Yeremia 5 - ŊMALƐ KRƆŊKRƆŊ LƐ

Esha ni Yerusalɛm fee

¹ Nyɛjoa foi kɛyaa kɛbaa yɛ Yerusalɛm gbɛjegbɛi lɛ anɔ, koni nyɛkadi nɔ ni nyɛbaana. Nyɛtaoa yɛ Yerusalɛm blohuiaŋ akɛ nyɛaana mɔ ko ni eyeɔ jalɛ sane ni taoɔ akɛ eye anɔkwa lo? Kɛji nyɛaana lɛ, no lɛ mikɛ Yerusalɛm he aaafa lɛ.

² Tsɛbelɛ amɛkɛɔ akɛ, “Wɔna Yehowa” shi amale kitã amɛkãa lɛ.

³ Ao, Yehowa, aso jeee anɔkwayeli gbɛ okwɛɔ kɛjɛ amɛdɛŋ? Otswia amɛ nii, shi ewaaa amɛhe. Oplenee amɛ, shi amɛkɛkaseee nii. Amɛkpliŋ amɛtsui moŋ fe kũatɛ, ni amɛmiii tsuitsakemɔ.

⁴ Kɛkɛ ni mikɛɛ akɛ, “Gbɔmɛi ni bɛ gbɛi nɛ: no hewɔ lɛ, amɛleee nii; ejaakɛ amɛleee bɔ ni Yehowa taoɔ akɛ gbɔmɔ aba ejeŋ ehã; amɛleee amɛNyɔŋmɔ lɛ mla lɛ.

⁵ Maya gbɔmɛi wuji lɛ aŋɔɔ koni mikɛ amɛ ayawie; ejaakɛ amɛ lɛ, amɛle jeŋba gbɛ ni Yehowa kpaa, ni ji amɛNyɔŋmɔ lɛ mla lɛ.” Shi amɛ fɛɛ kwa amɛkwa Yehowa nɔyeli lɛ. amɛtserɛ nɔyeli kpãi ni fimɔ amɛ lɛ.

⁶ No hewɔ lɛ, jata ko aaafã kɛaajɛ koo lɛ mli ebagbe amɛ; Klaŋ ko aaajɛ shiaŋa lɛ nɔ aba ni ebakpãtã amɛhiɛ. Mlaŋtswi ko ewo ka yɛ amɛmaji lɛ ahe; ni mɔ fɛɛ mɔ ni aaajɛ amɛmli aje kpo lɛ, eeetserɛ emli; ejaakɛ amɛtɔ̃mɔi lɛ fa tsɔ̃, kwamɔ ni amɛkwa mi lɛ naa wa.

⁷ “Te aaafee tɛŋŋ manyɛ mikɛfa bo hu? Obii lɛ kwa mi, ni amɛtsɛɔ nibii ni jeee nyɔŋmɔi amɛkɛkãa kitã. Kɛji mihã amɛ nii amɛye ni amɛtɔrɔ lɛ, kɛkɛ lɛ amɛje mi, amɛwu lɛ, sɛɛ amɛtee ajwamãŋi awe.

⁸ Okpɔŋɔhii ni alɛ amɛ jogbaŋŋ ni, ni eko fɛɛ eko bolɔɔ kɛnyiɛɔ enaanyo ŋa sɛɛ.

⁹ Mi, Yehowa, miibi akɛ, ‘Mikagbala amɛtoi yɛ enɛɛmɛi ahewɔ ni mikɛtɔ mihe owele yɛ maŋ ni tamɔ nɛkɛ nɛɛ nɔ lo?’

¹⁰ “Abote ewain tromi lɛ amli ni afolɔ waintsei lɛ ashwie, shi moŋ akafite tromi lɛ kwraa kɛmɔ shi. Akplɔ etsei aniji lɛ ashwie. Ejaakɛ amɛjeee mi, Yehowa, minii.

¹¹ Ejaakɛ Israelbii lɛ kɛ Yudabii lɛ fɛɛ yeee mi anɔkwa kwrakwra, Mi, Yehowa, mikɛɛ.”

Yehowa kwa Israel

¹² Yehowa webii lɛ emale yɛ Yehowa he, ejaakɛ amɛkɛɛ akɛ, “Efeŋ wɔ nɔ ko; nɔ fɔŋ ko baŋ wɔnɔ; ta ko ebaninaŋ wɔ, ni wɔyeŋ hɔmɔ hu.

¹³ Gbalɔi lɛ awiemɔ baatsɔ̃ kɔɔyɔɔ, ejaakɛ jeee Yehowa naa wiemɔi amɛwie lɛ. Bɔ ni abaafee amɛ nɛ!”

¹⁴ No hewɔ lɛ, bɔ ni Yehowa, Nyɔŋmɔ Taiatsɛ, kɛɛ nɛ, “Akɛni gbɔmɛi nɛɛ ewie wiemɔi nɛɛ hewɔ lɛ, naa Yeremia, miihã miwiemɔ lɛ atsɔ̃ la yɛ odaaŋ, ni maŋbii lɛ baatsɔ̃ lai, ni la lɛ baashã amɛ wɛɛ.

¹⁵ Nyɛ Israelbii, naa, miihã maŋ ko ajɛ shɔŋŋ aba koni ebatua nyɛ. Eji blema maŋ, ni ehe wa naakpa; maŋ ko ni nyɛnuuu ewiemɔ, ni kɛji awie tete lɛ nyɛnuuu shishi. Mi, Yehowa, mikɛɛ.

