Yeremia 6 - ŊMALƐ KRƆŊKRƆŊ LƐ

Henyɛlɔi basa Yerusalɛm yi

¹ Ao! Nyɛ Benyaminbii, nyɛjoa foi kɛjea Yerusalɛm ni nyɛhere nyɛyiwala. Akpã tɛtɛrɛmantɛrɛ yɛ Tekoa, nyɛkɛ lasu pukɔŋŋ atoa okadi yɛ Bet-Hakerem, ejaakɛ sane fɔŋ ni ji hiɛkpãtãmɔ kpeteŋkple miibu tamɔ oblɔtu kɛmiijɛ kooyigbɛ kɛmiiba.

² Mibakpãtã Zion maŋ Yerusalɛm ni he yɔɔ fɛo ni ehe yɔɔ akɔnɔ lɛ hu hiɛ.

³ Lumɛi kɛ amɛwebii baaba abatua lɛ; amɛbashishii amɛbuui kɛbɔle Yerusalɛm kpula, amɛteŋ mɔ fɛɛ mɔ baato eniyenii he ni esumɔɔ.

⁴ Amɛbaakɛɛ akɛ, “Nyɛhoa ta nyɛwoa lɛ; nyɛtea shi koni wɔfã ta lɛ kɛyatua lɛ shwane!” Shi amɛ nɔŋŋ amɛaakɛɛ akɛ, “Kpoo hã wɔ kɛji wɔtee benɛ ejaakɛ je miina, ni hiɛ miibu ni gbɛkɛ hɔɔŋ lɛ elɛɛ shi kɛtee shɔŋŋ.

⁵ Belɛ nyɛhãa wɔtea shi, ni wɔfã nyɔɔŋ kɛyatuaa lɛ, ni wɔkpãtã emɔji fɛɛfɛji lɛ ahiɛ!”

⁶ Ejaakɛ bɔ ni Yehowa, Taiatsɛ lɛ, kɛɔ nɛ, “Nyɛtoa Yerusalɛm he tsei lɛ nyɛshwiea shi, koni nyɛkɛtswaa kpokui nyɛkɛsaa Yerusalɛm yi. Maŋ ni abaagbala etoi ni, ejaakɛ anaaa nɔ ko nɔ ko yɛ mli fe yiwalɛ saneyeli sɔŋŋ kɛkɛ.

⁷ Bɔ ni nubu baa emli nu yi koni ehi krɔŋŋ lɛ, nakai Yerusalɛm baa enifɔɔji anii lɛ ayi. Henitswiamɔ kɛ niiahiɛkpãtãmɔ he anuɔ yɛ mli; ni hela kɛ pilamɔi sɔŋŋ kɛkɛ minaa yɛ mli.

⁸ Ao, Yerusalɛm, kwɛmɔ ni ahi; kɛjeee nakai lɛ mibashi bo, ni mibafee bo amaŋfɔ̃, ni oootsɔ̃ shikpɔŋ ni mɔ ko mɔ ko ehiŋ nɔ.”

Israel tse atua

⁹ Bɔ ni Yehowa, Taiatsɛ lɛ, kɛɛ nɛ, “Abɛɛ Israelbii ni eshwɛ lɛ ashishi kwraa tamɔ ayeɔ kpɛkpɛo yɛ waintsei anɔ lɛ. Nyɛkpaa tso niji lɛ anɔ ekoŋŋ koni nyɛtserɛ yibii fɛɛ yibii yɛ tsei lɛ anɔ tamɔ bɔ ni wainyibiitselɔ feɔ lɛ.

¹⁰ “Namɛi mikɛaawie, ni mabɔ amɛ kɔkɔ, ni amɛaabo mi toi? Naa, amɛtoii etsimɔ no hewɔ lɛ, amɛnuuu nɔ. Naa, Yehowa wiemɔ lɛ etsɔ̃ hefɛoyeli sane ehã amɛ, ni amɛnaaa he miishɛɛ.

¹¹ Hewɔ lɛ mi hu mimli ewo la naakpa tamɔ Yehowa nɔŋŋ; ni mlila lɛ naatsii etɔ mi.” Kɛkɛ ni Yehowa kɛɛ akɛ, “Fɔsemɔ mimlila lɛ oshwie gbekɛbii ni yɔɔ blohuiaŋ kɛ oblahii akui lɛ hu fɛɛ anɔ. Abaamɔmɔ nuu kɛ eŋa fɛɛ kɛya, ni hiimeji kɛ mɛi ni egbɔlɔ kotokoto hu abaamɔmɔ amɛ.

¹² Amɛshĩai kɛ amɛŋmɔji kɛ amɛŋamɛi fɛɛ aaatsɔ̃mɔ mɛi krokomɛi moŋ anii, ejaakɛ mibagbala shikpɔŋ nɛɛ nɔ bii lɛ atoi. Mi, Yehowa, mikɛɛ.

¹³ Ejaakɛ kɛjɛ amɛteŋ mɔ bibioo nɔ kɛyashi mɔ wulu nɔ lɛ, mɔ fɛɛ mɔ miishishiu mɛi koni ekɛna nii; ni kɛjɛ gbalɔ nɔ kɛyashi osɔfo nɔ lɛ, mɔ fɛɛ mɔ shihilɛ mli lɛ kutumpɔo sɔŋŋ ni.

¹⁴ Amɛtsaa miwebii lɛ apilamɔ lɛ jabejabe ko kɛkɛ, ni amɛkɛɔ amɛ akɛ, ‘Omanye ei! Omanye ei!’ Be mli ni omanye ko kwraa bɛ.

