Yesaia 32 - ŊMALƐ KRƆŊKRƆŊ LƐ

Maŋtsɛ Anɔkwafo lɛ

¹ Naa, maŋtsɛ ko baaba ebaye nɔ; ebaaye jalɛ sane; ni lumɛi hu baaba abaye jalɛ sane.

² Amɛteŋ mɔ fɛɛ mɔ baatsɔ̃ tamɔ teemɔhe be mli ni kɔɔyɔɔ miitswa, loo abobaahe be mli ni ahum miitswa; eeetsɔ̃ tamɔ faa yɛ shiaŋa nɔ, loo tamɔ tɛsaa kpele hɔ̃ɔŋ yɛ shikpɔŋ gbiŋ nɔ.

³ Amɛteŋ mɛi ni hiŋmɛi nɔ tse baana nɔ fɛɛ nɔ faŋŋ, ni mɛi hu ni toiiaŋ tse baabo nɔ fɛɛ nɔ toi jogbaŋŋ.

⁴ Mɛi ni kulɛ amɛtsuii yɔɔ floflo lɛ aaakase nilee kpakpa, ni mumɔhalɔi awiemɔ mli aaatse pɛpɛɛpɛ, ni amɛlilɛii tɛrɛŋ shi dɔŋŋ.

⁵ Atsɛŋ kwashia akɛ ablade dɔŋŋ ni shishiulɔ hu abuŋ lɛ oje dɔŋŋ.

⁶ Kwashia wieɔ kwashiai awiemɔ, ni nishaianii ahe ejwɛŋɔ, ni enifeemɔ etsɔ̃ɔɔ Nyɔŋmɔ gbeyeishemɔ; ewieɔ eshiɔ Yehowa. Ehãaa mɔ ni hɔmɔ miiye lɛ niyenii, ni egbeɔ mɔ ni kumai miiye lɛ kumai.

⁷ Shishiulɔ nifeemɔ lɛ nɔ fɔŋ ni; etoɔ efɔŋfeemɔ he ŋaa koni ekɛ amale wiemɔi akpãtã ohiafo hiɛ kɛji ohiafo sane ja tete po lɛ.

⁸ Shi mɔ ni ji ablade lɛ, efeɔ abladei anii, ni efãa nɔ kpakpa he hu.

Toigbalamɔ kɛ Shweremɔ ekoŋŋ

⁹ Nyɛ yei ni nyɛhe ejɔ nyɛ, nyɛtea shi, nyɛboa mi toi! Nyɛ biyei hu ni nyɛyitsei kãmɔ̃ nyɛyisɛɛ, nyɛfea toi nyɛhãa miwiemɔ lɛ!

¹⁰ Nyɛ yei ni nyɛyitsei kãmɔ nyɛyisɛɛ, biɛ afi kɛ nɔ ko fioo mli lɛ, nyɛhe aaakpokpo, ejaakɛ wainyibii aaakpala, ni eko baŋ dɔŋŋ ni aaana atse.

¹¹ Nyɛ yei ni nyɛhe ejɔ nyɛ, nyɛhe akpokpoa! Nyɛ mɛi ni nyɛyitsei kãmɔ nyɛyisɛɛ, nyɛhe akpokpoa! Nyɛkpɔlɔa nyɛtadei koni nyɛnyiɛ yayai koni nyɛkɔlɔa kpekpe nyɛŋmɔlɔ nyɛhɛ.

¹² Nyɛyia nyɛtsitsi nɔ ma yɛ ŋmɔji ni yɔɔ fɛo kɛ waintsei ni woɔ yibii pii lɛ ahewɔ;

¹³ yɛ ŋmei kɛ kpitikpiti ni aaakwɛ̃ yɛ mimaŋbii lɛ ashikpɔŋ lɛ nɔ lɛ hewɔ. Hɛɛ! Yɛ shĩai ni eyimɔ kɛ miishɛɛ kɛ maji ni miishɛɛ yɔɔ mli lɛ lɛ ahewɔ.

¹⁴ Ejaakɛ aaajo foi ashi mɔɔ, ni aaashi maŋ ni emli eyi kɛ gbɔmɛi lɛ afɔ̃ shi. Gɔŋkpɔ kɛ buumɔ̃ɔ lɛ aaatsɔ̃ kooloi abui kɛ ŋaŋ tejii amiishɛɛnamɔhe kɛ toi hu aniyelihe kɛaatee naanɔ.

¹⁵ Be miiba ni Nyɔŋmɔ aaafɔse Mumɔ lɛ kɛaajɛ ŋwɛi eshwie wɔnɔ, ni shiaŋa lɛ aaatsɔ̃ shikpɔŋ ni baa nii, ni shikpɔŋ ni baa nii aaatsɔ̃ koo.

¹⁶ Kɛkɛ lɛ abaaye jalɛ sane yɛ shiaŋa lɛ nɔ, ni abaafee nɔ ni ja yɛ shikpɔŋ ni baa nii lɛ nɔ.

¹⁷ Jalɛ saneyeli lɛ hesɛɛnamɔ baafee toiŋjɔlɛ kɛ hejɔlɛ shihilɛ kɛ nyɛmi hemɔkɛyeli.

¹⁸ Mimaŋbii ashihilɛhei baayi kɛ toiŋjɔlɛ, amɛaahi shi shweshweeshwe kɛ kpoo.

¹⁹ Nyɔŋmɔŋtɛ aaanɛ koo lɛ nɔ, ni ebaatsɔ̃ lakpatsa, ni aaafite maŋ lɛ kwrakwra.

²⁰ Ajɔɔ nyɛ mɛi ni nyɛduduu nii yɛ fai fɛɛ atoii, ni nyɛŋmɛɛ tsina kɛ teji he koni amɛyanyiɛ hei ni amɛsumɔɔ lɛ.