Yeremia 44 - ŊMALƐ KRƆŊKRƆŊ LƐ

Wiemɔ ni Yehowa kɛ Israelbii lɛ wie yɛ Ijipt

¹ Yehowa kɛ Yeremia wie Yudafoi fɛɛ ni yɔɔ Ijipt yɛ Migdol kɛ Tahapanes kɛ Memfis kɛ Ijipt wuoyi shikpɔŋ lɛ nɔ ahe.

² Yehowa Taiatsɛ, Israel Nyɔŋmɔ lɛ, kɛɛ Yeremia akɛ, “Bɛ nyɛ diɛŋtsɛ nyɛna sane fɔŋ ni mihã eye Yerusalɛm kɛ Yuda maji lɛ fɛɛ? Naa, ŋmɛnɛ amɛtsɔ̃mɔ amaŋfɔ̃i, ni mɔ ko mɔ ko ehiii amɛmli,

³ yɛ nifɔɔjianii ni amɛfee amɛkɛwo mimli la lɛ hewɔ. Ejaakɛ amɛtee, ni amɛyashãshãa tsofakɛŋma, ni amɛsɔ̃mɔ nyɔŋmɔi ni amɛ kɛ nyɛ kɛ nyɛtsɛmɛi lɛ fɛɛ leee.

⁴ Kɛ̃lɛ mitee nɔ mitsu mitsuji ni ji gbalɔi lɛ fɛɛ kɛba nyɛŋɔɔ kɛ wiemɔ akɛ, ‘Ao, nyɛkafea nɛkɛ musubɔɔnii nɛɛ ni mihiɔ lɛ.

⁵ Shi amɛyabooo mi toi, ni amɛyabuuu miwiemɔ lɛ koni amɛkpa amɛnifɔ̃ɔjianii lɛ, ni amɛkashã tsofakɛŋma amɛhã nyɔŋmɔi krokomɛi dɔŋŋ.

⁶ No hewɔ lɛ, mifɔse mimlila lɛ kɛ mimlifu lɛ mishwie amɛnɔ, ni ehere tamɔ la, ni eshã Yuda maji lɛ kɛ Yerusalɛm blohui lɛ tete; kɛkɛ ni amɛtsɔ̃mɔ amaŋfɔ̃i bɔ ni amɛyɔɔ kɛ ŋmɛnɛ nɛɛ.

⁷ “No hewɔ lɛ, agbɛnɛ, mi Yehowa, Taiatsɛ, Israel Nyɔŋmɔ lɛ, nɔ ni mikɛɔ nɛ, ‘Mɛɛba nyɛfeɔ nɔ fɔŋ kpeteŋkple nɛɛ nyɛkɛshiɔ nyɛ diɛŋtsɛ nyɛhe koni nyɛkɛplenee hii kɛ yei kɛ gbekɛbii kɛ fufɔbii fɛɛ yɛ Yudabii ateŋ bɔ ni afee ni nyɛmaŋbii lɛ eko kwraa akashwɛ yɛ nyɛsɛɛ nɛɛ.

⁸ Mɛɛba nyɛkɛ nyɛninenaa nitsumɔi woɔ mimli la? Nyɛshãa tsofakɛŋma nyɛhãa nyɔŋmɔi krokomɛi yɛ Ijipt shikpɔŋ nɔ he ni nyɛba nyɛbato gbɔ yɛ lɛ ni nyɛhiɛ akpãtã bɔ ni afee ni jeŋ majimaji lɛ abɔ nyɛ ahora, ni atsɛ nyɛ gbɛi akɛlomɔ lo?

⁹ Ani nyɛhiɛ ekpa nibii fɔ̃ji ni nyɛtsɛmɛi lɛ kɛ Yuda maŋtsɛmɛi lɛ kɛ amɛŋamɛi lɛ kɛ nyɛ diɛŋtsɛ hu nyɛŋamɛi lɛ feefee yɛ Yerusalɛm blohui lɛ amli lɛ anɔ lo?

¹⁰ Ni kɛbashi ŋmɛnɛ gbi nɛɛ lɛ, nyɛbako nyɛhe shi, ni nyɛsheko gbeyei, ni asaŋ nyɛbako nyɛjeŋ yɛ mlai kɛ akpɔi ni miwo nyɛ kɛ nyɛtsɛmɛi lɛ anaa.

¹¹ “No hewɔ lɛ, mi, Yehowa Taiatsɛ, Israel Nyɔŋmɔ lɛ, nɔ ni mikɛɔ ji akɛ, Naa, mibajie mihiɛ maka nyɛ, ni mibaplenee Yuda muu fɛɛ.

