Yesaia 18 - ŊMALƐ KRƆŊKRƆŊ LƐ

Nyɔŋmɔ baagbala Kush toi

¹ Ao! Shikpɔŋ ko yɛ Kush fai lɛ asɛɛ ni anuɔ fijiaŋtswaa yɛ nɔ,

² ni etsuɔ ebɔfoi ni taraa ada lɛji amli kɛtsɔ̃ɔ Nilo faa lɛ hiɛ. Nyɛ bɔfoi ni nyɛhe yɔɔ oya, nyɛyaa maŋ ko ni emli bii kwɔlɔ ni amɛhe yɔɔ trotro lɛ aŋɔɔ. Asheɔ gbɔmɛi nɛɛ gbeyei yɛ kpaakpa kɛ shɔŋŋ, jaku ko ni he wa pam ni naanaa mɛi anɔ ji amɛ. Fai ejara amɛshikpɔŋ lɛ mli.

³ Nyɛ jeŋ gbɔmɛi fɛɛ ni nyɛyɔɔ shikpɔŋ lɛ nɔ, kɛji ashi aflaŋaa yɛ gɔji lɛ anɔ lɛ, nyɛkwɛa, ni kɛji akpã tɛtɛrɛmantɛrɛ lɛ nyɛboa toi.

⁴ Ejaakɛ bɔ ni Yehowa kɛɛ nɛ, “Majɛ mishihilɛhe lɛ makwɛ kpoo tamɔ hulutsoo mli dɔlɛ, loo tamɔ atatu mli bɔ yɛ nikpamɔ be mli.

⁵ Dani aaashɛ nikpamɔ be lɛ, be ni afofro lɛ ekpala, ni wainyibii bibii lɛ epue lɛ, ekɛ klante aaafolɔ niji lɛ ni etsɛ̃rɛ lɛ kɛ niji ni egbalagbalai lɛ eshwie.

⁶ Abaashi gbohii lɛ ashwie shi ahã gɔji lɛ anɔ loofɔji kɛ shikpɔŋ lɛ nɔ kooloi; ni loofɔji lɛ baaye amɛ hulutsoobe mli, ni shikpɔŋ lɛ nɔ kooloi lɛ baaye amɛ yɛ fɛibe mli.”

⁷ Nakai be lɛ gbɔmɛi ni kwɔlɔ ni amɛhe yɔɔ trotro ni asheɔ amɛ gbeyei yɛ kpaakpa kɛ shɔŋŋ, jaku ko ni he wa pam ni naanaa mɛi anɔ, ni fai ejara amɛshikpɔŋ lɛ mli baatere nikeenii kɛbaha Yehowa, Taiatsɛ lɛ, yɛ Zion Gɔŋ lɛ nɔ he ni ajaa Yehowa, Taiatsɛ lɛ yɛ lɛ.