Yesaia 1 - ŊMALƐ KRƆŊKRƆŊ LƐ

¹ Ninaa ni ajie atsɔ̃ Yesaia, Amoz bi lɛ, yɛ Yuda shikpɔŋ lɛ kɛ Yerusalɛm maŋ lɛ hu he, yɛ Yuda maŋtsɛmɛi nɛɛ, Uzia kɛ Yotam kɛ Ahaz kɛ Hezekia, ayinɔ nɛ:

Nyɔŋmɔ kã ewebii ahiɛ

² Yehowa kɛɛ akɛ, “Ŋwɛi, bo toi, ni shikpɔŋ bo hu feemɔ toi, ejaakɛ mi Yehowa, miiwie. Milɛ bii ni amɛdara, shi amɛ lɛ, amɛtse mihiɛ atua.

³ Tsina le mɔ nɔ̃ ni ji lɛ, ni teji hu le he ni enuŋtsɔ eto eniyenii adeka yɛ. Shi Israel lɛ, lɛ lɛ eleee enɛ mli ekoeko; miwebii lɛ bɛ niiashishinumɔ.”

⁴ Ao! Eshafeelɔi amaŋ, gbɔmɛi ni eyi tɔ kɛ eshafeemɔ, efɔŋfeelɔi ashwiei, gbɔmɛi nifitelɔi ni amɛkwa Yehowa, ni amɛgbe Israel Mɔ Krɔŋkrɔŋ lɛ he guɔ, ni amɛ kɛ lɛ teŋ etserɛ kwraa.

⁵ Mɛni hewɔ nyɛyaa nɔ nyɛtseɔ atua koni aya nɔ agbala nyɛtoi lolo nɛɛ? Nyɛyitso muu lɛ fɛɛ he miiye, ni nyɛtsui fɛɛ hu etɔ biti.

⁶ Kɛjɛ yiteŋ aahu kɛyashi naneshi lɛ, he ko he ko bɛ gbɔmɔtso lɛ he ni atswã bɛ jɛi fe pilamɔi kɛ faji kɛ faji ni amɛmli miihohoo lá. Anyamɔko faji lɛ, afimɔko lɛ, akɛ mu etoko amɛnɔ hu.

⁷ Nyɛjaku shikpɔŋ lɛ kã shi amaŋfɔ̃, ni amãmɔ nyɛmaji wuji lɛ anaa la ashãshãai. Gbɔi miiye nyɛshikpɔŋ lɛ nɔ nii yɛ nyɛhiɛ; amɛbutu nyɛshikpɔŋ lɛ, ni amɛhã etsɔ̃ amaŋfɔ̃.

⁸ Yerusalɛm pɛ eshwɛ, ni lɛ hu asa eyi. Etsɔ̃ tamɔ asese ko yɛ waintrom mli, loo agba ni ma kukumba ŋmɔ mli.

⁹ Yehowa eshwɛɛɛ hiɛkãalɔi fioo ko hãaa wɔ kulɛ, wɔsane lɛ tsɔ̃ tamɔ Sodom kɛ Gomora.

¹⁰ Nyɛ Sodom maŋnɔyelɔi, nyɛboa Yehowa wiemɔ toi; ni nyɛ Gomorabii, nyɛboa nɔ ni wɔNyɔŋmɔ lɛ yɔɔ nyɛ tsɔ̃ɔmɔ toi.

¹¹ Yehowa kɛɛ, “Mɛni nyɛfɔlei babaoo lɛ ji hã mi? Shãa afɔlei ni nyɛkɛ gwantɛŋ hii shãa lɛ kɛ kooloi ni eshwishwii afɔi lɛ eje mitsine. Tsinahii kɛ gwantɛŋbii kɛ tookpakpoi alá lɛ, mitaooo dɔŋŋ.

¹² Namɔ kɛɛ nyɛ akɛ kɛji nyɛba mi jamɔ lɛ, nyɛkɛ enɛɛmɛi aba mikpoi lɛ anɔ? Nyɛkabanyiɛa mikpoi lɛ anɔ dɔŋŋ!

¹³ Nyɛkɛ nyɛyakayaka afɔlei akabaa dɔŋŋ; amɛhe bɛ sɛɛnamɔ. Miihi tsofakɛŋma ni ashãa lɛ kɛ nyɔŋ hee gbii juji lɛ, kɛ hejɔɔmɔ gbi kɛ gwai ni nyɛbɔɔ lɛ. Eshai efite gbii juji ni nyɛyeɔ lɛ, no hewɔ lɛ, mitaooo.

¹⁴ Misusuma miihi nyɔŋ hee gbii juji kɛ gbii juji krokomɛi ni nyɛyeɔ lɛ; amɛtsɔ̃mɔ jatsu amɛhã mi, ni etɔ mi kɛ teremɔ.

