Yesaia 28 - ŊMALƐ KRƆŊKRƆŊ LƐ

Abɔ Kooyigbɛ Maŋtsɛyeli lɛ kɔkɔ

¹ Kpoo hã Israel dãatɔlɔi hewolɔi lɛ! Kpoo hã Israel anunyam fɔfɔi fɛɛfɛo ni kã ekuɛ lɛ! Kpoo hã fɔfɔi akekre ni yɔɔ Israel lumɛi ni etɔrɔ kɛ ŋmãa kɛ wain lɛ ayitsei ahe lɛ.

² Naa, Nuŋtsɔ lɛ yɛ hewalɔ kɛ kãkãlɔ ko; etamɔ nyɔŋmɔŋtɛ ni miinɛ kɛ ahum ni kpãtãa nii ahiɛ; etamɔ nu ni eje ŋa ni eeho boboobo, ni ekɛ ehewalɛ baaloo nibii etswia shi.

³ Nibii ni Efraim dãatɔlɔi lɛ kɛwulaa amɛhe lɛ akɛ nane aaanaanaa nɔ;

⁴ ni Efraim lumɛi lɛ anunyam fɛɛfɛo ni ŋalaa lɛ baalaaje tamɔ agbãmi ni shaa etsuɔ dani eshɛɔ etsulɛ be, ni mɔ fɛɛ mɔ ni aaana nɔŋŋ lɛ, etseɔ eyeɔ oya.

⁵ Nakai gbi lɛ nɔ lɛ Yehowa, Taiatsɛ, aaatsɔ̃ anunyam fɔfɔi kɛ akekre fɛɛfɛo ehã ewebii ni aaashwɛ lɛ.

⁶ Eeehã kojolɔ lɛ mumɔ ni hãa ayeɔ jalɛ sane; ni eeewo mɛi ni fãa maŋ agbo lɛ he hewalɛ.

Yesaia kɛ Yuda gbalɔi dãatɔlɔi lɛ wie

⁷ Wain ehã osɔfoi lɛ kɛ gbalɔi lɛ ahiɛ miidĩ amɛ; dãa ni wa ehã amɛmiididã. Osɔfoi lɛ kɛ gbalɔi lɛ miididã kɛ dãa ni wa. Wain ehã amɛlului, ni amɛmiididãa kɛ dãa ni wa. Amɛnãaa ninaa kpakpa koni amɛgba pɛpɛɛpɛ; dãa hãaa amɛnyɛ amɛbua sane he jogbaŋŋ.

⁸ Amɛshwe amɛkpa okpɔlɔi ni amɛtara sɛɛ lɛ anɔ kpɔtɔɔ; he ko kwraa bɛ ni muji bɛ jɛi.

⁹ Amɛkɛɔ akɛ, “Namɔ kwraa nii ebaatsɔ̃ɔ mɔ, ni namɔ kwraa ebaagbala sane mli etsɔ̃ɔ? Abifabii ni atse amɛ fufɔ, loo mɛi ni ayahole amɛ yɛ fufɔ naa?

¹⁰ Ebaatsɔ̃ɔ nii bɔ ni mla nyiɛ mla sɛɛ, ni akpɔ nyiɛ akpɔ sɛɛ, biɛ fioo kɛ jɛi hu fioo lo?”

¹¹ Dabida; shi mɛi ni naa tseee kɛ maŋsɛɛbii anɔ Yehowa baatsɔ̃ ekɛ gbɔmɛi nɛɛ awie.

¹² Mɛi ni ekɛɛ amɛ akɛ, “Hejɔlɛ nɛ. Nyɛhãa mɛi ni etɔ amɛ anaa hejɔlɛ; ni naa tsuiwoohe, kɛ̃lɛ amɛbooo toi.”

¹³ No hewɔ lɛ, Yehowa wiemɔ lɛ aaatsɔ̃ “Mla ni nyiɛ mla sɛɛ, kɛ akpɔ ni nyiɛ akpɔ sɛɛ, kɛ liamɔ ni nyiɛ liamɔ sɛɛ, kɛ biɛ fioo kɛ jɛi hu fioo” ahã amɛ, bɔ ni afee ni amɛya sɛɛsɛɛ koni amɛyagbeegbee shi ni akumɔ amɛ ni tsɔne adu amɛ ni amɔmɔ amɛ.

Zion Koŋtɛ

¹⁴ No hewɔ lɛ, nyɛhefɛoyelɔi ni yeɔ Yerusalɛm maŋbii anɔ, nyɛboa nɔ ni Yehowa kɛɔ toi!

