Yeremia 50 - ŊMALƐ KRƆŊKRƆŊ LƐ

Aye Babilon nɔ kunim

¹ Nɔ ni Yehowa tsɔ̃ Gbalɔ Yeremia nɔ ewie yɛ Babilon maŋ lɛ kɛ emli bii lɛ ahe nɛ,

² “Shiɛmɔ koni okɛɛ jeŋ majimaji lɛ, shii aflaŋaa, ni oshiɛ; okashiu nɔ ko nɔ; kɛɛmɔ akɛ Aye Babilon nɔ kunim. Awo lɛ hiɛgbele Mardruk werɛ eho ehe. Ashwie Babilon amãgãi lɛ ahiɛ shi, amɛnaa diɛŋtsɛ ekpɛ amɛhe.

³ “Ejaakɛ maŋ ko efã ta kɛjɛ kooyigbɛ kɛmiiba ebatua Babilon, ni ebaahã Babilon atsɔ̃ amaŋfɔ̃ bɔ ni gbɔmɔ ni jio, kooloo ni jio, fɛɛ baajo foi ashi jɛi, ni nɔ ko nɔ ko ehiŋ jɛi.”

Israelbii asɛɛkuu

⁴ Yehowa kɛɛ akɛ, “Nakai be lɛ mli lɛ, Israelbii lɛ kɛ Yudabii lɛ fɛɛ tswɛm baabua amɛhe naa amɛba kɛ yaafo amɛbatao Yehowa, amɛNyɔŋmɔ lɛ, sɛɛgbɛ.

⁵ Amɛbaabi he ni gbɛ ni yaa Zion lɛ kã, ni amɛbaatsɔ̃ amɛhiɛ amɛhã jɛi gbɛ, ni amɛaakɛɛ akɛ, ‘Nyɛbaa koni wɔ kɛ Yehowa ayakpãŋ kpãŋmɔ ni akuŋ mli asaŋ ni hiɛ kpaŋ nɔ kɛaatee naanɔ.’

⁶ “Mimaŋbii lɛ tamɔ toi ni elaaje; amɛnɔkwɛlɔi lɛ ehã amɛdu gbɛ, amɛkpala amɛ kɛnyiɛ gɔji anɔ, amɛkɛ amɛ ejɛ gɔŋ wulu nɔ kɛtee gɔŋ bibioo nɔ, ni shĩagbɛ elaaje amɛ.

⁷ Mɛi fɛɛ ni naa amɛ lɛ kpãtãa amɛhiɛ, ni amɛhenyɛlɔi lɛ kɛɔ akɛ, ‘Wɔyeee fɔ, ejaakɛ amɛfee esha amɛshi Yehowa, mɔ ŋɔɔ ni amɛshihilɛhe diɛŋtsɛ yɔɔ lɛ, ni ji amɛtsɛmɛi lɛ ahiɛnɔkãmɔ lɛ.’

⁸ “Nyɛjoa foi yɛ Babilon; nyɛshia Babilonbii ashikpɔŋ lɛ nɔ. Nyɛfea nyɛhe tamɔ tookpakpoi kɛnyiɛ tookui lɛ ahiɛ.

⁹ Ejaakɛ naa, mitee maji wuji shi yɛ kooyigbɛ shikpɔŋ lɛ nɔ, ni mikɛ amɛ miiba abatua Babilon. Amɛbaagba ta amɛwo Babilon, ni jɛigbɛ abaajɛ aye Babilon nɔ kunim. Amɛgãii lɛ tamɔ hii kãkãlɔi ni jɛɛɛ ta mli baaa shĩa kɛ amɛniji nyɔŋma.

¹⁰ Abaaha Babilon, ni mɛi fɛɛ ni baayaha Babilon lɛ baana nii bɔ ni amɛtsuii baatɔ. Mi, Yehowa, mikɛɛ.”