¹² Ni Yudabii ni eshwɛ lɛ ateŋ mɛi ni etswa fai shi akɛ amɛaatee Ijipt shikpɔŋ lɛ nɔ amɛyahi jɛi lɛ, mahã, amɛ fɛɛ amɛhiɛ baakpãtã. Amɛbaanyɔnyɔi yɛ Ijipt shikpɔŋ lɛ nɔ; ta kɛ hɔmɔ baahã amɛplenee; kɛjɛ mɔ bibioo nɔ kɛyashi mɔ wulu nɔ lɛ ta kɛ hɔmɔ baakpãtã amɛhiɛ; ni amɛsane lɛ baatsɔ̃ musu kɛ tsuifãa sane ni akɛbaalomɔ, ni akɛbaabɔ amɛ ahora.

¹³ Mibagbala mɛi ni yɔɔ Ijipt shikpɔŋ lɛ nɔ lɛ atoi tamɔ bɔ ni mikɛ ta kɛ hɔmɔ kɛ gbele hela gbala Yerusalɛmbii lɛ atoi lɛ,

¹⁴ bɔ ni baahã Yudabii ni shwɛ lɛ ateŋ mɛi ni eba amɛbahi Ijipt shikpɔŋ lɛ nɔ lɛ ateŋ mɔ ko mɔ ko he ejeŋ mli; eyi naŋ wala; ekuŋ esɛɛ kɛyaŋ Yuda shikpɔŋ lɛ nɔ, he ni amɛshweɔ akɛ amɛku amɛsɛɛ kɛya koni amɛyahi jɛi ekoŋŋ lɛ, ejaakɛ amɛkuŋ amɛsɛɛ kɔkɔɔkɔ akɛ ja mɛi komekomei kɛkɛ ni aaana foijee hegbɛ.”

¹⁵ Kɛkɛ ni hii fɛɛ ni le akɛ amɛŋamɛi eshã tsofakɛŋma amɛhã nyɔŋmɔi krokomɛi pɛŋ lɛ, kɛ yei fɛɛ ni damɔ jɛi lɛ kɛ Israelbii amaŋ muu lɛ fɛɛ ni yɔɔ Patros maŋ lɛ mli, yɛ Ijipt shikpɔŋ lɛ nɔ lɛ, asafo babaoo diɛŋtsɛ, to he amɛhã Yeremia akɛ,

¹⁶ “Wiemɔ ni okɛ wɔ ewie yɛ Yehowa gbɛi mli nɛɛ lɛ, wɔboŋ toi.

¹⁷ Shi moŋ nɔ ni wɔwo he shi akɛ wɔbaafee lɛ, no nɔŋŋ wɔbaafee. Wɔbaashã tsofakɛŋma wɔkɛhã jemawɔŋ yoo ŋwɛi maŋnyɛ lɛ, ni wɔbaafɔse dãa wɔshwie shi wɔhã lɛ tamɔ wɔ kɛ wɔtsɛmɛi lɛ kɛ wɔmaŋtsɛmɛi lɛ kɛ wɔwulɔmɛi lɛ fee yɛ Yuda shikpɔŋ lɛ nɔ maji lɛ kɛ Yerusalɛm blohui lɛ amli lɛ. Ejaakɛ nakai be mli lɛ wɔyɛ niyenii, ni wɔshwere, ni wɔnaaa efɔŋ ko yɛ mli.

¹⁸ Shi kɛjɛ beyinɔ ni wɔfɔ̃ɔ tsofakɛŋma shãa, asaŋ ni wɔfɔ̃ɔ dãa fɔsemɔ kɛ shishwiemɔ kɛ ŋwɛi maŋnyɛ lɛ hãmɔ nɛɛ lɛ, nɔ fɛɛ nɔ eŋmɛɛ wɔ, ni ta kɛ hɔmɔ ekpãtã wɔhiɛ.”

¹⁹ Yei lɛ kɛɛ akɛ, “Kɛji wɔkɛ keekii ni abɔlɔ tamɔ bɔ ni ŋwɛi maŋnyɛ lɛ su yɔɔ shã afɔle, ni wɔshã tsofakɛŋma wɔkɛhã lɛ, ni wɔfɔse dãa wɔshwie shi wɔkɛhã lɛ lɛ, ani wɔwumɛi lɛ leee mli eko lo?”

²⁰ Kɛkɛ ni Yeremia kɛɛ hii kɛ yei ni ji maŋ muu lɛ fɛɛ, ni hã lɛ ewiemɔ lɛ hetoo lɛ akɛ,

²¹ “Tsofakɛŋma ni nyɛ kɛ nyɛtsɛmɛi lɛ kɛ nyɛmaŋtsɛmɛi lɛ kɛ nyɛlumɛi kɛ shikpɔŋ lɛ nɔ bii lɛ shãshãa yɛ Yuda maji lɛ kɛ Yerusalɛm blohui lɛ amli lɛ, ani Yehowa kaiii? Ani ebaaa ejwɛŋmɔ mli lo?

