Yeremia 49 - ŊMALƐ KRƆŊKRƆŊ LƐ

Yehowa baagbala Amon toi

¹ Nɔ ni Yehowa kɛɛ yɛ Amonbii ahe nɛ, “Ani Israel bɛ bihii, aloo Israel bɛ mɛi ni yeɔ enii hewɔ ni mɛi ni jaa wɔŋ Molek lɛ ebaŋɔ Gadbii ashikpɔŋ, ni amɛbahi jɛi maji lɛ amli lɛ?

² Naa, mi Yehowa, miikɛɛ akɛ be miiba, be ni mahã mɛi ni yɔɔ Amonbii amaŋ wulu Raba lɛ mli anu ta oshebɔɔ he. Ebaatsɔ̃ koikoi, ni abaashã ekrowai lɛ wɛɛ kɛmɔ shi, ni Israel baaye mɛi ni baye enɔ lɛ anɔ. Mi, Yehowa, mikɛɛ.

³ Ao Heshbon, wɔ lele, shi akpãtã Ai maŋ lɛ hiɛ. Nyɛ Raba yei, nyɛfoa, nyɛmiaa kɛ kpekpe, nyɛyea ŋkɔmɔ; nyɛjoa foi kɛyaa kɛbaa yɛ koowieiaŋ, ejaakɛ abaaloo nyɛwɔŋ Molek kɛ ewulɔmɛi lɛ kɛ esɔ̃ɔlɔi lɛ kɛya nomŋɔɔ mli.

⁴ Nyɛ ni nyɛkwa nyɛhemɔkɛyeli, mɛɛba ni nyɛshwãa nyɛfɔ̃ɔ nyɛhewalɛ ni miigbɔjɔ nɔ, ni nyɛkɛɔ akɛ, ‘Namɔ baanyɛ shi ete ewo wɔ?’

⁵ Naa, nɔ ni mi, Yehowa, mikɛɔ nyɛ ji akɛ mibahã mɛi fɛɛ ni bɔle nyɛ abahɛŋ nyɛ kɛ tsuifãa sane, ni abaashwie nyɛ, ni mɔ fɛɛ mɔ baajo foi bɔ ni ekwɛŋ esɛɛ tete, ni mɔ ko ehiŋ shi ni baabua foijelɔi lɛ anaa.

⁶ Shi naagbee mli lɛ mibahã Amonbii anine ashɛ nibii ni eŋmɛɛ amɛ lɛ fɛɛ nɔ. Mi, Yehowa, mikɛɛ.”

Yehowa baagbala Edombii atoi

⁷ Nɔ ni Yehowa, Taiatsɛ kɛɛ yɛ Edombii ahe nɛ, “Ani nilee bɛ Teman dɔŋŋ? Ani ŋaawoo elaaje hiɛshikãlɔi lo? Ani amɛnilee etã?

⁸ Nyɛ Dedanbii, nyɛdɔa nyɛyi, ni nyɛjoa foi nyɛyatea nyɛhe yɛ nififiaŋ bui amli, ejaakɛ mibahã amanehulu aba Esaubii anɔ.

⁹ Kɛji wainyibiitselɔi ba nyɛŋɔɔ lɛ, ani amɛshiii yibii lɛ ashishi ni aye lɛ kpɛkpɛo lo? Aloo kɛji julɔi tete ba oŋmɔshinii juu nyɔɔŋ lɛ, amɛjuuu bɔ pɛ ni amɛtaoɔ lo?

¹⁰ Shi naa, mi lɛ mifee Esaubii pasaa; mijie amɛteemɔhei lɛ kpo, ni amɛnyɛŋ amɛhe amɛtee dɔŋŋ. Akpãtã Edombii kɛ amɛnyɛmimɛi kɛ amɛshwiei kɛ amɛnanemɛi fɛɛ ahiɛ. Ŋmɛnɛ, Edom bɛ nɔ ko mli dɔŋŋ.

¹¹ Shi owusai lɛ ohã mi; mibakwɛ amɛnɔ shweshweeshwe; ni hã okulafoi lɛ ahe mi aye.”

¹² Ejaakɛ bɔ ni Yehowa kɛɛ nɛ, “Kɛji mɛi ni kulɛ esaaa akɛ agbalaa amɛtoi lɛ abaagbala amɛtoi lɛ, ani bo lɛ obaaye ohe? Oŋɔŋ ohe oyeŋ tswaa; esa akɛ agbala otoi kɛ̃.

