛ jwiɛtɛi loo shika lɛ, eŋɔɔ tso ni wa, ni etaoɔ ŋaalɔ ni he esa, ni egbɔɔ amãgã ni nyɛɛɛ ehe etsi.

²¹ Ani nyɛleee? Ani nyɛnuko dã? Ani agbako nyɛ je lɛ shishijee sane? Ani nyɛnuko bɔ ni ato eshishi ahã?

²² Mɔ ni ta emaŋtsɛ sɛi lɛ nɔ yɛ je lɛ yiteŋ, yɛ ŋwɛi shɔŋŋ lɛ ni enaa je lɛ mli gbɔmɛi tamɔ agãi pɛ lɛ, lɛ efee, mɔ ni kpa ŋwɛi mli eha shi tamɔ muhɔɔ, ni elɛɛ ŋwɛi mli tamɔ buu ni ahiɔ mli lɛ.

²³ Lɛ ehãa lumɛi feɔ shwɛm, ni shikpɔŋ lɛ nɔ nɔyelɔi lɛ tsɔ̃ɔ yaka nɔ ko.

²⁴ Amrɔ pɛ ni aaatɛo amɛ, amrɔ pɛ ni aaadu amɛ, amrɔ pɛ ni amɛaatsɛ̃ fã yɛ su mli lɛ, Yehowa tswaa kɔɔyɔɔ kɛtsɔ̃ɔ amɛnɔ, ni amɛŋalaa, ni ahum loɔ amɛ kɛyaa tamɔ tutuu.

²⁵ Namɔ nyɛkɛaato mi mihe, ni ekɛ mi aaaye egbɔ? Mɔ Krɔŋkrɔŋ lɛ kɛɛ.

²⁶ Nyɛwoa nyɛhiɛ nɔ kɛyaa ŋwɛi ni nyɛkwɛa! Namɔ bɔ ŋulamii nɛɛ? Lɛ mɔ ni ejieɔ amɛsafoi lɛ kpo, ni ekaneɔ amɛyibɔ, ni ewoɔ amɛ fɛɛ gbɛi lɛ, lɛ ji mɔ ni fee. Ehewalɛ kpele kɛ enyɛmɔ naa lɛ, amɛteŋ ekome folo nɛkɛ elaajeee.

²⁷ Ao Israel, mɛɛba okɛɔ akɛ, “Yehowa leee mihaomɔi, ni miNyɔŋmɔ lɛ kwɛɛɛ koni aye mi jalɛ sane” lɛ?

²⁸ Ani oleee? Ani onuko dã Yehowa ji naanɔ Nyɔŋmɔ lɛ, jeŋ tso muu lɛ fɛɛ bɔlɔ lɛ. Etɔɔɔ lɛ, ni egbɔjɔɔɔ hu, ni aleee ejwɛŋmɔ mlikwɔlɛ.

²⁹ Ehãa mɔ ni egbɔjɔ naa hewalɛ, ni mɔ ni bɛ nyɛmɔ lɛ, ehãa lɛ nyɛmɔ ni mli wa.

³⁰ Oblahii bibii aaagbɔjɔ, ni eeetɔ amɛ; ni oblahii ni edara saŋŋ tete aaagbeegbee shi, ni amɛaafee bliboo.

³¹ Shi mɛi ni hiɛ kã Yehowa nɔ lɛ, amɛaana hewalɛ hee: amɛaafliki tamɔ okropɔŋ amɛaajo foi, ni etɔŋ amɛ amɛaanyiɛ hu, ni amɛgbɔjɔŋ.