Yeremia 7 - ŊMALƐ KRƆŊKRƆŊ LƐ

Yeremia shiɛ yɛ Sɔlemɔ we lɛ

¹ Wiemɔ ni Yehowa kɛ Yeremia wie nɛ,

^2-3 “Yaadamɔ Sɔlemɔ we lɛ agbo lɛ mli koni owie wiemɔ nɛɛ yɛ jɛi. Nyɛ Yudabii fɛɛ ni nyɛtsɔ̃ɔ nɛkɛ agboi nɛɛ amli nyɛyajaa Yehowa, nyɛboa nɔ ni Yehowa, Taiatsɛ, Israel Nyɔŋmɔ lɛ, kɛɔ toi. Nyɛsaa nyɛjeŋba kɛ nyɛnifeemɔnii hu, ni mahã nyɛhi shi yɛ biɛ.

⁴ Nyɛkɛ nyɛhiɛ akafɔ̃a nɛkɛ lakamɔ wiemɔi nɛɛ anɔ akɛ, ‘Yehowa Sɔlemɔ we nɛ! Yehowa Sɔlemɔ we nɛ! Yehowa Sɔlemɔ we nɛ!’

⁵ “Shi moŋ kɛji nyɛtsake nyɛjeŋba kɛ nyɛnifeemɔnii lɛɛlɛŋ, kɛji nyɛkojo mɔ kɛ enaanyo teŋ yɛ jalɛ naa,

⁶ kɛji nyɛyeee gbɔ loo awusã loo okulafo amim, ni nyɛshwieee mɔ ko ni efeko nɔ ko lá shi yɛ shikpɔŋ nɛɛ nɔ yɛ biɛ lɛ, ni nyɛyajaaa nyɔŋmɔi krokomɛi nyɛkɛfeee nyɛ diɛŋtsɛ nyɛhe efɔŋ lɛ,

⁷ no lɛ mahã nyɛhi shi yɛ shikpɔŋ nɛɛ ni mijɛ jeeŋmɔ mikɛhã nyɛtsɛmɛi lɛ nɔ kɛya naanɔ.

⁸ “Naa, nyɛkɛ nyɛhiɛ fɔ̃ɔ lakamɔ wiemɔi ni he bɛ sɛɛnamɔ anɔ.

⁹ Aso nyɛaaju, ni nyɛaagbe gbɔmɔ, ni nyɛaafite gbãlã, ni nyɛaakãmɔ amale kitãi, ni nyɛaashã tsofakɛŋma nyɛkɛhã Baal, ni nyɛaayaja nyɔŋmɔi krokomɛi ni nyɛleee,

¹⁰ kɛkɛ lɛ nyɛba nyɛbadamɔ mihiɛ yɛ mishĩa nɛɛ ni nyɛmiikɛɛ akɛ, ‘Wɔhe eje mli;’ kɛkɛ lɛ no sɛɛ lɛ nyɛtee nyɛyafee nihiinii ni mihiɔ lɛ ekoŋŋ lo?

¹¹ Aso nɛkɛ mishĩa nɛɛ etsɔ̃ julɔi ateemɔhe yɛ nyɛhiɛ lo?

¹² Naa, mi diɛŋtsɛ mina nɔ ni nyɛfeɔ lɛ momo. Nyɛyaa miwe lɛ ni yɔɔ Shilo lɛ, he ni aja mi yɛ tsuutsu lɛ, nyɛyakwɛa nɔ ni mifee yɛ jɛi yɛ mimaŋ Israelbii lɛ anifɔ̃ɔjianii lɛ hewɔ.

¹³ Agbɛnɛ mi, Yehowa, miikɛɛ akɛ akɛni nyɛ hu nyɛfee nibii gbohii nɛɛ fɛɛ eko, ni mikɛ nyɛ ewie aahu, shi nyɛbooo mi toi, ni mitsɛ nyɛ hu nyɛhereee mi nɔ lɛ,

¹⁴ hewɔ lɛ bɔ nɔŋŋ ni mifee Shilo lɛ, nakai pɛpɛɛpɛ mibafee mishĩa nɛɛ ni nyɛkɛ nyɛhiɛ fɔ̃ɔ nɔ, kɛ shikpɔŋ nɛɛ ni mikɛhã nyɛ kɛ nyɛtsɛmɛi lɛ.

¹⁵ Mibashwie nyɛ kɛje mihiɛ tamɔ bɔ ni mishwie nyɛnyɛmimɛi ni ji Efraim shwiei lɛ fɛɛ kɛje mihiɛ lɛ.”

Maŋbii lɛ atoigbele lɛ

¹⁶ Kɛkɛ ni Yehowa kɛɛ Yeremia akɛ, “Bo lɛ kaasɔle okpa fai ohã nɛkɛ gbɔmɛi nɛɛ. Kaafo, ni okasɔle hu ohã amɛ; kaadamɔ mli ohã amɛ yɛ mihiɛ, ejaakɛ miboŋ bo toi.

¹⁷ Ani onaaa nibii ni amɛfeɔ yɛ Yuda maji lɛ amli, kɛ nɔ ni amɛfeɔ yɛ Yerusalɛm blohui lɛ amli lɛ?

¹⁸ Gbekɛbii lɛ yalɛɔ lai kɛbaa, ni amɛtsɛmɛi lɛ shɛreɔ la lɛ, ni yei lɛ kpɔtɔɔ ma lɛ ni akɛshãa aboloo akɛyahãa jemawɔŋ yoo ni amɛtsɛɔ lɛ Ŋwɛi Maŋnyɛ lɛ, ni amɛfɔseɔ dãa amɛshwieɔ shi akɛ afɔle amɛkɛhãa nyɔŋmɔi krokomɛi koni amɛkɛwo mimli la.