¹³ Ejaakɛ mikã mi diɛŋtsɛ mihe kitã akɛ Bozra sane lɛ baafee gbeyei, abaabɔ lɛ ahora, ni abaakpãtã ehiɛ ni akɛ egbɛi baakã kitã ni emaji fɛɛ baatsɔ̃mɔ amaŋfɔ̃ kɛya naanɔ.”

¹⁴ Minu saji ni jɛ Yehowa ŋɔɔ; ni awo bɔfo hu gbɛ kɛtee majimaji lɛ anɔ kɛ wiemɔ akɛ, “Nyɛbuaa nyɛtabilɔi anaa kɛkpea koni nyɛbatua Edom.

¹⁵ Ejaakɛ naa, mibaba bo shi kwraa yɛ majimaji lɛ ateŋ, ni ohe guɔ baagbo yɛ mɛi ahiɛ.

¹⁶ Bo mɔ ni ohɔ tɛkplo mli, kɛ bo mɔ hu ni oyɔɔ gɔŋ yiteŋ, oshishiu bo diɛŋtsɛ ohe kɛ gbeyei ni owo ohe kɛ ohe ni owo lɛ. Kɛji oshihilɛhe yɛ ŋwɛi shɔŋŋ niiaŋ tete po tamɔ okropɔŋ feɔ lɛ, mibaba bo shi.” Yehowa, kɛɛ.

¹⁷ “Edom sane baatsɔ̃ gbeyei nɔ, ni mɔ fɛɛ mɔ ni baatsɔ̃ Edom he kɛho lɛ baashe gbeyei, ni ebaabo lɛ ‘gbeeakle’.

¹⁸ Bɔ ni atsɔ abutu Sodom kɛ Gomora kɛ amɛhewɔ maji lɛ, mi, Yehowa miikɛɛ akɛ nakai nɔŋŋ abaafee Edom bɔ ni mɔ ko mɔ ko ehiŋ jɛi, ni mɔ ko hu eyatoŋ gbɔ yɛ jɛi.

¹⁹ Naa, bɔ ni jata fãa kɛjɛɔ Yordan Faa he koo hayii mli kɛbaa ebatuaa too ku yɛ amɛniyelihe lɛ, nakai mibaba trukaa, ni mahã Edombii ajo foi amɛshi amɛshikpɔŋ lɛ nɔ, ni mi, mibato mɔ ni misumɔɔ koni eye Edom nɔ. Ejaakɛ namɔ kɛ mi ye egbɔ? Namɔ baanyɛ mi sane ebi? Mɛɛ maŋ hiɛnyiɛlɔ baanyɛ mihiɛ edamɔ?

²⁰ No hewɔ lɛ, nyɛboa yiŋ ni mi, Yehowa, mito yɛ Edom he, kɛ nɔ ni mikpãŋ akɛ mafee Temanbii toi. Abaashãtã amɛbii bibii lɛ tete po kɛaatee, ni mɔ fɛɛ mɔ he baajara lɛ yɛ nɔ ni baaba amɛnɔ hewɔ.

²¹ Edom shigbeemɔ lɛ baahã shikpɔŋ tete ahoso, ni blɔmɔ ni amɛbaablɔ lɛ abaanu yɛ Akaba Bele lɛ kpokpai anɔ tɔ̃ɔ.

²² Naa, nakai be lɛ mɔ ko baagba shi shwiaa kɛba tamɔ okropɔŋ ni egbɛ efijiaŋ kɛbatua Bozra, ni Edom hii kãkãlɔi lɛ atsui baatsɔ̃ tamɔ yoo ni miikɔmɔ tsui.”

Yehowa baagbala Damaskobii atoi

²³ Nɔ ni Yehowa kɛɛ yɛ Damaskobii ahe nɛ, “Hamatbii kɛ Arpadbii ejijaa, ejaakɛ amɛnu sane fɔŋ; amɛtsui efã fe nine, ni amɛyoyro; amɛfee tamɔ ŋshɔ ni efee hamahama ni amɛnaaa hejɔlɛ.

²⁴ Damaskobii egbɔjɔ, ni amɛtsɔ̃mɔ amɛsɛɛ koni amɛjo foi; ŋmiŋmi emɔmɔ amɛ; amɛhe miijara amɛ, ni amɛmiiye ŋkɔmɔ tamɔ yoo ni miikɔmɔ.

²⁵ Te aye tɛŋŋ ni maŋ ni miishɛɛ yɔɔ mli sa lɛ, ajwa sam ashi lɛ nɛɛ?

²⁶ Nakai gbi lɛ nɔ lɛ eblahii lɛ baanyɔnyɔi yɛ eblohuiaŋ, ni abaaplenee etabilɔi lɛ fɛɛ. Mi, Yehowa Taiatsɛ, mikɛɛ.

