Yesaia 39 - ŊMALƐ KRƆŊKRƆŊ LƐ

Tsuji ni jɛ Babilon lɛ

¹ Nakai be lɛ mli lɛ, Babilon maŋtsɛ, Merodak-Baladan, Baladan bi lɛ, tsu tsuji koni amɛkɛ woji ni eŋmala kɛ nikeenii baha Hezekia, ejaakɛ enu akɛ Maŋtsɛ Hezekia he eye, ni ehe ewa lɛ.

² Hezekia here tsuji lɛ atuu, ni eŋɔ amɛ kɛtee shĩa ni etoɔ ejwetri yɛ mli lɛ mli, ni ekɛ jɛi nii yatsɔ̃ɔ amɛ: jwiɛtɛi kɛ shika kɛ tsofaikɛŋmai kɛ mu ni jara wa kɛ etawuunii fɛɛ. Nɔ fɛɛ nɔ ni yɔɔ enitoohei lɛ ekɛtsɔ̃ɔ amɛ. Nɔ ko nɔ ko bɛ enitoohei loo enɔyelihe lɛ mli ni ekɛtsɔ̃ɔɔ amɛ.

³ Kɛkɛ ni Gbalɔ Yesaia ba Maŋtsɛ Hezekia ŋɔɔ, ni ebabi lɛ akɛ, “Nɛgbɛ nɛkɛ gbɔmɛi nɛɛ jɛ ba oŋɔɔ nɛɛ, ni mɛɛ amaniɛ amɛkɛba?” Hezekia here lɛ nɔ akɛ, “Shɔŋŋ he ko amɛjɛ amɛba miŋɔɔ nɛɛ; amɛjɛ Babilon.”

⁴ Yesaia tee nɔ ekɛɛ, “Mɛni amɛna yɛ owe lɛ?” Hezekia ha hetoo akɛ, “Amɛna nibii fɛɛ ni yɔɔ miwe lɛ mli; nɔ ko nɔ ko kwraa bɛ minitoohei lɛ amli ni mikɛtsɔ̃ɔɔ amɛ.”

⁵ Kɛkɛ ni Yesaia kɛɛ Hezekia akɛ, “Bo nɔ ni Yehowa, Taiatsɛ lɛ, kɛɔ toi,

⁶ ‘Naa gbii miiba, ni abaaloo nibii fɛɛ ni yɔɔ owe lɛ mli kɛ nii ni otsɛmɛi lɛ ebua naa eto kɛbashi ŋmɛnɛ gbi nɛɛ nɔ lɛ kɛaatee Babilon bɔ ni ashiŋ nɔ ko nɔ ko, Yehowa kɛɛ.

⁷ Asaŋ aaaŋɔ bo diɛŋtsɛ obii ni ooofɔ lɛ ateŋ ekomɛi kɛaatee, ni amɛaatsɔmɔ piafoi yɛ Babilon maŋtsɛ we lɛ mli.”

⁸ Hezekia to he ha Yesaia ekɛɛ, “Yehowa naa wiemɔ ni owie nɛɛ hi,” ejaakɛ esusu akɛ elumɔyeli be lɛ baafee shweshweeshwe kɛ toiŋjɔlɛ.