Yesaia 2 - ŊMALƐ KRƆŊKRƆŊ LƐ

Naanɔ Toiŋjɔlɛ

¹ Yuda kɛ Yerusalɛm he sane ni Amoz bi Yesaia na nɛ.

² Ebaaba mli akɛ naagbee mli lɛ, gɔŋ lɛ ni Yehowa Sɔlemɔ we lɛ ma nɔ lɛ baatsɔ̃ gɔŋ ni kwɔ fe gɔji fɛɛ. Abaawo enɔ fe gɔji lɛ fɛɛ, ni aaajɛ jeŋjeŋ fɛɛ aba jɛi.

³ Ni mɛi babaoo baakɛɛkɛɛ amɛhe akɛ, “Nyɛbaa, nyɛhãa wɔyaa Yehowa gɔŋ lɛ nɔ, ni wɔyaa Yakob Nyɔŋmɔ lɛ We lɛ, koni etsɔ̃ɔ wɔ bɔ ni etaoɔ akɛ wɔhi shi wɔhã, koni wɔba wɔjeŋ nakai, Ejaakɛ mla lɛ, Zion ebaajɛ, ni Yehowa wiemɔ lɛ, Yerusalɛm ebaajɛ.”

⁴ Ni ebaakojo majimaji lɛ ateŋ, ni ebaakã mɛi babaoo ahiɛ, ni ebaabu atɛŋ ehã mɛi babaoo. Amɛbaatswia amɛklantei lɛ amɛkɛsɔ̃ kɔii ni amɛkɛ amɛkpɔlɔi lɛ hu baasɔ̃ adidai. Maŋ ko kɛ maŋ ko wuŋ ta, ni amɛkaseŋ tawuu dɔŋŋ.

⁵ Ao, nyɛ Yakob we, nyɛbaa agbɛnɛ koni wɔnyiɛ Yehowa la lɛ mli.

Abaaba Henɔwolɔi ashi

⁶ Ejaakɛ Yehowa ekwa ewebii ni ji Yakob shwiei lɛ, ejaakɛ bokãgbɛ shikpɔji klalɔi babaoo ebafutu amɛ, ni amɛtsɔ̃mɔ klalɔi tamɔ Filistibii lɛ, ni maŋsɛɛbii moŋ amɛkɛbɔɔ.

⁷ Amɛshikpɔŋ lɛ nɔ eyi obɔ̃ kɛ shika kɛ jwiɛtɛi ni anyɛɛɛ naa abu. Amɛshikpɔŋ lɛ nɔ eyi kɛ okpɔŋɔi, ni amɛtayaa shwiilii lɛ anyɛɛɛ naa akpa.

⁸ Amɛshikpɔŋ lɛ nɔ eyi tɔ kɛ yakayaka amãgãi, ni amɛkotoɔ shi amɛjaa amɛninenaa nitsumɔnii, nii ni amɛkɛ amɛ diɛŋtsɛ amɛniji fee lɛ.

⁹ No hewɔ lɛ, adesa diɛŋtsɛ ebɔ ehe ahora ni eba ehe shi kwraa. Nuŋtsɔ, kɛ enɛ akafa amɛ.

¹⁰ Botemɔ tɛsaa tɛkplo mli, ni yaatee ohe yɛ su mli ni ojo Yehowa he gbeyei lɛ kɛ egbojee anunyam lɛ naa foi.

¹¹ Gbi ko miiba, ni nakai gbi lɛ nɔ lɛ, aaaba gbɔmɔ adesa hewoo kɛ henɔwomɔ fɛɛ shi, ni gbi lɛ Yehowa koome pɛ hiɛ baaba nyam, ni aaawo enɔ.

¹² Ejaakɛ Yehowa, Taiatsɛ lɛ, yɛ gbi ko ni eto ni ekɛbaaba ntɛŋfeemɔ kɛ henɔwomɔ kɛ hetsɔ̃ɔmɔ fɛɛ shi.

¹³ Gbi nɛɛ lɛ abaaba Lebanon tsenedrutsei gojogojoo lɛ fɛɛ kɛ Bashan tsei wuji lɛ fɛɛ,

¹⁴ kɛ gɔji grɔŋŋi lɛ fɛɛ kɛ gɔŋkpɔi ni kwɔlɔ lɛ fɛɛ,

¹⁵ kɛ mɔji gojogojoo lɛ fɛɛ kɛ gbogboi ni awaje lɛ fɛɛ ashi,

¹⁶ ni abaashwie Tarshish lɛji lɛ kɛ amɛmli ŋaa nibii fɛɛfɛji lɛ fɛɛ.

¹⁷ Gbi lɛ abaaba gbɔmɔ adesa hetsɔ̃ɔmɔ kɛ ntɛŋfeemɔ fɛɛ shi, ni Yehowa koometoo pɛ nɔ abaawo gojoo,

¹⁸ ni yakayaka amãgãi lɛ baaho aya kwraa.

¹⁹ Gbi nɔ ni Yehowa aaaba ebahoso shikpɔŋ lɛ, gbɔmɛi baabote tɛsaa tɛkploi kɛ shikpɔŋ bui amli koni amɛtee amɛhe yɛ Yehowa he gbeyei kɛ egbojee anunyam lɛ hewɔ.

²⁰ Nakai gbi lɛ gbɔmɛi baasherɛ amɛshika amãgãi kɛ jwiɛtɛi amãgãi ni amɛfee amɛhã amɛhe ni amɛjaa lɛ amɛshwie amɛhã obishii kɛ aputupatai.

²¹ Amɛbaaya amɛyabote tɛkploi kɛ tɛsaa amli fɔji amli bɔ ni afee ni amɛnyɛ amɛjo foi yɛ Yehowa he gbeyei kɛ egbojee anunyam lɛ naa be ni Yehowa aaate shi ebahoso shikpɔŋ lɛ.

²² Nyɛwia nyɛhe kɛjea gbɔmɔ ni wala mumɔ yɔɔ emli nɛɛ he, ejaakɛ lɛ diɛŋtsɛ lɛ, ebɛ nɔ ko mli.