Yeremia 42 - ŊMALƐ KRƆŊKRƆŊ LƐ

Maŋbii lɛ bi Yeremia akɛ esɔle ehã amɛ

¹ Kɛkɛ ni tabilɔi lɛ atatsɛmɛi lɛ fɛɛ kɛ Yohanan Karea bi lɛ, kɛ Azaria, Hoshaia bi lɛ, kɛ maŋ muu lɛ fɛɛ, kɛjɛ mɔ bibioo nɔ kɛyashi mɔ wulu nɔ, tsi bɛŋkɛ

² Yeremia gbalɔ lɛ, ni amɛkɛɛ lɛ akɛ, “Ofainɛ, ni obo wɔfaikpamɔ nɛɛ toi. Kpa Yehowa, oNyɔŋmɔ lɛ, fai ohã wɔ kɛ maŋbii ni eshwɛ nɛɛ fɛɛ, ejaakɛ kulɛ wɔyi babaoo, shi wɔyi fioo nɛɛ pɛ eshwɛ bɔ ni onaa wɔ nɛɛ,

³ koni Yehowa, oNyɔŋmɔ lɛ, atsɔ̃ɔ wɔ gbɛ ni wɔtsɔ̃ kɛ nɔ ni sa akɛ wɔfee hu.”

⁴ Yeremia, gbalɔ lɛ, hã amɛ hetoo akɛ, “Minu! Naa, mibakpa Yehowa, nyɛNyɔŋmɔ lɛ fai, tamɔ bɔ ni nyɛbi lɛ; ni hetoo ni Yehowa aaahã nyɛ lɛ, mibagba nyɛ; mishiuŋ nyɛ sane ko nɔ.”

⁵ Amɛ hu amɛkɛɛ Yeremia akɛ, “Yehowa afee odasefonyo anɔkwafo ashi wɔ kɛji wɔyeee wiemɔ fɛɛ wiemɔ ni Yehowa, oNyɔŋmɔ lɛ, kɛaatsu bo okɛbahã wɔ lɛ nɔ.

⁶ Wiemɔ kpakpa ni jio, wiemɔ fɔŋ ni jio, wɔbaabo nɔ ni Yehowa, wɔNyɔŋmɔ lɛ, mɔ ŋɔɔ ni wɔtsuɔ bo lɛ, baakɛɛ toi, bɔ ni afee ni ahi ahã wɔ kɛji wɔbo Yehowa, wɔNyɔŋmɔ, gbee toi.”

Hetoo ni Yehowa hã Yeremia

⁷ Gbii nyɔŋma sɛɛ lɛ Yehowa kɛ Yeremia wie.

⁸ Kɛkɛ ni Yeremia tsɛ Yohanan, Karea bi lɛ, kɛ tabilɔi lɛ atatsɛmɛi lɛ fɛɛ ni fata ehe kɛbana lɛ lɛ, kɛ maŋ muu lɛ fɛɛ, kɛjɛ mɔ bibioo nɔ kɛyashi mɔ wulu nɔ, kɛba eŋɔɔ,

⁹ ni ekɛɛ amɛ akɛ, “Bɔ ni Yehowa, Israel Nyɔŋmɔ lɛ, mɔ ŋɔɔ ni nyɛtsu mi koni mikɛ nyɛfaikpamɔ ayafɔ̃ ehiɛ lɛ kɛɛ nɛ,

¹⁰ ‘Kɛji nyɛbaahi shi yɛ shikpɔŋ nɛɛ nɔ lɛ, no lɛ mibahã nyɛhe shi, ni mikpãtãŋ nyɛhiɛ; mibatɛo nyɛ tamɔ atɛoɔ tso, ni mifamɔŋ nyɛ mishwieŋ; efɔŋ ni mifee nyɛ lɛ edɔ mi.

¹¹ Nyɛkashea Babilon maŋtsɛ, mɔ gbeyei ni nyɛsheɔ lɛ, gbeyei dɔŋŋ. Nyɛkashea lɛ gbeyei, mi Yehowa, miikɛɛ nyɛ; ejaakɛ mi kɛ nyɛ yɛ koni mahere nyɛyiwala, ni makpɔ̃ nyɛ yɛ edɛŋ.

