Yeremia 41 - ŊMALƐ KRƆŊKRƆŊ LƐ

¹ Nyɔŋ ni ji kpawo lɛ nɔ lɛ, Elishama bi Netania bi Ishmael ni ejɛ maŋtsɛyeli weku mli, asaŋ ni maŋtsɛ lɛ he onukpai lɛ eko ji lɛ lɛ, ŋɔ hii nyɔŋma komɛi efata ehe kɛba Ahikam bi Gedalia ŋɔɔ yɛ Mizpa. Be ni amɛtara shi amɛyeɔ nii yɛ Mizpa lɛ,

² Ishmael, Netania bi lɛ, kɛ hii nyɔŋma ni fata ehe lɛ te shi, ni amɛbamɔ Gedalia, Ahikam bi kɛ Shafan nabi lɛ, ni amɛgbe lɛ. Nɛkɛ be mli lɛ Gedalia ji mɔ ni Babilon maŋtsɛ lɛ ewo lɛ shikpɔŋ lɛ nɔ lumɔ.

³ Ishmael gbe Yudafoi fɛɛ hu ni kɛ Gedalia yɔɔ Mizpa lɛ kɛ Babilon tabilɔi fɛɛ hu ni yaje jɛi.

⁴ Gbi ni agbe Gedalia lɛ nɔ jetsɛremɔ be mli ni mɔ ko mɔ ko kwraa nuko he lɛ,

⁵ hii nyɔŋmai kpaanyɔ komɛi jɛ Shekem kɛ Shilo kɛ Samaria ba. Amɛshɛshɛɛ amɛtsɛŋ, ni amɛgbalagbalaa amɛtadei yɛ amɛhe, ni amɛbãmɔbãmɔɔ amɛhe hu. Amɛhiɛ ŋmaa kɛ krɔbɔo amɛkɛyaashã afɔle yɛ Yehowa we lɛ.

⁶ No hewɔ lɛ, Ishmael, Netania bi lɛ, jɛ Mizpa etee eyakpee amɛ. Be ni eyaa lɛ fɛɛ lɛ belɛ eefo. Be ni ekɛ amɛ kpe lɛ, ekɛɛ amɛ akɛ, “Nyɛfainɛ, nyɛbaa nyɛbaŋaa Gedalia, Ahikam bi lɛ.”

⁷ Be ni amɛshɛ maŋ lɛ mli nɔŋŋ lɛ, Ishmael, Netania bi lɛ, kɛ hii lɛ ni fata ehe lɛ gbe amɛ, ni amɛshɛrɛ amɛgbohii lɛ amɛshwie nubu ko mli.

⁸ Shi hii gbɔi lɛ ateŋ mɛi nyɔŋma komɛi kɛɛ Ishmael akɛ, “Ofainɛ, kaagbe wɔ! Wɔyɛ ŋmaa kɛ akoko kɛ mu kɛ wo babaoo ni wɔkɛto yɛ wɔŋmɔjiashi.” No hewɔ lɛ, Ishmael kɛ amɛhe ke amɛ, ni egbeee amɛ kɛ amɛnanemɛi lɛ.

⁹ Nubu lɛ ni Ishmael shɛrɛ hii lɛ ni egbe lɛ agbohii lɛ eshwie mli lɛ, no ji nubu agbo ko ni Maŋtsɛ Asa je koni ekɛfã ehe be mli ni Maŋtsɛ Baasha, Israel maŋtsɛ, baa ebatua lɛ lɛ. Ishmael, Netania bi lɛ, loo gbohii lɛ ewo mli obɔ̃ tɔ.

¹⁰ Kɛkɛ ni Ishmael ŋɔ maŋtsɛ biyei lɛ kɛ mɛi fɛɛ ni tatsɛ Nebuzaradan eŋɔ ewo Gedalia nɔkwɛmɔ shishi yɛ Mizpa kɛ maŋbii krokomɛi fɛɛ ni eshwɛ yɛ Mizpa lɛ nom, ni ekɛ amɛ yi mli, ni efo mli kɛtee Amonbii lɛ ashikpɔŋ lɛ nɔ.

¹¹ Be ni Yohanan, Karea bi lɛ, kɛ tatsɛmɛi fɛɛ ni fata ehe lɛ nu nibii gbohii fɛɛ ni Ishmael, Netania bi lɛ, efee lɛ he lɛ,

¹² amɛbua tabilɔi fɛɛ ni amɛyɔɔ naa, kɛkɛ ni amɛyiŋ amɛtee koni amɛ kɛ Ishmael ayawu. Amɛyanina lɛ yɛ nubu wulu lɛ ni yɔɔ Gebeon lɛ he.

¹³ Be ni mɛi fɛɛ ni kɛ Ishmael nyiɛ lɛ na Yohanan, Karea bi lɛ, kɛ tatsɛmɛi lɛ ni fata ehe lɛ amɛnya.

¹⁴ Kɛkɛ ni mɛi fɛɛ ni Ishmael eyaŋɔ amɛ nom kɛjɛ Mizpa lɛ ku amɛsɛɛ kɛba Yohanan, Karea bi lɛ ŋɔɔ.

¹⁵ Shi Ishmael kɛ esɛɛ hii kpaanyɔ komɛi je Yohanan dɛŋ, ni amɛjo foi kɛtee Amonbii lɛ aŋɔɔ.

¹⁶ Yohanan, Karea bi lɛ, kɛ tabilɔi anɔ tatsɛmɛi fɛɛ ni fata ehe lɛ ŋɔ tabilɔi kɛ yei kɛ gbekɛbii kɛ piafoi lɛ ni ji maŋbii ni shwɛ ni Ishmael, Netania bi lɛ yakpala amɛ, akɛ nomii kɛjɛ Mizpa, be ni egbe Gedalia, Ahikam bi lɛ, sɛɛ lɛ. Aŋɔ tabilɔi kɛ yei kɛ gbekɛbii kɛ piafoi lɛ, mɛi ni eyakpɔ̃

¹⁷ lɛ ni amɛyiŋ amɛtee ni amɛyato shi yɛ Kinham Gbɔiatoohe ni bɛŋkɛ Betlehem lɛ koni amɛtsa amɛnyiɛmɔ lɛ nɔ kɛfee sɛɛ kɛya Ijipt;

¹⁸ ejaakɛ gbee ni Ishmael, Netania bi lɛ, gbe Gedalia, Ahikam bi lɛ, mɔ ni Babilon maŋtsɛ eto akɛ shikpɔŋ lɛ nɔ amralo lɛ ehã amɛmiishe gbeyei yɛ Babilonbii lɛ ahewɔ.