¹⁵ Kɛji nyɛhole nyɛniji anɔ nyɛmiisɔle lɛ, mibatsɔ̃ mihiɛ mato afã; nyɛbaasɔle kakadaŋŋ nɛ, shi miboŋ nyɛ toi. Lá ewu nyɛniji ahe tsɔ̃.

¹⁶ Nyɛjua nyɛhe koni nyɛhãa nyɛhe atsea; nyɛkɛ nyɛnifɔɔjianii lɛ ajea mihiɛ, ni nyɛkpaa efɔŋfeemɔ.

¹⁷ Nyɛkasea ekpakpafeemɔ, nyɛtaoa jalɛ sane sɛɛgbɛ; nyɛkwɛa koni akayea amim, nyɛfãa awusa he, ni nyɛwiea nyɛhãa okulafo.”

¹⁸ Yehowa kɛɛ akɛ, “Nyɛbaa agbɛnɛ; nyɛhãa wɔtaoa naa. Kɛji nyɛhe eshai lɛ tsuɔ tamɔ lá tete po, amɛbaayɛ futaa tamɔ snoo; ni kɛji amɛtsuɔ fɔɔ tamɔ kɔɔjaŋ po, amɛbaatsɔ̃ tamɔ too he tsɔ̃i yɛŋ.

¹⁹ Kɛji nyɛmiisumɔ, ni nyɛfee toibolɔi lɛ, no lɛ nyɛbaaye shikpɔŋ lɛ nɔ nii kpakpai lɛ.

²⁰ Shi kɛji nyɛkpɛlɛ̃ɛɛ, ni nyɛtse atua lɛ, no lɛ akɛ klante baakpãtã nyɛhiɛ. Mi, Yehowa, mikɛɛ.”

Maŋ ni eyi kɛ eshafeelɔi

²¹ Te fee tɛŋŋ ni maŋ ni kulɛ eyeɔ anɔkwa lɛ etsɔ̃ ehe ajwamãŋ nɛɛ. Sa lɛ aye jalɛ sane yɛ ehe fɛɛ he, ni jalɛ saneyelɔi pɛ ni yɔɔ jɛi; shi agbɛnɛ gbɔmɔgbelɔi sɔŋŋ yɔɔ jɛi.

²² Ojwiɛtɛi lɛ etsɔ̃ jwiɛtɛi shishi, ni owain lɛ ashi mli nu.

²³ Omli lumɔi lɛ etsɔ̃mɔ atuatselɔi kɛ julɔi ananemɛi. Amɛteŋ mɔ fɛɛ mɔ miinya nyɔɔŋnihamɔ he ni amɛhiŋmɛii etsu kɛnyiɛ mɛi adɛŋ nikee sɛɛ. Amɛfãaa awusa he lɛ, amɛyeee okulafo sane amɛhãaa lɛ.

²⁴ No hewɔ lɛ, nɔ ni Nuŋtsɔ Yehowa, Taiatsɛ, Israel Ofe Koome lɛ kɛɔ nɛ, “Mikɛ mimlifu lɛ baashãkã mihenyɛlɔi anɔ, ni mibatɔ mihe owele yɛ nyɛ, mihenyɛlɔi lɛ, anɔ.

²⁵ Mikɛ bo baaye, ni mibasere ojwiɛtɛifei lɛ fɛɛ, ni majie omli muji nii fɛɛ mashwie.

²⁶ Mato kojolɔi mahã bo tamɔ eyɔɔ tsutsu ko lɛ, kɛ ajinafoi hu tamɔ blema lɛ. No sɛɛ lɛ, bo Yerusalɛm, aaatsɛ bo jalɛ maŋ.”

²⁷ Jalɛ saneyeli ji nɔ ni aaahere Yerusalɛm maŋ lɛ kɛ emli mɛi fɛɛ ni aaashwa amɛhe lɛ ayiwala.

²⁸ Shi maŋ lɛ atuatselɔi lɛ kɛ eshafeelɔi lɛ aaakpãtã amɛ fɛɛ amɛhiɛ, ni mɛi ni baakwa Yehowa lɛ, abaaplene amɛ.

²⁹ Ebaafee nyɛ hiɛgbele akɛ nyɛja tsei wuji; asaŋ nyɛhiɛ aaashwie shi akɛ nyɛfeefee tromi komɛi,

³⁰ ejaakɛ nyɛaatsɔ̃mɔ tamɔ tso wulu, ni eyi baa eboo loo trom ni nu bɛ mli.

³¹ Hewalɔ hewalɛ baatsɔ̃ tamɔ anaanu kpãa; enifeemɔnii baatsɔ̃ lasrɛmi, ni lasrɛmi nɛɛ nɔŋŋ baasɔo anaanu kpãa lɛ naa la, ni mɔ ko bɛ ni aaanyɛ agbe.