Yesaia 10 - ŊMALƐ KRƆŊKRƆŊ LƐ

¹ Kpoo ha mlawolɔi ni woɔ mlai ni ejaaa, kɛ mɛi ni ŋmalaa mlai ni akɛfeɔ mɛi niseniianii lɛ.

² Mlai nɛɛ hãa atsɔ̃ɔ ohiafo sane hiɛ abuɔ shi, ni akɛshɔɔ mimaŋbii ateŋ ohiafoi lɛ agbɛnaanii yɛ amɛdɛŋ, koni aha okulafoianii, ni ashɔ̃ awusãi agboshinii yɛ amɛdɛŋ.

³ Te nyɛaafee tɛŋŋ yɛ nakai toigbalamɔ gbi lɛ nɔ, be ni ahum baatswa kɛjɛ shɔŋŋ kɛba lɛ? Namɔ ŋɔɔ nyɛaajo foi kɛaaya nyɛyatao yelikɛbuamɔ; ni nɛgbɛ nyɛaashi nyɛnii ni nyɛna lɛ yɛ?

⁴ Eshwɛŋ nɔ ko nɔ ko feemɔ fe akɛ amɛdɔ kɔmɔɔ yɛ gboklɛfoi ateŋ, aloo amɛ hu amɛnyɔnyɔi. Kɛ̃lɛ enɛ fɛɛ sɛɛ lɛ Yehowa mlifu lɛ ejɔŋ; ni etoigbalamɔ nine lɛ ekpã mli lolo.

Nyɔŋmɔ kɛ Asiria Maŋtsɛ baatsu nii

⁵ Ao! Asiria, mimlifu kpoti, mimlila tso!

⁶ Mifã lɛ miwo maŋ ni sheee Nyɔŋmɔ gbeyei lɛ he. Mifã lɛ koni eyatua mɛi ni mimli efu amɛ lɛ, koni eyaha amɛ, koni eshɔ̃ amɛdɛŋ nii, koni enaanaa amɛnɔ tamɔ anaa blohuŋ ŋmiamɔ.

⁷ Shi jeee nakai ji Asiria yiŋtoo, ni jeee nakai ejwɛŋmɔ kɛɛ lɛ. Shi moŋ nɔ ni yɔɔ eyiŋ ji akɛ eyaakpãtã maji ahiɛ wɛɛ, ni jeee maji fioo ko hu,

⁸ ejaakɛ nɔ ni ekɛɔ ji akɛ, “Ani mitatsɛmɛi lɛ jeee maŋtsɛmɛi sɔŋŋ ni?

⁹ Ani Kalno tamɔɔɔ Karkemish, ni Hamat tamɔɔɔ Arpad, ni Samaria tamɔɔɔ Damasko hã mi?

¹⁰ Bɔ ni miye shikpɔji ni jaa amãgãi ni tsiitsii fe Yerusalɛm kɛ Samaria amãgãi anɔ lɛ,

¹¹ enyiɛ nɔŋŋ ni mifeŋ Yerusalɛm kɛ emli amãgãi lɛ tamɔ mifee Samaria kɛ emli amãgãi lɛ?”

¹² Kɛji Nuŋtsɔ lɛ gbe enitsumɔ lɛ fɛɛ naa yɛ Zion Gɔŋ lɛ nɔ, kɛ Yerusalɛm lɛ, ebaagbala Asiria maŋtsɛ toi yɛ eshwãa kɛ ehewoo lɛ hewɔ.

¹³ Ejaakɛ ekɛɛ akɛ, “Mi diɛŋtsɛ mihewalɛ kɛ minilee naa mitsu enɛ yɛ, ejaakɛ mihiɛ kã shi, Mitsirɛ majimaji ahusui kɛtee sɛɛ, ni mishɔ̃shɔ̃ɔ amɛmli jwetri; mitsirɛ mɛi ni tara maŋtsɛ sɛii anɔ mitswia shi tamɔ tsina feɔ.

¹⁴ Minine eshɛ majimaji lɛ anii ni amɛna anɔ tamɔ aloɔ loofɔlɔ wɔji yɛ etsu mli be ni ebɛ jɛi lɛ, nakai minine eshɛ majimaji lɛ anii anɔ, ni mɔ ko mɔ ko bɛ ni baatswa efijiaŋ aloo etswa esɛŋ ekɛɛ nɔ ko.”

¹⁵ Shi Nuŋtsɔ Yehowa, Taiatsɛ lɛ, miikɛɛ akɛ, “Ani lema baanyɛ eshwã ewo mɔ ni hiɛ emli lɛ lo? Aloo ani saalai baanyɛ ete shi ewo mɔ ni hiɛ lɛ lɛ? Ani tso nyɛɔ mɔ ni hiɛ lɛ lɛ moŋ nɔ ewoɔ? Aloo kplamɔ tso moŋ nyɛɔ mɔ ni ejeee tso nɔ ewoɔ.”

¹⁶ No hewɔ lɛ, Nuŋtsɔ Yehowa, Taiatsɛ lɛ, lootãa hela aye etabilɔi ni eshwishwii lɛ, ni aaawo enyam lɛ shishi la, ni eeetso tamɔ la.

