Yesaia 21 - ŊMALƐ KRƆŊKRƆŊ LƐ

Babilon shigbeemɔ he ninaa

¹ Babilon he gbalɛ nɛ. Bɔ ni lasuogbele tswaa kɛjɛɔ shiaŋa lɛ nɔ yɛ wuoyigbɛ lɛ, nakai haomɔ aaajɛ shikpɔŋ ko ni he yɔɔ gbeyei nɔ aba.

² Ajie ninaa ko ni yɔɔ gbeyei atsɔ̃ɔ mi: mɔsɛɛgbɛtsɔ̃ɔlɔ ni miitsɔ̃ɔ mɔ ko sɛɛgbɛ, kɛ nifitelɔ ni miifite nii. Elam, kwɔɔ kɛya! Media, yaasa maji lɛ ayi! Mahã ŋkɔmɔi fɛɛ ni Babilon eha eyeɔ lɛ sɛɛ afo!

³ No hewɔ lɛ, mihɛ mli eyi obɔ̃ kɛ piŋmɔ, kɔ̃ɔmɔ eta mihe; kɔ̃ɔmɔ eta mihe tamɔ yoo ni baafɔ. Mishɔ kwekweekwe, hewɔ lɛ minuuu nii. Mijijaa hewɔ lɛ minaaa nii.

⁴ Mihiɛ miidi mi; ŋmiŋmi emɔ mi; gbɛkɛ ni mishweɔ lɛ, etsɔ̃ gbeyei nɔ moŋ ehã mi.

⁵ Ninaa lɛ mli lɛ mina ni aŋmɛ okplɔ̃, akɛ kuŋtui lɛɛ shi, aaye nii, ni aanu nii. Trukaa lɛ abo akɛ, “Tatsɛmɛi, nyɛtea shi; nyɛfɔa tsɛŋi lɛ ahe mu.”

⁶ Ejaakɛ bɔ ni Nuŋtsɔ lɛ kɛɛ mi nɛ, “Yaa! Hã ni mɔ ko ayabu, ni nɔ ni eeena lɛ, ehã ni ale.

⁷ Kɛji ena mɛi tara okpɔŋɔi anɔ, ni amɛnyiɛ mɛi enyɔnyɔɔnyɔ, ni ena mɛi hu ni tara tejii kɛ yoomai anɔ lɛ, etɛ̃je ehiɛ, ni ebo nɔ ni ebaanu lɛ toi jogbaŋŋ.”

⁸ Kɛkɛ ni bulɔ lɛ bo waa ekɛɛ, “Nuŋtsɔ, midamɔ buuhe nɛɛ gbi muu fɛɛ, ni mibu nyɔɔŋ lɛ mli fɛɛ hu.

⁹ Trukaa lɛ, naa okpɔŋɔnɔtalɔi komɛi ni miiba; amɛnyiɛ mɛi enyɔnyɔɔnyɔ!” Nuŋtsɔ lɛ here nɔ, ni ekɛɛ, “Babilon egbee shi! Hɛɛ! Egbee shi! Emãgãi lɛ fɛɛ akumɔ ashwie shi nɛɛ!”

¹⁰ Ao mimaŋ Israel, ni otamɔ ŋmãa ni agbee ni asha mli. Nɔ ni minu yɛ Yehowa Taiatsɛ, Israel Nyɔŋmɔ lɛ naa lɛ, no mikɛɛ bo nɛɛ.

Edom he gbalɛ

¹¹ Edom he ninaa nɛ. Abo atsɛ mi kɛjɛ Edom akɛ, “Bulɔ, mɛɛ nyɔɔŋ ŋmɛlɛtswaa be mli nɛ? Bulɔ, mɛɛ nyɔɔŋ ŋmɛlɛtswaa be mli nɛ?”

¹² Kɛkɛ ni bulɔ lɛ kɛɛ akɛ, “Je miitsɛre shi moŋ je baana ekoŋŋ. Kɛji nɔ ko otaoɔ obi lɛ, bi! Kuu osɛɛ ni obabi!”

Arabia he gbalɛ

¹³ Arabia he ninaa nɛ. Nyɛ Dedan gbɛnyiɛlɔi asafo, Arabia ŋa lɛ mli nyɛbaaya nyɛyato shi yɛ.

¹⁴ Nyɛ Temabii, nyɛhaa mɛi ni kumai yeɔ amɛ lɛ nu ni amɛnu, ni nyɛhaa abobalɔi lɛ niyenii ni amɛye,

¹⁵ ejaakɛ amɛjo foi kɛjɛ ta mli gbele naa, kɛjɛ klante ni agbala awo amɛ kɛ gãi ni abaatsɛ̃ kɛ ta mli osharãi fɛɛ anaa.

¹⁶ Ejaakɛ bɔ ni Nuŋtsɔ lɛ kɛɛ nɛ, “Biɛ afi mli, tamɔ apaafonyo apaayeli afi be lɛ, Kedar anunyam fɛɛ sɛɛ baafo.

¹⁷ Kedar hii kãkãlɔi gãitsɛ̃lɔi ni aaashwɛ lɛ ayi faŋ, ejaakɛ Yehowa, Israel Nyɔŋmɔ lɛ ekɛɛ.”