²² No hã be ni Yehowa nyɛɛɛ nifɔɔji kɛ musubɔɔ nibii ni nyɛfeɔ lɛ dɔŋŋ lɛ, ehã nyɛshikpɔŋ lɛ tsɔ̃ amaŋfɔ̃, shikpɔŋ ni hiɛ ekpãtã, ni mɔ ko mɔ ko bɛ jɛi, ni atsɛɔ egbɛi akɛlomɔɔ kɛ ŋmɛnɛ nɛɛ lɛ.

²³ Nɛkɛ amanehulu nɛɛ eba nyɛnɔ tamɔ bɔ ni eyɔɔ ŋmɛnɛ nɛɛ, ejaakɛ nyɛshãshãa tsofakɛŋma, ni nyɛfee esha nyɛshi Yehowa; ni nyɛbooo Yehowa toi lɛ, nyɛbaaa nyɛjeŋ yɛ emlai kɛ ekpɔi kɛ ehe odasei ni aye lɛ anaa.”

²⁴ Yeremia tee nɔ ni ekɛɛ mɛi lɛ kɛ yei lɛ fɛɛ hu akɛ, “Nyɛ Yudabii fɛɛ ni yɔɔ Ijipt shikpɔŋ lɛ nɔ, nyɛboa nɔ ni Yehowa kɛɔ toi.

²⁵ Yehowa Taiatsɛ, Israel Nyɔŋmɔ lɛ, kɛɛ, nyɛ kɛ nyɛŋamɛi lɛ, eje nyɛnaa nyɛkɛɛ, ni nyɛfee hu. Nyɛkɛɛ akɛ ‘Wɔwowoo shi akɛ wɔbaashã tsofakɛŋma wɔkɛhã ŋwɛi maŋnyɛ lɛ, ni wɔbaafɔse dãa wɔshwie shi wɔkɛhã lɛ, ni ja wɔye nɔ.’ Belɛ nyɛyea nyɛshiwoi lɛ anɔ, ni nyɛfea bɔ ni nyɛwowoo shi lɛ!

²⁶ No hewɔ lɛ, nyɛ Yudabii fɛɛ ni yɔɔ Ijipt shikpɔŋ lɛ nɔ, nyɛboa nɔ ni mi, Yehowa, mikɛɔ toi, naa, mikã migbɛi wulu lɛ akɛ Yudanyo ko Yudanyo ko naŋ naabu ekɛtsɛ migbɛi kɔkɔɔkɔ yɛ Ijipt shikpɔŋ nɛɛ fɛɛ nɔ ekɛkã kitã akɛ, ‘Mina Yehowa’.

²⁷ Naa, miishi amɛhe kpe koni sane fɔŋ aye amɛ; shi jeee sane kpakpa. Yudabii fɛɛ ni yɔɔ Ijipt shikpɔŋ lɛ nɔ lɛ ta kɛ hɔmɔ baaplenee amɛ kɛyashi beyinɔ ni amɛaatã.

²⁸ Mɛi fioo ko kɛkɛ ji mɛi ni aaaje ta gbele mli, ni amɛaaku amɛsɛɛ kɛjɛ Ijipt shikpɔŋ lɛ nɔ kɛba Yuda shikpɔŋ lɛ nɔ. Nakai be lɛ mli Yudabii ni tee yato gbɔ yɛ Ijipt lɛ ateŋ mɛi ni eshwɛ lɛ aaana ale kɛji mi miwiemɔ lɛ jio, amɛ amɛnɔ lɛ jio ji nɔ ni ena eba mli shiishi nɛɛ.

²⁹ Mi, Yehowa, miikɛɛ akɛ enɛ afee okadi ahã nyɛ akɛ mibagbala nyɛtoi yɛ biɛ nɛɛ, bɔ ni afee ni nyɛna nyɛle akɛ efɔŋ ni mikɛɛ akɛ ebaaba nyɛnɔ lɛ, ebaana eba nyɛnɔ kɛ̃.

³⁰ No ji akɛ mibaŋɔ Maŋtsɛ Hofra, Ijipt maŋtsɛ lɛ, mawo ehenyɛlɔi ni taoɔ lɛ agbe lɛ adɛŋ tamɔ bɔ ni miŋɔ Zedekia, Israel maŋtsɛ lɛ, miwo Babilon Maŋtsɛ Nebukadnezar ni ji ehenyɛlɔ ni taoɔ lɛ egbe lɛ dɛŋ lɛ.”