²⁷ Mama Damasko maŋ lɛ he gbogbo lɛ naa la, ni ebaashã Maŋtsɛ Ben-Hadad mɔji lɛ blublu.”

Agbala Kedar kɛ Hazar Maŋ wulu lɛ toi

²⁸ Nɔ ni Yehowa kɛɛ yɛ Kedar kɛ maji bibii ni yɔɔ Hazor maŋ lɛ shishi ni Maŋtsɛ Nebukadnezar ye amɛnɔ lɛ ahe nɛ, Bɔ ni, Yehowa, kɛɛ nɛ, “Nyɛtea shi, nyɛyatuaa Kedar, ni nyɛkpãtãa bokãgbɛbii lɛ ahiɛ!

²⁹ Ashɔ̃ amɛbuui lɛ kɛ amɛbuui lɛ ahe mamai lɛ, aŋɔ amɛtoi lɛ kɛ amɛnibii fɛɛ kɛya. Ashɔ̃ amɛfukpɔŋɔi lɛ yɛ amɛdɛŋ kɛya; ni mɛi baabolɔ awo amɛ akɛ, ‘He fɛɛ he efee gbeyei!’

³⁰ “Nyɛ Hazorbii, nyɛjoa foi kɛyaa shɔŋŋ nyɛyahɔlɔa bui amli, ejaakɛ naa, Babilon Maŋtsɛ Nebukadnezar eto nyɛhe yiŋ fɔŋ.

³¹ Nyɛtea shi, nyɛyatuaa maŋ ni he ejɔ lɛ ni eyɔɔ shweshweeshwe, maŋ ni agboi loo agbosɛɛ adabaŋi ahe ehiaaa amɛ, maŋ ko ni ekɛ ehe ebɔɔɔ maŋ ko he, shi ekome eyɔɔ. Mi, Yehowa, mikɛɛ.

³² “Abaahã amɛfukpɔŋɔi lɛ, ni amɛtsinai lɛ baatsɔ̃ ojoyelinii. Mibagbɛ mɛi ni kuɔ amɛyi fãfãafãi lɛ mashwã jeŋ koji ejwɛ lɛ fɛɛ he ni kɔɔyɔɔ tswaa kɛjɛɔ kɛbaa lɛ; mibahã amɛmanehului ajɛ he fɛɛ he abanina amɛ. Mi, Yehowa, mikɛɛ.

³³ Hazor baatsɔ̃ ŋaŋgbei ashihilɛhe; ebaatsɔ̃ naanɔ amaŋfɔ̃, ni adesa ko adesa ko ehiŋ jɛi, ni mɔ ko hu eyatoŋ gbɔ yɛ jɛi. Mi, Yehowa, mikɛɛ.”

Yehowa baagbala Elam toi

³⁴ Wiemɔ ni Yehowa kɛ Yeremia wie yɛ Elambii ahe nɛ, yɛ Yuda Maŋtsɛ Zedekia maŋtsɛyeli lɛ shishijee mli.

³⁵ Bɔ ni Yehowa, Taiatsɛ lɛ, kɛɛ nɛ, “Naa, mibakpãtã Elam gãitsɛ̃lɔi ni ji Elam hewalɛ lɛ ahiɛ,

³⁶ ni mahã kɔɔyɔɔ atswa kɛjɛ jeŋ koji ejwɛ lɛ abashwie Elam nɔ, ni mibagbɛ amɛ mashwã jeŋ koji ejwɛ lɛ ni ji kɔɔyɔi lɛ ajɛɛhei lɛ, ni maŋ ko ehiŋ shi ni Elambii ni mibagbɛ amɛ mashwã lɛ eyajeŋ jɛi.

³⁷ Mahã Elambii atsui afã yɛ amɛhenyɛlɔi kɛ mɛi ni taoɔ amɛhiɛ amɛkpãtã lɛ ahiɛ. Mibafee amɛ efɔŋ yɛ mimlifu ni naa wa lɛ naa. Mi, Yehowa, mikɛɛ. Mibahã agbala klante kɛnyiɛ amɛsɛɛ kɛyaashi beyinɔ ni mibakpãtã amɛhiɛ;

³⁸ Makpãtã amɛmaŋtsɛ lɛ kɛ lumɛi lɛ ahiɛ, kɛkɛ lɛ mikɛ mimaŋtsɛyeli sɛi lɛ aaabama Elam. Mi, Yehowa, mikɛɛ.

³⁹ Shi naagbee mli aahu lɛ, mibahã Elam nine ashɛ nibii ni eŋmɛɛ lɛ lɛ fɛɛ nɔ. Mi, Yehowa mikɛɛ.”