¹⁶ Amɛgãimlibii akotoku lɛ tamɔ gbonyobu ni naa kã. Hii kãkãlɔi sɔŋŋ ji amɛ,

¹⁷ ni amɛbaaye nyɛŋmɔshinii ni nyɛkpa kɛ niyenii fɛɛ, ni amɛbaagbegbee nyɛbihii kɛ nyɛbiyei lɛ amɛye; amɛbaagbegbee nyɛtoi kɛ tsinai amɛye, ni amɛbaaye nyɛwaintsei kɛ agbãmitsei ayibii fɛɛ; ni nyɛmaji ni atswa gbogbo awo amɛhe ni nyɛhiɛ kã nɔ lɛ, amɛbaafite fɛɛ.”

¹⁸ Kɛkɛ ni Yehowa kɛɛ akɛ, “Shi kɛ̃lɛ nakai be lɛ mli po lɛ, mikpãtãŋ nyɛhiɛ kɛwulaŋ shi.

¹⁹ Ni, Yeremia, kɛji omaŋbii lɛ kɛɛ akɛ, “ni mɛni hewɔ Yehowa, wɔNyɔŋmɔ lɛ, ye wɔ nɛkɛ sane?” lɛ, okɛɛ amɛ akɛ, “tamɔ bɔ ni nyɛkwa mi, Yehowa, ni nyɛyaja maŋsɛɛbii anyɔŋmɔi yɛ nyɛ diɛŋtsɛ nyɛshikpɔŋ lɛ nɔ lɛ, nakai nyɛbaaya nyɛyasɔ̃mɔ maŋsɛɛbii yɛ shikpɔŋ ni ejeee nyɛnɔ nɔ.”

Nyɔŋmɔ bɔ ewebii kɔkɔ

²⁰ Kɛkɛ ni Yehowa kɛɛ akɛ, “Nyɛkɛa Yakob shwiei lɛ, ni nyɛkɛa Yuda shwiei lɛ hu akɛ,

²¹ nyɛboa enɛ toi koo! Kwashiai ni bɛ jwɛŋmɔ, ni nyɛyɔɔ hiŋmɛii shi nyɛnaaa nii, asaŋ nyɛyɔɔ toii hu shi nyɛnuuu nii.

²² Ani nyɛsheee mi gbeyei; nyɛhe kpokpooo yɛ mi, mihiɛ? Mi, ni mikɛ shia fo husu mikɛsa ŋshɔ naa, naanɔ husu ko ni ŋshɔ nyɛŋ eteke kɔkɔɔkɔ, husu ko ni bɔ fɛɛ bɔ ni ŋshɔkei aaashimɔ lɛ ahã lɛ, amɛnyɛŋ amɛwule lɛ, ni bɔ fɛɛ bɔ ni ŋshɔ aaafee hamahama ahã lɛ enyɛŋ lɛ eteke lɛ?

²³ Shi nɛkɛ gbɔmɛi nɛɛ akuɛŋ ti, ni atuatselɔi ni; amɛgba afã, ni amɛshi mi amɛtee.

²⁴ Amɛkɛɛɛ amɛhe akɛ, ‘Nyɛhãa wɔshea Yehowa, wɔNyɔŋmɔ lɛ, gbeyei, lɛ mɔ ni ehãa nu nɛɔ Gbo kɛ Agbiɛnaa yɛ ebe mli hãa wɔ lɛ, ni ehãa nikpamɔ bei baninaa wɔ lɛ.’

²⁵ Nyɛnishaianii lɛ ehã enɛɛmɛi fɛɛ eŋmɛɛ nyɛ, ni nyɛhe eshai lɛ ehã nɔ kpakpa ebɔ nyɛ.

²⁶ “Ejaakɛ mɛi fɔ̃ji yɛ mimaŋbii lɛ ateŋ; amɛwoɔ gbɔmɛi ka tamɔ loofɔlɔdulɔi woɔ antɛo lɛ; ni amɛtsɔ̃ɔ tsɔnei amɛkɛduɔ gbɔmɛi.

²⁷ Amɛshĩai amli eyimɔ obɔ̃bɔ̃ kɛ mɔshishiumɔ tamɔ loofɔlɔ tsu ni eyi obɔ̃ kɛ loofɔji. No hewɔ lɛ, amɛna nii, ni amɛtsɔ̃mɔ mɛi wuji,

²⁸ amɛshwishwii, ni amɛhewolo hiɛ kpɛlɛɔ; amɛyeɔ sane fɔŋ hoɔ he, ni amɛkojooo yɛ jalɛ naa amɛhãaa awusa, bɔ ni afee ni ahi ahã lɛ; amɛfãaa ohiafo gbɛnaa he amɛhãaa lɛ hu.

²⁹ “Mi, Yehowa, miibi akɛ, ‘Mikagbala amɛtoi yɛ enɛɛmɛi ahewɔ, ni mikatɔ mihe owele yɛ maŋ ni tamɔ nɛkɛ nɔ lo?

³⁰ Afee naakpɛɛnii kɛ gbeyeinii yɛ shikpɔŋ lɛ nɔ.

³¹ Gbalɔi lɛ gbaa amale gbalɛi, ni nɔ ni amɛkɛɔ osɔfoi lɛ no osɔfoi lɛ feɔ, ni nɔ ni afeɔ lɛ ŋɔɔ mimaŋbii lɛ hu anaa. Shi kɛji naagbee be lɛ shɛ lɛ, te nyɛbaafee tɛŋŋ?’ ”