¹⁷ Nyɔŋmɔ, Israel kane lɛ atsɔ̃ la, ni Israel Mɔ Krɔŋkrɔŋ lɛ aaatsɔ̃ la lilɛi, ni ebaatso, ni ebaashã ŋmeii kɛ kpitikpitii ni yɔɔ Israel lɛ fɛɛ gbi ko.

¹⁸ Israel koo ni hiɛ yɔɔ nyam lɛ kɛ shikpɔŋ ni baa nii lɛ, Yehowa baakpãtã fɛɛ hiɛ kɛmɔ shi wɛɛ tamɔ gbele hela kpãtãa helatsɛ hiɛ lɛ.

¹⁹ Kooŋ tsei ni aaashwɛ afalɛ shɛŋ nɔ ko bɔ sɔŋŋ ni gbekɛ tete aaanyɛ amɛyibɔ akane.

Mɛi fioo kɛ̃ aaaku amɛsɛɛ amɛba

²⁰ Be miiba, ni nakai be lɛ gbɔmɛi ni eshwɛ yɛ Israel kɛ Yakob shwiei ni ahe eje gbele mli lɛ kɛ amɛhiɛ efɔŋ mɔ ni tswia amɛ nii lɛ nɔ dɔŋŋ, shi moŋ amɛkɛ amɛhiɛ aaafɔ Yehowa, Israel Mɔ Krɔŋkrɔŋ Koome lɛ, nɔ yɛ anɔkwale mli.

²¹ Mɛi fioo ni eshwɛ aaaba Nyɔŋmɔ hewalɛtsɛ lɛ ŋɔɔ.

²² Eyɛ mli akɛ nyɛwebii, Israelbii, ayi fa tamɔ ŋshɔnaa shia moŋ, shi nyɛyi fioo ko pɛ ni aaaku amɛsɛɛ aba. Hiɛkpãtãmɔ ni ato miimɛ nyɛ; shi kɛ̃lɛ jalɛ yɛ mli.

²³ Ejaakɛ Nuŋtsɔ Yehowa, Taiatsɛ lɛ, baakpãtã nibii ahiɛ yɛ shikpɔŋ muu lɛ fɛɛ nɔ kɛmɔ shi tamɔ bɔ ni ekɛɛ lɛ.

Yehowa baagbala Asiria toi

²⁴ Bɔ ni Nuŋtsɔ Yehowa, Taiatsɛ lɛ, kɛɔ nɛ, “Ao mimɛi ni yɔɔ Zion, nyɛkashea Asiriabii lɛ gbeyei kɛji amɛkɛ dadei kɛ amɛdɛ̃hiɛmɔtsei tswia nyɛ tamɔ Ijiptbii lɛ fee nyɛ lɛ.

²⁵ Ejaakɛ eshwɛ be fioo, kɛkɛ lɛ mimli ni efu nyɛ lɛ sɛɛ baafo, ni mibatsɔ̃ mlifu lɛ mahã amɛ, ni makpãtã amɛhiɛ.

²⁶ Ni mi, Yehowa, Taiatsɛ lɛ, mibadɔ kpelebi mato amɛnɔ magwao amɛ tamɔ bɔ ni mifee Midianbii lɛ yɛ Oreb Tɛsaa lɛ nɔ lɛ. Mibawó tso nɛɛ nɔ yɛ ŋshɔ nɔ tamɔ mifee yɛ Ijipt lɛ.

²⁷ Nakai gbi lɛ nɔ lɛ mibawo Asiria jatsu lɛ kɛje nyɛkɔŋ, ni abaakumɔ apã ni kã nyɛkuɛ lɛ.”

Henyɛlɔi lɛ ebatua

²⁸ Henyɛlɔ lɛ ejɛ Rimon ebashɛ Ai. Etsɔ̃ Migron kɛho, ni ekɛ Mikmash efee ejatsutoohe.

²⁹ Amɛtsɔ̃ gɔji ateŋ tsɔ̃mɔhe lɛ, ni amɛwɔ yɛ Geba. Rama miikpokpo, ni Maŋtsɛ Saul maŋ Gebea ejo foi.

³⁰ Ao Galimbii, nyɛbolɔa! Ao Laishabii, bo toi! Anatotbii, nyɛhãa amɛ hetoo.

³¹ Madmenabii hiɛ foi, ni Gebim maŋ lɛ mli bii miijo foi kɛyatao abobaahe.

³² Ŋmɛnɛ gbi nɛɛ lɛ ebaato shi yɛ Nob, ni ebaawo atswɛrɛ nɔ ekɛtsɔ̃ɔ Zion Gɔŋ, ni ji Yerusalɛm lɛ.

³³ Naa, Nuŋtsɔ Yehowa, Taiatsɛ lɛ, kɛ hewalɛ ko baafolɔ tsei aniji lɛ eshwie shi. Nii ni ekwɔlɔ gojogojoo lɛ, abaafolɔ amɛ ashwie shi; ni nii ni ehole amɛhe nɔ lɛ, abaafolɔ nɔ.

³⁴ Yehowa kɛ lema baagba koo hayii lɛ, ni Lebanon baagbee shi kɛ etsei wujiwuji lɛ fɛɛ.