Yesaia 22 - ŊMALƐ KRƆŊKRƆŊ LƐ

Yerusalɛm he gbalɛ

¹ Ninaa ni kɔɔ Ninaa Jɔɔ lɛ he nɛ. Mɛni ji tsui ayiteŋ ni bo kɛ omɛi fɛɛ ekwɔ kɛtee nɛɛ?

² Maŋ kɛ emli kiŋkaŋŋ, maŋ ni mli efili lɛ, omli eyi kɛ hoofeemɔ. Omɛi ni nyɔnyɔɔi lɛ, jeee klante naa amɛnyɔnyɔi yɛ, ni jeee ta mli hu amɛgboi yɛ.

³ Olumɛi lɛ fɛɛ kwa ejo foi; ahiɛɛɛ gãi tete ni amɔmɔ amɛ. Mɛi fɛɛ ni ana amɛ lɛ, amɔmɔ amɛ, tsɛbelɛ amɛjojoo foi kɛtee shɔŋŋshɔŋŋ.

⁴ No hewɔ lɛ, miikɛɛ akɛ, nyɛfɔa mi kwɛmɔ; nyɛhãa mafoa kɛ dɔlɛ. Nyɛkagbaa nyɛhe naa nyɛshɛjea mimii yɛ maŋbii ahiɛ ni ekpãtã lɛ hewɔ.

⁵ Ejaakɛ gidigidifeemɔ kɛ nibii ni anaanaa nɔ kɛho kɛ nibii ni afee basaa yɛ Ninaa Jɔɔ lɛ mli lɛ jɛ Nuŋtsɔ Nyɔŋmɔ, Taiatsɛ lɛ, dɛŋ. Akumɔ gbogboi ashwie shi, ni blɔmɔ ni maŋbii lɛ bolɔ kɛhã yelikɛbuamɔ lɛ, ejije kɛtee gɔji lɛ anɔ.

⁶ Elam tabilɔi ba kɛ tayaa shwiilii kɛ okpɔŋɔnɔtalɔi kɛ gãi kɛ gãimlibii; ni Kirbii hu ba ni amɛhiɛ amɛtsɛŋi.

⁷ Ojɔi kpakpai lɛ yimɔ obɔ̃bɔ̃ kɛ tayaa shwiilii, ni okpɔŋɔnɔtalɔi lɛ gba sa yɛ Yerusalɛm agboi lɛ anaa.

⁸ Akpa Yuda he mama. Nakai gbi lɛ nyɛkɛ nyɛhiɛ fɔ̃ tawuu nibii ni yɔɔ tawuu nibii atoohe lɛ anɔ,

⁹ nyɛna akɛ David maŋ Yerusalɛm hei ni agbugbuu awo mli lɛ fa, ni nyɛtswa nubu koni nyɛkɛto nu ni hoɔ kɛjɛɔ shishigbɛ kpaakpo lɛ mli lɛ eko.

¹⁰ Nyɛkane Yerusalɛm shĩai lɛ, ni nyɛkumɔ shĩai lɛ ekomɛi koni nyɛna tɛ nyɛkɛwaje maŋ lɛ gbogbo lɛ.

¹¹ Nyɛgba nujɔɔ yɛ gbogboi enyɔ lɛ ateŋ koni nyɛkɛbua kpaakpo momo lɛ mli nu lɛ naa yɛ jɛi. Shi nyɛyakwɛɛɛ ni nyɛyabuuu Nyɔŋmɔ mɔ ni to nɔ ni ba lɛ hegbɛjianɔ kɛjɛ jeeŋmɔ, ni asaŋ ehã eba mli lɛ.

¹² Nakai gbi lɛ Nuŋtsɔ Nyɔŋmɔ, Taiatsɛ lɛ, tsɛ koni nyɛfo ni nyɛye ŋkɔmɔ ni nyɛshɛshɛɛ nyɛyi ni nyɛmia kɛ kpekpe.