Babilon shigbeemɔ

¹¹ Yehowa kɛɛ akɛ, “Nyɛ mɛi ni nyɛha miwebii anii, eyɛ mli akɛ nyɛmiinya, ni nyɛmli efili nyɛ tamɔ tsinabi oblayoo ni miigbɛlɛ abele; ni nyɛmiibolɔ tamɔ okpɔŋɔ nuu moŋ nɛ,

¹² shi naa, nyɛ nyɛhiɛ baagbo kpɔtɔɔ; yoo ni fɔ nyɛ lɛ, ehiɛ baashwie shi pam. Naa, nyɛmaŋ wulu lɛ baatsɔ̃ shikpɔŋ lɛ nɔ maji lɛ ateŋ bibioo fe fɛɛ; ebaatsɔ̃ ŋa kpataa ni enɔ egbi tamɔ shiaŋa.

¹³ Ejaakɛ Yehowa mlifu naa lɛ, adesa ko ehiŋ jɛi, shi ebaatsɔ̃ amaŋfɔ̃ kwrakwra. Mɔ fɛɛ mɔ ni aaatsɔ̃ Babilon he kɛho lɛ naa aaakpɛ ehe, ni eeebo lɛ ‘gbeeakle’ yɛ bɔ ni afee lɛ lɛ hewɔ.

¹⁴ “Nyɛ gãitsɛ̃lɔi, nyɛgbaa ta kɛbɔlea Babilon he kɛkpea. Nyɛtsɛ̃rɛa lɛ nyɛgãii lɛ, nyɛkasɛ̃sɛ̃a gãimlibii lɛ ahe, ejaakɛ Babilon efee esha eshi Yehowa.

¹⁵ Nyɛbɔa oshe kɛbɔlea lɛ. Babilon ehole eniji anɔ akɛ enyɛɛɛ ta lɛ dɔŋŋ; ehe gbogboi lɛ ewule, akumɔ amɛ ashwie shi, ejaakɛ Yehowa oweletɔɔ ji no. Nyɛtɔa nyɛhe owele yɛ enɔ; bɔ ni efee mɛi komɛi lɛ, nyɛ hu nyɛfea lɛ nakai nɔŋŋ.

¹⁶ Nyɛkaŋmɛa mɔ ko gbɛ ni edu nii yɛ Babilon, ni nyɛkaŋmɛa mɔ ko gbɛ ni ekpã ŋmɔshinii yɛ Babilon. Henyɛlɔi aklante hewɔ lɛ mɔ fɛɛ mɔ baatao emaŋbii asɛɛgbɛ, ni ebaajo foi kɛya lɛ diɛŋtsɛ eshikpɔŋ nɔ.”

Israelbii lɛ asɛɛkuu kɛbaa

¹⁷ “Israel tamɔ toi ni gbɔbimɔ ni jatai gbɔbiɔ amɛ hewɔ lɛ, ehã amɛgbɛ amɛshwã. Asiria maŋtsɛ lɛ klɛŋklɛŋ ji mɔ ni ye eloo, ni sɛɛkpee be nɛɛ mli lɛ, Babilon Maŋtsɛ Nebukadnezar ji mɔ ni ekpe ewui lɛ.

¹⁸ No hewɔ lɛ, nɔ ni Yehowa Taiatsɛ, Israel Nyɔŋmɔ lɛ kɛɔ nɛ, ‘Naa, mibagbala Babilon maŋtsɛ kɛ emaŋ lɛ fɛɛ toi tamɔ bɔ ni migbala Asiria maŋtsɛ lɛ toi lɛ.

¹⁹ Mibakpale Israel kɛba lɛ diɛŋtsɛ eshikpɔŋ nɔ ekoŋŋ, ni ebaaye Karmel kɛ Bashan shikpɔji lɛ anɔ nii, ni eeetɔ kɛ Efraim kɛ Gilead gɔji lɛ anɔ nii lɛ.

²⁰ Kɛji nakai be lɛ shɛ lɛ, aaatao nishaianii yɛ Israel, shi anaŋ eko, ni anaŋ esha ko yɛ Yuda hu, ejaakɛ mɛi fɛɛ ni mibahã ashwɛ lɛ, maŋɔ amɛhe mafa amɛ. Mi Yehowa, mikɛɛ.’ ”

Nyɔŋmɔ baagbala Babilon toi

²¹ “Nyɛfãa nyɛyatuaa Merataimbii kɛ Pekodbii lɛ. Nyɛgbea amɛ, nyɛnyiɛa amɛsɛɛ, nyɛplenea amɛ kwrakwra. Mi, Yehowa, mikɛɛ; nyɛfea bɔ ni mifã nyɛ akɛ nyɛfee lɛ pɛpɛɛpɛ.

