Yesaia 20 - ŊMALƐ KRƆŊKRƆŊ LƐ

Gbalɔ ni nyiɛ yayai lɛ okadi lɛ

¹ Afi nɔ ni Asiria Maŋtsɛ Sargon tsu etatsɛnukpa fe fɛɛ lɛ kɛba, ni ebatua Filistibii amaŋ Ashdod, ni eŋɔ maŋ lɛ,

² Yehowa etsɔ̃ hiɛ afii etɛ̃ momo ekɛɛ Amoz bi Yesaia akɛ, “Yaa koni oyajie kpekpe lɛ yɛ ohɛ, ni ojie otokotai lɛ hu.” Yesaia fee nakai, ni enyiɛ yayai kɛ enane folo hu.

³ Be ni aŋɔ Ashdod sɛɛ lɛ, Yehowa kɛɛ akɛ, “Bɔ ni mitsulɔ Yesaia nyiɛ yayai kɛ enane folo afii etɛ̃ ekɛto Ijipt kɛ Kush naakpɛɛ okadi lɛ,

⁴ nakai pɛpɛɛpɛ Asiria maŋtsɛ aaakpala Ijipt kɛ Kush akɛ nomii kɛaatee. Abaakpala gbekɛbii kɛ onukpai fɛɛ kɛ amɛhe yayai kɛ amɛdukui ahe ni kã kɛ amɛnane folo hu; ni Ijipt hiɛ aaashwie shi.

⁵ Kɛkɛ lɛ amɛaahao ni amɛnaa aaakpɛ amɛhe yɛ Kush ni amɛkɛ amɛhiɛ fɔ enɔ lɛ kɛ agbɛnɛ Ijipt hu ni amɛshwã amɛfɔ enɔ lɛ hewɔ.

⁶ Ni nakai be lɛ mli lɛ, nɛkɛ ŋshɔ nɛɛ naa bii lɛ aaakɛɛ akɛ, ‘Naa nɔ ni eba mɛi ni wɔhiɛ kã amɛnɔ lɛ anɔ, mɛi ni wɔjo foi kɛtee wɔyaba abo yɛ amɛŋɔɔ koni ahere wɔ yɛ Asiria maŋtsɛ lɛ dɛŋ lɛ anɔ. Belɛ, wɔ lɛ, te wɔɔfee tɛŋŋ ni wɔje mli hu?’ ”