Yesaia 31 - ŊMALƐ KRƆŊKRƆŊ LƐ

Nyɔŋmɔ baabu Yerusalɛm he

¹ Kpoo hã mɛi ni yaa Ijipt amɛyataoɔ yelikɛbuamɔ ni amɛkɛ amɛhiɛ fɔ̃ɔ okpɔŋɔi anɔ, mɛi ni kɛ amɛhiɛ fɔ̃ɔ tayaa shwiilii anɔ ejaakɛ amɛfa, kɛ okpɔŋɔnɔtalɔi hu anɔ, ejaakɛ amɛhe wa naakpa, shi amɛkɛ amɛhiɛ efɔ̃ɔɔ Israel Mɔ Krɔŋkrɔŋ lɛ moŋ nɔ, loo amɛbiii Nuŋtsɔ lɛ dɛŋ yelikɛbuamɔ po!

² Tsɛbelɛ, lɛ ji nilelɔ, ni ehãa efɔŋ baa, ni ekpaleee enaa, shi eteɔ shi ewoɔ efɔŋfeelɔi kɛ mɛi ni yeɔ buaa efɔŋfeelɔi.

³ Ijiptbii lɛ gbɔmɛi adesai kɛkɛ ji amɛ; jeee Nyɔŋmɔ ji amɛ, ni amɛkpɔŋɔi lɛ heloo kɛ lá ni, shi jeee mumɔi ni. Kɛji Yehowa wo enine nɔ lɛ, mɔ ni yeɔ buaa mɔ lɛ aaatɛ, ni mɔ ni ayeɔ abuaa lɛ lɛ hu aaagbee shi, ni amɛ fɛɛ amɛhiɛ aaakpãtã.

⁴ Ejaakɛ bɔ ni Yehowa kɛɛ mi nɛ, “Bɔ ni kɛji jata loo jatabi miihũu yɛ emilɛ loo he, ni atsɛ tookwɛlɔi asafo tete awo ehe, ni amɛbolɔmɔ wooo ehe gbeyei, ni ebuuu hoo ni amɛaafee lɛ tete lɛ, nakai Yehowa, Taiatsɛ lɛ, aaaba abawu yɛ Zion Gɔŋ kɛ ehewɔ gɔŋkpɔi lɛ anɔ.

⁵ Bɔ ni loofɔji filikiɔ kɛbɔleɔ shi yɛ ŋwɛi kɛbuɔ amɛtsui ahe lɛ, nakai Yehowa Taiatsɛ lɛ, baabu Yerusalɛm he; ebaabu ehe, ni ebaabaa eyi, ekɛ ehe baake lɛ, ni ebaahere lɛ.

⁶ “Ao Israelbii, nyɛkua nyɛsɛɛ nyɛbaa mɔ ni nyɛtse ehiɛ atua lɛ ŋɔɔ.

⁷ Ejaakɛ nakai gbi lɛ nɔ lɛ, mɔ fɛɛ mɔ baashɛrɛ ejwiɛtɛi amãgãi kɛ eshika amãgãi ni ekɛ eniji fee ni no hã nyɛfee esha lɛ eshwie.

⁸ Asiria hiɛ baakpãtã yɛ klante ni jɛɛɛ adesa dɛŋ naa; klante ni jeee adesa ko sɔ̃ baakpãtã ehiɛ, ni ebaajo klante naa foi; ni eblahii lɛ aaanyɛ amɛnɔ koni amɛtsu nii keketee.

⁹ Emaŋtsɛ lɛ baajo foi kɛ tsuifãa, ni elumɛi lɛ aaajo foi kɛ hekpokpomɔ amɛshi amɛflaŋaa lɛ.” Yehowa, mɔ ni ajaa lɛ yɛ Zion ni efɔleshãa latɛ lɛ mli la tsoɔ yɛ Yerusalɛm lɛ ekɛɛ.