²² Aanu tawuu he yɛ shikpɔŋ lɛ nɔ, ni aakpãtã nibii ahiɛ pam.

²³ Te aye tɛŋŋ ni jeŋjeŋ fɛɛ hamle lɛ ajwara lɛ ni akumɔ lɛ ashwie shi nɛɛ? Te aye tɛŋŋ ni Babilon etsɔ̃ gbeyei nɔ yɛ maji ateŋ nɛɛ?

²⁴ Ao, Babilon, mitsɔ̃ bo tsɔne, ni odu; shi oleee; ana bo, ni amɔ bo, ejaakɛ okɛ Yehowa fu daa.

²⁵ Yehowa egbele etawuu nibii atoohe lɛ naa, ni ejie emlifu tawuu nibii lɛ kpo, ejaakɛ Nuŋtsɔ Nyɔŋmɔ Taiatsɛ lɛ, yɛ nitsumɔ ni ebaatsu yɛ Babilonbii ashikpɔŋ lɛ nɔ.

²⁶ Nyɛjɛa hei fɛɛ nyɛbatuaa lɛ, nyɛjwaraa eboŋoi ashinai lɛ; nyɛbuaa haanii lɛ anaa tamɔ ŋmaa kei, ni nyɛkpãtãa maŋ lɛ hiɛ butuu, ni nyɛkashĩa enɔ ko nɔ ko.

²⁷ Nyɛgbea Babilon hii lɛ tamɔ agbeɔ tsina hii; nyɛkpalaa amɛ kɛyaa nyɛyagbea amɛ fɛɛ tswɛm. Kpoo hã amɛ! Ejaakɛ amɛtoigbalamɔ be lɛ eshɛ.

²⁸ “Naa, mɛi ni eje gbele mli lɛ ejo foi kɛjɛ Babilon shikpɔŋ lɛ nɔ kɛtee Yerusalɛm, ni amɛmiigba akɛ Yehowa, wɔNyɔŋmɔ lɛ, etɔ eSɔlemɔ we lɛ he owele.

²⁹ “Nyɛtsɛa gãitsɛ̃lɔi lɛ nyɛwoa Babilon he, mɔ fɛɛ mɔ ni le gãitsɛ̃mɔ aya eko. Nyɛsaa maŋ lɛ yi kɛkpea; ni nyɛkahãa mɔ ko naa fɔijee hegbɛ. Bɔ ni Babilon fee mɛi komɛi lɛ nyɛkɛ lɛ ayea nakai nɔŋŋ, ejaakɛ ekɛ Yehowa, Israel Mɔ Krɔŋkrɔŋ lɛ, fũ daa.

³⁰ No hewɔ lɛ, abaagbegbee eblahii lɛ ashwã eblohuiaŋ, ni abaaplene etabilɔi lɛ fɛɛ yɛ nakai be lɛ mli. Mi Yehowa, mikɛɛ.

³¹ “Bo maŋhewolɔ, naa, mi kɛ bo ena. Nuŋtsɔ Nyɔŋmɔ Taiatsɛ lɛ, kɛɛ, ejaakɛ ogbi lɛ eshɛ be ni mibagbala otoi lɛ.

³² Hewolɔ lɛ baatɛ, ni ebaagbee shi, ni enaŋ mɔ ko awo enɔ. Mibama emaji wuji lɛ anaa la, ni ebaashã nɔ fɛɛ nɔ ni bɔle lɛ.”

³³ Bɔ ni Yehowa, Taiatsɛ, kɛɛ nɛ, “Aaye Israelbii lɛ kɛ Yudabii lɛ hu fɛɛ anɔ keketee; ni mɛi ni baŋɔ amɛ nom lɛ hiɛ amɛ kpɛŋŋ, ni amɛŋmɛɛɛ amɛ gbɛ koni amɛya amɛmaŋ.

³⁴ Shi amɛ-Kpɔlɔ lɛ he wa, ni egbɛi ji Yehowa Taiatsɛ lɛ. Ye kɛ̃ ebaaye amɛsane lɛ ehã amɛ koni hejɔlɛ aba shikpɔŋ lɛ nɔ; shi Babilonbii lɛ, haomɔ ji nɔ ni baanina amɛ.”