¹³ Shi moŋ nyɛnya, ni nyɛmli fili nyɛ. Nyɛgbegbee tsinai kɛ toi, ni nyɛye, ni nyɛnu dãi, ni nyɛkɛɛ akɛ, “Nyɛhãa wɔyea nii ni wɔnua dãi ejaakɛ wɔ bɛnɛ wɔgboi.”

¹⁴ Yehowa, Taiatsɛ lɛ, diɛŋtsɛ ni wie, ni minu kɛ mitoi, ni ekɛɛ akɛ, “Anɔkwa, aŋɔŋ nɛkɛ nɔsha nɛɛ afaŋ nyɛ kɛyaashi beyinɔ ni nyɛaagboi.”

Abɔ Shebna kɔkɔ

¹⁵ Bɔ ni Nuŋtsɔ Nyɔŋmɔ, Taiatsɛ lɛ, kɛɛ nɛ, “Ba, yaa Shebna, tsulɔnukpa ni kwɛɔ maŋtsɛ we lɛ nɔ lɛ ŋɔɔ; ni okɛɛ lɛ akɛ,

¹⁶ mɛɛ hegbɛ oyɔɔ yɛ biɛ; ni namɛi ji owekumɛi yɛ biɛ, hewɔ ni okpɛɔ yɛ he grɔŋŋ nɛɛ, ni okpɛɔ tɛsaa mli otoɔ okɛfeɔ ofũuhe lɛ?

¹⁷ Naa, bo nuu hewalɔ, Yehowa baawo bo eshɛ efɔ̃. Ebaamɔ omli tswɛ, ni eeefɔ̃ bo kɛbɔle yɛ kɔɔyɔŋ,

¹⁸ ni eeeshɛ bo efɔ̃ tamɔ bɔɔlo ni ashɛ afɔ̃ shikpɔŋ kplanaa nɔ. Jɛi ooogbo yɛ, bo, onuŋtsɔ we lɛ mli hiɛgbejiatsɛ; ni jɛi otayaa shwiilii fɛɛfɛji lɛ aaaka.

¹⁹ Mashwie bo yɛ onitsumɔ lɛ mli, ni oyelihe aaabɔ bo.”

²⁰ Nakai gbi lɛ Yehowa kɛɛ Shebna akɛ, “Kɛji be lɛ shɛ lɛ, mibatsɛ mitsulɔ Eliakim, Hilkia bi lɛ,

²¹ ni maŋɔ otade yuu lɛ mawo lɛ, ni mikɛ ohɛfiinɔ lɛ baafi ehɛ, ni maŋɔ ohewalɛ lɛ mahã lɛ, ni ebaatsɔ̃ tsɛ eha Yerusalɛmbii kɛ Yuda we lɛ.

²² Maŋɔ David we lɛ hewalɛ lɛ fɛɛ naa samfee mawo edɛŋ: kɛji egbele lɛ, mɔ ko kwraa bɛ ni aaanyɛ aŋa; ni kɛji eŋa lɛ mɔ ko kwraa bɛ ni aaanyɛ agbele.

²³ Mahã emã shi shiŋŋ tamɔ shiŋmlitso ni aka sɛɛ kpɛŋŋ; ni ebaahã etsɛ we lɛ hiɛ aba nyam.

²⁴ “Eweku lɛ mli bii kɛ hɔi asaji fɛɛ baakã enɔ. Amɛbaatsotsro enɔ tamɔ kɔɔpoi bibii kɛ ewuji tsotsoro tso nɔ lɛ.

²⁵ Kɛji nakai be lɛ shɛ lɛ, shiŋmlitso lɛ ni aka akɛma shi shiŋŋ lɛ, aaawɔtsɔ, ni ebaagbee shi, ni jatsu ni tsotsoro nɔ lɛ hiɛ baakpãtã.” Yehowa, Taiatsɛ lɛ, ekɛɛ.