Yesaia 35 - ŊMALƐ KRƆŊKRƆŊ LƐ

Krɔŋkrɔŋfeemɔ gbɛ

¹ Shiaŋa lɛ kɛ shikpɔŋ gbiŋ lɛ aaanya, shiaŋa lɛ mii aaashɛ ehe ni eeegba afofro tamɔ fɔfɔi.

² Shiaŋa lɛ aaagba afofro babaoo, ni emli aaafli lɛ, ni eeenya kɛ lala. Aaaŋɔ Lebanon anunyam lɛ ahã lɛ, kɛ Karmel kɛ Sharon wulamɔ lɛ hu. Mɔ fɛɛ mɔ aaana Yehowa anunyam lɛ, kɛ wɔNyɔŋmɔ lɛ agbojee lɛ.

³ Nyɛwajea mɛi ni anijiaŋ eje wui lɛ, kɛ mɛi ni anakutseiaŋ egbɔjɔ lɛ.

⁴ Nyɛkɛa mɛi ni tsui fãa lɛ akɛ, “Nyɛfea ekãa, nyɛkashea gbeyei! Naa nyɛNyɔŋmɔ lɛ baaba koni ebatɔ nyɛhe owele. Ebaaba koni ebahere nyɛyiwala.”

⁵ Kɛkɛ lɛ aaagbele shwilafoi ahiŋmɛii, ni aaagbele toimulɔi hu atoii;

⁶ obubuafoi aaatumɔ tamɔ ofrote, ni mumuii baala kɛ nyamɔ; ejaakɛ nu aaatue, ni eeeho tamɔ faa yɛ shiaŋa lɛ mli.

⁷ Shiaŋa ni enɔ edɔ lɛ aaatsɔ̃ kpaakpo, ni shikpɔŋ ni nu bɛ nɔ lɛ baayi obɔ̃ kɛ nuhiŋmɛii. Ŋaŋgbei ashibumɔhei lɛ baatsɔmɔ hei ni nu tara, ni glã kɛ ntoo aaakwɛ̃ yɛ jɛi.

⁸ Gbɛjegbɛ aaakã jɛi, ni aaatsɛ gbɛ lɛ, “Gbɛ Krɔŋkrɔŋ.” Mɔ ko ni he tseee enyiɛŋ nɔ, ni kwashiai tete eduŋ gbɛ yɛ nɔ.

⁹ Jata ko jata ko ehiŋ jɛi; kooloo kakawua ko kwraa tsɔŋ jɛi kɛhoŋ, akɛ ja mɛi ni Yehowa ehere amɛyiwala lɛ kɛkɛ.

¹⁰ Mɛi ni Yehowa ehere amɛ lɛ, aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala. Amɛmii aaashɛ kɛya naanɔ; amɛaayi kɛ miishɛɛ kɛ nyamɔ, amɛyeŋ ŋkɔmɔ, ni amɛdɔmɔŋ ŋtsɔi dɔŋŋ.