Yesaia 25 - ŊMALƐ KRƆŊKRƆŊ LƐ

Yijiemɔ Lala

¹ Ao Yehowa, bo ji miNyɔŋmɔ; mibakafo bo, mibajie ogbɛi lɛ yi. Ejaakɛ otsu naakpɛɛnii. Oyiŋ ni oto kɛjɛ blema beebe lɛ oye ehe anɔkwa.

² Oha maŋ lɛ fee koikoi; maŋ ni atswa gbogbo awo he lɛ etsɔ̃ koikoi; Maŋsɛɛbii amaŋtsɛ we lɛ ekumɔ, ni akuŋ sɛɛ amaŋ kɔkɔɔkɔ.

³ No hewɔ lɛ, maŋ ko ni he wa baawo ohiɛ nyam; ni yiwalɔi amaji lɛ baashe bo gbeyei.

⁴ Ejaakɛ otsɔ̃ abobaahe ohã ohiafo, otsɔ̃ abobaahe ohã mɔ ni ehĩa yɛ ehĩamɔ be mli. Otsɔ̃ abobaahe yɛ ahum mli, kɛ hɔ̃ɔŋ yɛ latsa be mli; ejaakɛ yiwalɔi amlifu lɛ, etamɔ ahum ni miitswa,

⁵ loo lamɔ yɛ shikpɔŋ gbiŋ nɔ. Shi bo Yehowa, ojɔɔ wɔhenyɛlɔi lɛ ahoofeemɔ lɛ he, ni yiwalɔ lɛ he ejɔ tamɔ bɔ ni atatu jɔɔ jeŋ dɔlɛ he lɛ.

Nyɔŋmɔ ŋmɛ okplɔ̃

⁶ Yehowa, Taiatsɛ lɛ, kɛ fɔŋ niyenii sɔkɔɔ kɛ wain momo ni adoo nɔ jogbaŋŋ baaŋmɛ shikpɔŋ lɛ nɔ bii fɛɛ okplɔ̃ yɛ gɔŋ nɛɛ nɔ.

⁷ Ni yɛ gɔŋ nɛɛ nɔ nɔŋŋ lɛ, ebaajie ŋkɔmɔ ni etsɔ̃ tamɔ atatu ni ha majimaji fɛɛ anɔ lɛ yɛ amɛnɔ; eeewo awerɛho ni etsɔ̃ tamɔ muhɔɔ lɛ yɛ amɛnɔ.

⁸ Eeekpãtã gbele hiɛ kɛaatee nanɔ, ni Nuŋtsɔ Nyɔŋmɔ aaatsumɔ hiɛiaŋ yaafonui fɛɛ. Ebaafo emaŋ lɛ hiɛgbele lɛ sɛɛ yɛ shikpɔŋ muu lɛ fɛɛ nɔ. Yehowa diɛŋtsɛ wiemɔ nɛ.

⁹ Nakai be lɛ aaakɛɛ akɛ, “Naa, wɔNyɔŋmɔ lɛ nɛ. Wɔkɛ wɔhiɛ efɔ̃ enɔ akɛ eeehere wɔ. Yehowa ni wɔhiɛ kã enɔ lɛ nɛ; nyɛhãa wɔmii ashɛa, ni wɔnyaa yɛ edɛŋ yiwalaheremɔ lɛ hewɔ.”

Nyɔŋmɔ baagbala Moab toi

¹⁰ Yehowa kɛ ehewalɛ lɛ baafã gɔŋ nɛɛ he. Shi Moabbii lɛ abaanaanaa amɛnɔ tamɔ anaa jwɛi nɔ yɛ bu ni yɔɔ tumo nɔ.

¹¹ Nɛkɛ be mli lɛ Moabbii aaakpã amɛniji amli yɛ bu lɛ mli tamɔ serelɔ kpãa eniji amli ekɛsereɔ lɛ. Shi fɛɛ sɛɛ lɛ Yehowa baaba Moab hewoo kɛ edeŋmegbomɔ lɛ fɛɛ shi.

¹² Ebaakumɔ Moab mɔji grɔŋŋi kɛ ehe gbogboi lɛ; eeekumɔ fɛɛ eshwie shi shwɛtɛɛ, ni ekɛ shikpɔŋ mlu aaaye egbɔ.