¹⁵ Akɛni nyɛkɛɔ akɛ, “Wɔ kɛ gbele ekpãŋ, ni wɔ kɛ gbohiiaje hu eye efua, no hewɔ lɛ, kɛji ekpelebii ni naa wa lɛ miigwao mɛi kɛmiiho lɛ, ebaŋ he ni wɔyɔɔ, ejaakɛ wɔkɛ amale efee wɔbobaahe, ni wɔkɛ wɔhiɛ teɔ kutumpɔo sɛɛ.”

¹⁶ No hewɔ lɛ, nɔ ni Nuŋtsɔ Nyɔŋmɔ kɛɔ nɛ, “Naa, mikɛ tɛ ko miima shi akɛ Zion shishitoo tɛ; eji tɛ ni aka akwɛ, koŋtɛ ni jara wa ni ma shi shiŋŋ; ni aŋma yɛ nɔ akɛ, ‘Mɔ ni heɔ yeɔ lɛ ehe kpokpoŋ.’ ”

¹⁷ Mikɛ jalɛ saneyeli baafee nɔ ni akɛbaasusu shishitoo lɛ, ni mikɛ jalɛ nifeemɔ baafee kpãa ni akɛbaana ejalɛ. Nyɔŋmɔŋtɛi baaloo amalei ni nyɛkɛfee abobaahe lɛ kɛya, ni nu baafite nyɛteemɔhe lɛ.

¹⁸ Kɛkɛ lɛ aaafo nyɛ kɛ gbele teŋ kpãŋmɔ lɛ mli, ni bɔ ni nyɛ kɛ gbohiiaje eye efua lɛ sɛɛ baafo, ni kɛji ekpelebii ni naa wa lɛ miiho lɛ, ebaagwao nyɛ.

¹⁹ Shii abɔ ni ebaaho lɛ, ebaagwao nyɛ ejaakɛ ebaaho daa leebi kɛ daa shwane kɛ daa nyɔɔŋ, ni sane lɛ shishinumɔ lɛ ebaafee gbeyei pam.

²⁰ Ejaakɛ saatso lɛ baafee kuku tsɔ̃ bɔ ni aaanyɛ mli akpã yɛ nɔ; ni saanɔbo lɛ hu elɛŋ bɔ ni aaanyɛ akota he awo mli.

²¹ Ejaakɛ Yehowa aaaho edamɔ shi tamɔ bɔ ni efee yɛ Perazim Gɔŋ lɛ nɔ lɛ; ni eeegri tamɔ egri yɛ Gibeon Jɔɔ lɛ mli lɛ, ni eeetsu enaakpɛɛ nii.

²² No hewɔ lɛ, agbɛnɛ nyɛkɛkafea fɛoyeli dɔŋŋ koni akamia kpãi ni fimɔ nyɛ lɛ amli kpɛŋŋ moŋ; ejaakɛ minu akpɔ ni Nuŋtsɔ Nyɔŋmɔ, Taiatsɛ, wo yɛ shikpɔŋ tso muu lɛ fɛɛ hiɛkpãtãmɔ he lɛ.

Nyɔŋmɔ Nilee

²³ Nyɛboa toi koni nyɛnu migbee; nyɛfea diŋŋ koni nyɛnu nɔ ni mawie lɛ!

²⁴ Ani okwaafoi ni miitao amɛdu nii lɛ, humɔ lɛ sɔŋŋ kɛkɛ amɛhuɔ daa lo? Aloo shi sɔŋŋ kɛkɛ amɛtsaa, ni amɛjwaraa emli kpɔi lɛ?

²⁵ Kɛji amɛsaa shikpɔŋ lɛ hiɛ lɛ, ani amɛshwãaa kowɛ, ni amɛduuu sulu? Ani amɛduuu ŋmãa lɛ srɛnɛɛ kɛ akoko lɛ yɛ gbɛhe ni sa lo? Ani amɛduuu abele yɛ husui lɛ anɔ lo?

²⁶ Amɛduɔ, ejaakɛ amɛNyɔŋmɔ lɛ tsɔ̃ɔ amɛ nii, ni egbalaa mli etsɔ̃ɔ amɛ.

²⁷ Akɛ ŋmãagbeemɔ tso egbeee kowɛ, ni akɛ shwiili nane tsɔ̃ɔɔ sulu nɔ kɛhooo; shi moŋ akɛ tso gbeɔ kowɛ lɛ, ni akɛ dɛhiɛmɔtso gbeɔ sulu lɛ.

²⁸ Agbɛlɛɔ abele akɛshãa aboloo; agbɛlɛɔ lɛ kɛ ŋaa. Kɛji aha okpɔŋɔi gbala shwiili kɛtsɔ ŋmãa nɔ kɛho blɛoo lɛ, eflɛɛɛ lɛ.

²⁹ Yehowa, Taiatsɛ lɛ, ji mɔ dɛŋ ni nilee nɛɛ hu jɛ. Enilee yɛ naakpɛɛ, ni ejwɛŋmɔ mli kwɔ naakpa.