¹⁵ Kɛji amɛfee nihiinii lɛ, ani amɛhiɛ gboɔ he? Dabida, amɛhiɛ gbooo he ekome folo nɛkɛ; amɛhiɛgbele tɔ ejwa. No hewɔ lɛ, be mli ni mibagbala miwebii lɛ atoi lɛ, amɛbaafata mɛi ni baanyɔnyɔi lɛ ahe. No baafee amɛnaagbee. Mi, Yehowa, mikɛɛ.”

Israel kwa Nyɔŋmɔ gbɛ lɛ

¹⁶ Kɛkɛ ni Yehowa kɛɛ akɛ, “Nyɛyadamɔa gbɛjegbɛi lɛ ahe, ni nyɛkwɛ. Nyɛbia he ni blema gbɛi ni ja lɛ ateŋ nɔ ni ji gbɛ kpakpa lɛ yɔɔ koni nyɛnyiɛ no nɔ, ni nyɛsusumai atsuii aaanyɔ amɛmli.” Shi hetoo ni amɛhã ji, “Wɔnyiɛŋ nɔ!”

¹⁷ Kɛkɛ ni Yehowa kɛɛ akɛ, “Naa, miito bulɔi mahã nyɛ, ni miikɛɛ akɛ, ‘Nyɛboa tɛtɛrɛmantɛrɛ gbɛɛmɔ toi, ni nyɛye nɔ.’ Shi amɛkɛɛ akɛ, ‘Wɔboŋ toi!’ ”

¹⁸ No hewɔ lɛ, Yehowa kɛɛ akɛ, “Nyɛ, majimaji kɛ asafoi, nyɛboa nɔ ni baaba gbɔmɛi nɛɛ anɔ lɛ toi.

¹⁹ Shikpɔŋ, bo toi! Miihã hiɛkpãtãmɔ abanina gbɔmɛi nɛɛ, ejaakɛ no ji yibii ni amɛjeŋba ewo; ejaakɛ miwiemɔi lɛ amɛboko toi, ni amɛkwa mimlai lɛ.

²⁰ Mɛni mifeɔ krɔbɔo ni jɛ Sheba, kɛ maŋsɛɛ shɔŋŋ sinamon ni jeɔ ŋma he? Shãa afɔlei ni nyɛshãa nyɛhãa mi lɛ, miheee; nyɛkooloo afɔlei lɛ hu esaa mihiɛ.

²¹ No hewɔ lɛ, bɔ ni Yehowa kɛɔ nɛ, ‘Naa, mato gbɔmɛi nɛɛ pampi, ni amɛbatɛrɛ ni tsɛmɛi kɛ bii kɛ kuuŋnyo kɛ naanyo fɛɛ ahiɛ baakpãtã.’ ”

Aaajɛ kooyigbɛ abatua Yerusalɛm

²² Bɔ ni Yehowa kɛɔ nɛ, “Naa, mɛi komɛi miijɛ kooyigbɛ shikpɔŋ lɛ nɔ kɛmiiba; maŋ wulu ko miifã kɛjɛ shikpɔŋ lɛ naagbeehe tɔ̃ɔ kɛba.

²³ Amɛhiɛ gãi kɛ akplɔ, amɛyi wa, ni amɛnaaa mɔbɔ ni amɛnyiɛmɔ gbɛɔ hoo tamɔ ŋshɔ. Amɛtara okpɔŋɔi anɔ, ni amɛgba ta kɛmiiba; amɛkɛ bo Zion, miiba abawu.”

²⁴ Yerusalɛm kɛɛ, “Wɔnu amɛhe momo; ni no ehã wɔnijiaŋ eje wui, ni wɔtsui efã, ni tamɔ yoo ni miikɔmɔ ni ebaafɔ!

²⁵ Ehiii wɔ kpojee kɛ ŋa lɛ nɔ yaa, tɛmpɔŋi lɛ anɔ nyiɛmɔ hu ebɔ wɔ, ejaakɛ henyɛlɔ lɛ efã klante, ni he fɛɛ he efee gbeyei.”

²⁶ Yehowa kɛɛ, “Ao, mimaŋbii, nyɛkɔlɔa kpekpe nyɛbumɔa, nyɛkokloa shi yɛ lamlu mli, nyɛwoa yara nyɛfoa waa tamɔ afoɔ bi koome ni egbo, ejaakɛ hiɛkpãtãlɔ lɛ baaba ebatua nyɛ trukaa.”

²⁷ “Mifee bo tamɔ shikakalɔ yɛ mimaŋbii lɛ ateŋ koni okpa amɛ shi ni ona bɔ ni amɛyɔɔ.

²⁸ Kaniŋkajelɔi kpanakui sɔŋŋ ji amɛ, ni amɛtsui wa tamɔ akɔɔble loo dade. Amɛ fɛɛ lɛ mɔfitelɔi ji amɛ, amɛyeɔ mɛi ahe osheku kɛfoɔ shi.

²⁹ Afoto lɛ miihuu la lɛ waa diɛŋtsɛ, ni la lɛ eŋãla sumui lɛ fɛɛ. Yakatswaa akã he atsuuɔ sumui lɛ he lɛ, ejaakɛ anyɛɛɛ gbɔmɛi gbohii lɛ ajie yɛŋ ashwie.

³⁰ Atsɛɔ amɛ akɛ jwiɛtɛi shishi, ejaakɛ Yehowa ekpoo amɛ.”