¹⁹ Shi mi, Yehowa, miibi akɛ, ‘Aso mi, mimli la amɛwoɔ lɛ lo?’ Ani jeee amɛ diɛŋtsɛ amɛhe mlila amɛwoɔ, ni amɛkɛwoɔ amɛ diɛŋtsɛ amɛhe hiɛgbele lo?

²⁰ No hewɔ lɛ, mi, Yehowa, bɔ ni mikɛɔ nɛ, ‘Naa, mimli baafu, ni mimli baawo Sɔlemɔ we nɛɛ, gbɔmɛi kɛ kooloi kɛ ŋa nɔ tsei kɛ ŋmɔshi niyenii fɛɛ la. Mimlila lɛ naa baawa tamɔ la ni miitso, ni anyɛŋ agbe.’ ”

²¹ Bɔ ni Yehowa, Taiatsɛ, Israel Nyɔŋmɔ lɛ, kɛɛ nɛ, “Nyɛkɛ shãa afɔlei lɛ afata kooloo afɔlei lɛ ahe koni nyɛye loo lɛ;

²² ejaakɛ be ni miyajie nyɛtsɛmɛi lɛ kɛje Ijipt shikpɔŋ lɛ nɔ lɛ, mikɛ amɛ ewieee he, ni asaŋ miwooo amɛ kitã ko yɛ shãa afɔle kɛ kooloo afɔle shãa he.

²³ Shi moŋ miwo amɛ kitã akɛ, ‘Nyɛyea migbee nɔ, ni matsɔ̃ nyɛNyɔŋmɔ, ni nyɛ hu nyɛbaatsɔ̃ mimaŋ; nyɛbaa nyɛjeŋ yɛ kitãi ni miwo nyɛ lɛ anaa, bɔ ni afee ni ahi ahã nyɛ.’

²⁴ Shi amɛbooo mi toi lɛ, amɛyeee migbee nɔ hu; shi moŋ amɛyanyiɛ nɔ ni amɛ diɛŋtsɛ amɛjwɛŋmɔ kɛ amɛtsuii fɔ̃ji ni wa lɛ kɛɛ amɛ lɛ sɛɛ; ni no hewɔ lɛ, amɛ amɛjeŋba fite fe tsutsu lɛ.

²⁵ Kɛjɛ gbi nɔ ni nyɛtsɛmɛi lɛ shi Ijipt shikpɔŋ lɛ nɔ aahu kɛbashi ŋmɛnɛ gbi nɛɛ nɔ lɛ, mikã he miitsu mitsuji ni ji gbalɔi lɛ amɛŋɔɔ be fɛɛ be,

²⁶ shi fɛɛ sɛɛ lɛ amɛbooo mi toi, ni amɛyeee migbee nɔ; shi moŋ amɛfee amɛhe kuɛŋtilɔi, ni amɛfee nifɔɔjianii fe amɛtsɛmɛi lɛ tete.

²⁷ “No hewɔ lɛ, Yeremia, okɛ amɛ baawie nɛkɛ wiemɔi nɛɛ fɛɛ nɛ, shi amɛboŋ bo toi; ni kɛji otsɛ amɛ hu amɛhereŋ bo nɔ.

²⁸ No hewɔ lɛ, kɛɛmɔ amɛ akɛ, ‘Nyɛtsɔ̃ nyɛhe maŋ ni booo Yehowa, nyɛNyɔŋmɔ lɛ toi, ni nyɛkpɛlɛ̃ɛɛ tsɔsemɔ. Anɔkwale egbo yɛ nyɛteŋ, atsiii tã dɔŋŋ po.’ ”

Eshai ni afeɔ yɛ Hinom Jɔɔ lɛ mli

²⁹ “Yerusalɛmbii, nyɛkua nyɛyi nyɛshwiea, nyɛwoa yara yɛ gɔji kpataai lɛ anɔ, ejaakɛ Yehowa ekwa, ni ekpoo yinɔbii ni emli efu amɛ nɛɛ!

³⁰ “Ejaakɛ Yudabii lɛ efee nɔ fɔŋ yɛ mihiɛ. Mi, Yehowa, mikɛɛ. Amɛkɛ amɛmãgãi ni mihiɔ lɛ eyamamɔ miSɔlemɔ we ni ajaa mi yɛ mli lɛ mli, ni amɛkɛbule jɛi.

³¹ Ni amɛyama afɔleshãa latɛ yɛ Tofet yɛ Hinom Jɔɔ lɛ mli, koni amɛgbe amɛbihii kɛ amɛbiyei amɛkɛshã afɔle. Enɛ ji nɔ ko ni mifãko akɛ afee; ebako miyiŋ tete po.

³² Naa, gbii miiba, ni atsɛŋ jɛi akɛ Tofet loo Hinom Jɔɔ dɔŋŋ, shi moŋ abaatsɛ jɛi Gbɔmɔgbee Jɔɔ, akɛni jɛi abaafu gbohii yɛ; ejaakɛ he kroko bɛ ni aaafu amɛ yɛ dɔŋŋ.

³³ Ni nɛkɛ maŋ nɛɛ gbohii lɛ baatsɔ̃ niyenii ahã ŋwɛi loofɔji kɛ shikpɔŋ nɔ kooloi, ni mɔ ko mɔ ko eshwieŋ amɛ.

³⁴ Mafo nyamɔ kɛ miishɛɛ sɛɛ yɛ Yuda maji lɛ kɛ Yerusalɛm blohui fɛɛ amli. Anuŋ ayɛmforo kɛ ayɛmforo wu gbee dɔŋŋ, ejaakɛ shikpɔŋ lɛ baatsɔ̃ amaŋfɔ̃.”