³⁵ Yehowa kɛɛ akɛ, “Ta baanina Babilon, gbele baanina emaŋbii kɛ elumɛi lɛ kɛ enilelɔi lɛ.

³⁶ Ta baanina okɔmfoi nifeelɔi lɛ, ni amɛaatsɔ̃mɔ kwashiai. Ta baanina ehii kãkãlɔi lɛ, koni amɛhiɛ akpãtã.

³⁷ Ekpɔŋɔi kɛ taayaa shwiilii lɛ ahiɛ baakpãtã; maŋsɛɛ tabilɔi ni futu amɛ lɛ, hu ahiɛ baakpãtã; ni amɛaatsɔ̃mɔ tamɔ yei! Abaagbɛ amɛ ashwã koni aha amɛ.

³⁸ Nu enɛŋ, hewɔ lɛ fai fɛɛ baaŋala, ejaakɛ Babilon eyi tɔ kɛ amãgãi, ni amãgãi nɛɛ asɔ̃ɔmɔ eye amɛ sɛkɛ.

³⁹ “No hewɔ lɛ, Babilon baatsɔ̃ klaŋ odigblɛmi kɛ ŋaŋ kooloi krokomɛi ashihilɛhe; duguma baahi jɛi, gbɔmɛi ehiŋ jɛi dɔŋŋ kɛaatee naanɔ; ni asaŋ gbɔmɔ adesa yinɔ ko yinɔ ko ehiŋ jɛi dɔŋŋ kɛmiiya naanɔ,

⁴⁰ tamɔ bɔ ni Nyɔŋmɔ butu Sodom kɛ Gomora kɛ amɛhewɔ majimaji lɛ bɔ ni mɔ ko ehiii jɛi, ni asaŋ mɔ ko ni jɛ yoo musuŋ eyatoŋ gbɔ yɛ jɛi lɛ, mi Yehowa mikɛɛ.

⁴¹ “Naa, maŋ wulu ko miijɛ kooyigbɛ aba, maŋ ko ni he wa, kɛ maŋtsɛmɛi babaoo miijɛ je lɛ naagbeehei shɔŋŋ diɛŋtsɛ amɛba kɛ ta.

⁴² Amɛhiɛ amɛgãi kɛ akplɔi; amɛyi wa, ni amɛnaaa mɔbɔ. Kɛji anu amɛkpɔŋɔi ni amɛtara amɛnɔ lɛ ahe lɛ, egbɛɔ tamɔ ŋshɔ. Amɛmia tamɔ nuu ni miiya ta. Ao! Babilon, amɛmiiba amɛkɛ bo abawu.

⁴³ Babilon maŋtsɛ nu amɛhe pɛ, kɛkɛ ni enijiaŋ je wui, ni etsui fã tamɔ yoo ni miikɔmɔ ni ebaafɔ.

⁴⁴ “Naa, mafã tamɔ jata ni ejɛ Yordan Faa lɛ he koo hayii lɛ mli ni ebatua kooloi yɛ jwɛifɔ ŋa nɔ, ni mahã amɛjo foi trukaa kɛje jɛi; ni mi diɛŋtsɛ mafã mɔ ko koni eye maŋ lɛ nɔ. Ejaakɛ namɔ tamɔ mi? Namɔ baanyɛ mi ekɛfu daa? Namɔ baanyɛ mi mihiɛ edamɔ?

⁴⁵ No hewɔ lɛ, nyɛboa bɔ ni Yehowa esusu yɛ Babilon shikpɔŋ lɛ he kɛ bɔ ni eto eyiŋ ni ebaafee Babilon shikpɔŋ lɛ nɔ bii ehã lɛ toi. Bɔ fɛɛ bɔ ni fee lɛ abaashãtã amɛbii bibii kɛya maŋsɛɛ, ni maŋbii ahe baajɔ̃ amɛhe yɛ nɔ ni baaba amɛnɔ lɛ hewɔ.

⁴⁶ Kɛji anu he akɛ aŋɔ Babilon nom lɛ, shikpɔŋ baahoso, ni abaanu Babilon awerɛho blɔmɔ yɛ majimaji lɛ anɔ.”