¹² Mana nyɛ mɔbɔ, ni mahã emusuŋ atsɔ̃ lɛ yɛ nyɛhe, ni ebaahã nyɛhi nyɛ diɛŋtsɛ nyɛshikpɔŋ lɛ nɔ.’

¹³ “Shi kɛji nyɛkɛɛ akɛ, ‘Wɔhiii shikpɔŋ nɛɛ nɔ’, ni nyɛbooo Yehowa, nyɛNyɔŋmɔ lɛ, toi,

¹⁴ ni nyɛkɛɛ akɛ, ‘Dabida, wɔɔtee Ijipt shikpɔŋ lɛ nɔ he ni ta ko gbaŋ wɔnaa, ni wɔnuŋ tɛtɛrɛmantɛrɛ gbɛɛmɔ, asaŋ daaŋ ŋmaa ebɔŋ wɔ yɛ koni wɔyahi jɛi’ lɛ,

¹⁵ no lɛ nyɛ Yudabii ni eshwɛ, nyɛboa nɔ ni Yehowa kɛɔ nyɛ toi, bɔ ni Yehowa Taiatsɛ, Israel Nyɔŋmɔ lɛ, kɛɔ nyɛ nɛ, ‘Kɛji nyɛtswa nyɛfai shi akɛ nyɛmiiya Ijipt nyɛyahi jɛi lɛ,

¹⁶ no lɛ ta ni nyɛsheɔ lɛ aaaba abanina nyɛ yɛ Ijipt shikpɔŋ lɛ nɔ. Musuŋ hɔmɔ gbeyei ni nyɛsheɔ lɛ aaanyiɛ nyɛsɛɛ tuuŋtu kɛya Ijipt tɔ̃ɔ, ni jɛi nɔŋŋ nyɛaayagboi yɛ.

¹⁷ Mɛi fɛɛ ni aaatswa amɛfai shi, ni amɛaaya Ijipt amɛyahi jɛi lɛ aaatsɔ̃ ta loo hɔmɔ loo gbele hela nɔ amɛgboi; ni amɛteŋ mɔ ko mɔ ko eshwɛŋ ni ehe baaje sane fɔŋ ni mikɛaaye amɛ lɛ mli.’ ”

¹⁸ “Yehowa Taiatsɛ, Israel Nyɔŋmɔ lɛ, kɛɛ akɛ, ‘Bɔ ni mimli fu Yerusalɛmbii, ni mimli wo amɛ la lɛ, nakai nɔŋŋ mimli baafu nyɛ kɛji nyɛtee Ijipt. Akɛ nyɛ baakã kitã, ni akɛ nyɛ baalomɔ; nyɛhe baafee mɛi naakpɛɛ, ni abaabɔ nyɛ ahora; ni nyɛnaŋ shikpɔŋ nɛɛ nɔ dɔŋŋ.’ ”

¹⁹ Gbalɔ Yeremia tee nɔ ekɛɛ akɛ, “Yehowa ekɛɛ nyɛ, Yudabii ni eshwɛ, akɛ, ‘Nyɛkayaa Ijipt.’ Nyɛnaa nyɛlea krɛdɛɛ akɛ miibɔ nyɛ kɔkɔ ŋmɛnɛ gbi nɛɛ

²⁰ akɛ nyɛkɛ nyɛwala ta abasa, ejaakɛ nyɛtsu mi, Yehowa, nyɛNyɔŋmɔ lɛ, ŋɔɔ nyɛkɛɛ akɛ, ‘Kpa Yehowa, wɔNyɔŋmɔ lɛ fai ohã wɔ, ni nɔ fɛɛ nɔ ni Yehowa, wɔNyɔŋmɔ lɛ, aaakɛɛ wɔ lɛ wɔbaaye nɔ.’

²¹ Ni migba nyɛ ŋmɛnɛ nɔ ni Yehowa kɛɛ; shi nyɛyeee nɔ ni Yehowa, nyɛNyɔŋmɔ lɛ, kɛtsu mi koni mibakɛɛ nyɛ lɛ eko eko nɔ.

²² No hewɔ lɛ, agbɛnɛ nyɛnaa nyɛlea krɛdɛɛ akɛ ta kɛ hɔmɔ kɛ gbele hela baakpãtã nyɛhiɛ yɛ he ni nyɛshweɔ akɛ nyɛaatee nyɛyahi lɛ.”