Yesaia 11 - ŊMALƐ KRƆŊKRƆŊ LƐ

Toiŋjɔlɛ Maŋtsɛyeli

¹ Tso fɔ aaakwɛ̃ kɛaajɛ Ishai tso kuku lɛ mli, ni tso nine ko aaahere kɛaajɛ eshishi fã lɛ mli awo yibii.

² Ni Yehowa Mumɔ lɛ baahi enɔ, ni ebaaduro lɛ nilee kɛ sanesɛɛkɔmɔ mumɔ kɛ ŋaawoo kɛ hewalɛ mumɔ kɛ Yehowa he nilee kɛ lɛ gbeyeishemɔ mumɔ.

³ Eeena Yehowa gbeyeishemɔ he miishɛɛ. Bɔ ni ehiŋmɛii naa lɛ, jeee nakai ebaakojo; bɔ ni etoi nuɔ lɛ, jeee nakai ebaakojo.

⁴ Shi moŋ eeekojo ohiafoi lɛ yɛ jalɛ naa; ni eeebu shikpɔŋ lɛ nɔ humii lɛ atɛŋ yɛ jalɛ naa. Ekɛ edaaŋ wiemɔ aaaplene shikpɔŋ lɛ nɔ bii, ni ekɛ emumɔ lɛ aaagbe mɔ fɔŋ lɛ.

⁵ Ni eeeye emaŋ lɛ nɔ kɛ jalɛ kɛ anɔkwayeli.

⁶ Klaŋ kɛ gwantɛŋbi baahi shi, ni kootsɛ kɛ abotiabi baabumɔ shi, ni tsinabi kɛ jatabi baahi he kome, ni gbekɛ bibioo baakpala amɛ.

⁷ Tsinayoo kɛ oshishibrishi baaye nii yɛ he kome, ni amɛbii hu baabumɔ shi yɛ he kome, ni jata baakpe jwɛi tamɔ tsina nɔŋŋ.

⁸ Gbekɛ fufɔoo baashwɛ yɛ shikpãa bu naa, ni bi ni atse lɛ fufɔ kɛ enine baawo onufu bu mli, ni efeŋ lɛ nɔ ko.

⁹ Afeŋ efɔŋ, ni afiteŋ nii yɛ Nyɔŋmɔ Gɔŋ Krɔŋkrɔŋ, Zion, nɔ dɔŋŋ, ejaakɛ Yehowa he nilee baayi shikpɔŋ lɛ nɔ obɔ tamɔ bɔ ni ŋshɔ eyi obɔ kɛ nu lɛ.

Nomii baaku amɛsɛɛ amɛba

¹⁰ Be miiba be ni maŋtsɛ ni aaajɛ Ishai mli lɛ baatsɔ̃ tamɔ aflaŋaa ni ashi ahã majimaji lɛ. Lɛ esɛɛgbɛ maji lɛ fɛɛ aaatao, ni eshihilɛhe lɛ hiɛ baaba nyam.

¹¹ Nakai be mli lɛ Nuŋtsɔ lɛ kɛ hewalɛ baakpɔ̃ ewebii ni eshwɛ lolo lɛ, nɔ ni ji shii enyɔ nɔ, kɛjɛ Asiria kɛ Ijipt kɛ Patros kɛ Kush kɛ Elam kɛ Babilon kɛ Hamat, asaŋ kɛ ŋshɔnaa shikpɔji lɛ anɔ kɛaaba.

¹² Yehowa aaashi aflaŋaa etsɔ̃ɔ maji lɛ kɛto okadi akɛ eebua Israelbii ni ashɛrɛ amɛ ashwie lɛ kɛ Yudabii ni agbɛ amɛ ashwã lɛ anaa kɛjɛ jeŋ koji ejwɛ lɛ nɔ kɛbakpe.

¹³ Ni Israel yeŋ Yuda he awuŋã dɔŋŋ, ni Yuda hu efeŋ Israel henyɛlɔ dɔŋŋ.

¹⁴ Shi amɛbaafee ekome amɛyatua Filistibii yɛ anaigbɛ, ni amɛbaafee ekome amɛyaha bokãgbɛbii lɛ anibii. Amɛbaaye Edom kɛ Moab nɔ kunim, ni Amonbii baabo amɛtoi.

¹⁵ Yehowa baafite he ni Ijipt Faa lɛ kɛ enaa woɔ ŋshɔŋ yɛ lɛ, ni ekɛ ehewalɛ baahã kɔɔyɔɔ ni mli edɔ atswa yɛ Eufrate Faa lɛ nɔ, ni ebaaŋala Faa lɛ niji kpawo lɛ, ni mɛi aaanyiɛ shikpɔŋ gbiŋ nɔ kɛfo.

¹⁶ Ni eeetsɔ̃ tɛmpɔŋ ehã emaŋ lɛ mli mɛi ni eshwɛ lɛ, mɛi ni eshwɛ ni aaajɛ Asiria aba lɛ, tamɔ bɔ ni jɛi tsɔ̃ gbɛ ha Israel be ni amɛje Ijipt lɛ.