Yeremia 40 - ŊMALƐ KRƆŊKRƆŊ LƐ

Yeremia kɛ Gedalia hi shi

¹ Yehowa kɛ Yeremia wie be ni Nebuzaradan tabilɔiatsɛ lɛ, eŋmɛɛ ehe yɛ Rama lɛ sɛɛ. Nebuzaradan eŋɔ Yeremia, ni ewo lɛ kɔsɔŋkɔsɔ efata Yerusalɛm kɛ Yuda nomi fɛɛ ni abaŋɔ kɛyaa Babilon lɛ ahe.

² Tabilɔiatsɛ lɛ ŋɔ Yeremia kɛtee afã ni ekɛɛ lɛ akɛ, “Yehowa, oNyɔŋmɔ lɛ, ewie nɛkɛ efɔŋ nɛɛ ni baaba biɛ nɛɛ nɔ lɛ he eto momo,

³ ni Yehowa ehã ena eba mli hu, ni efee nɔ ni ekɛɛ lɛ. Nɛkɛ sane nɛɛ eba nyɛnɔ, ejaakɛ nyɛfee esha nyɛshi Yehowa, ni nyɛbooo lɛ toi.

⁴ Naa, agbɛnɛ miifɛne kɔsɔŋkɔsɔ ni awo oniji lɛ ŋmɛnɛ. Kɛji okwɛ, ni esa ohiɛ akɛ okɛ mi aaatee Babilon lɛ, ba; ni makwɛ bo jogbaŋŋ; shi kɛji okwɛ, ni esaaa ohiɛ akɛ okɛ mi aaatee Babilon lɛ, no lɛ hii shi. Kwɛ, shikpɔŋ muu lɛ fɛɛ kã ohiɛ nɛɛ; he fɛɛ he ni okwɛ ni ehi, asaŋ ni esa ohiɛ lɛ, yaahi jɛi.”

⁵ Yeremia nako ehã hetoo kɛkɛ ni Nebuzaradan kɛɛ lɛ akɛ, “Kɛji obaahi shi lɛ, no lɛ kuu osɛɛ mɔ koni oya Ahikam bi kɛ Shafan bi Gedalia, mɔ ni Babilon maŋtsɛ ewo lɛ Yuda maji lɛ anɔ amralo lɛ ŋɔɔ, koni okɛ lɛ ayahi shi yɛ maŋbii lɛ ateŋ, aloo yaahi he fɛɛ he ni sa ohiɛ.” No hewɔ lɛ, tabilɔiatsɛ lɛ hã Yeremia gbɛ nɔ niyenii kɛ nikeenii, ni ewo lɛ gbɛ.

⁶ Kɛkɛ ni Yeremia tee Gedalia, Ahikam bi lɛ, ŋɔɔ yɛ Mizpa, ni ekɛ lɛ hi shi yɛ maŋbii ni eshwɛ yɛ shikpɔŋ lɛ nɔ lɛ ateŋ.

Yuda Amralo Gedalia

⁷ Be ni Yuda tabilɔi ni yaje kpokpai lɛ anɔ lɛ asafoiatsɛmɛi lɛ kɛ amɛtabilɔi lɛ nu akɛ Babilon maŋtsɛ lɛ ewo Gedalia, Ahikam bi lɛ, Yuda shikpɔŋ lɛ nɔ amralo, ni eŋɔ hii kɛ yei kɛ gbekɛbii kɛ shikpɔŋ lɛ nɔ ohiafoi lɛ ateŋ mɛi ni anaaa aŋɔ amɛ nom kɛya Babilon lɛ ewo eshishi lɛ,

⁸ amɛtee Gedalia ŋɔɔ yɛ Mizpa. Asafoiatsɛmɛi nɛɛ ji Ishmael, Natania bi lɛ, kɛ Yohanan, Karea bi lɛ, kɛ Seraia, Tanhumet bi lɛ, kɛ Netofatnyo Efai bihii lɛ kɛ Yezania, Maakanyo lɛ. Amɛ kɛ amɛshishi tabilɔi lɛ fɛɛ tee.

⁹ Gedalia, Shafan bi Ahikam bi lɛ, kã amɛ kɛ amɛwebii lɛ kitã akɛ, “Nyɛkashea gbeyei akɛ nyɛaasɔ̃mɔ Babilonbii lɛ. Nyɛhia shikpɔŋ lɛ nɔ, ni nyɛsɔ̃mɔa Babilon maŋtsɛ lɛ, ni aaahi ahã nyɛ.

¹⁰ Mi lɛ mibahi Mizpa, koni madamɔ nyɛnaa kɛji Babilonbii lɛ ba wɔŋɔɔ. Shi nyɛ lɛ nyɛhia maji ni nyɛŋɔŋɔɔ lɛ amli, ni nyɛbuaa wain kɛ aduawai kɛ mu naa nyɛwoa nyɛnibii amli nyɛtoa.”

¹¹ Yudafoi fɛɛ ni yɔɔ Moab shikpɔŋ lɛ nɔ kɛ mɛi ni yɔɔ Amonbii lɛ ateŋ kɛ mɛi ni yɔɔ Edom shikpɔŋ lɛ nɔ kɛ shikpɔji krokomɛi anɔ lɛ nu akɛ Babilon maŋtsɛ lɛ eshwɛ mɛi kɛ̃ ehã Yuda, asaŋ akɛ ewo Ahikam bi kɛ Shafan nabi Gedalia akɛ gbɔmɛi nɛɛ anɔ amralo.

¹² Kɛkɛ ni Yudafoi lɛ fɛɛ ku amɛsɛɛ kɛjɛ hei fɛɛ ni amɛgbɛ amɛshwã kɛtee lɛ, ni amɛba Gedalia ŋɔɔ yɛ Mizpa yɛ Yuda shikpɔŋ lɛ nɔ. Amɛbua wain kɛ aduawai babaoo diɛŋtsɛ naa amɛto.

Agbe Gedalia

¹³ Enɛ sɛɛ lɛ Yohanan, Karea bi lɛ, kɛ Yuda asafoiatsɛmɛi ni yaje kpokpai lɛ anɔ lɛ fɛɛ ba Gedalia ŋɔɔ yɛ Mizpa,

¹⁴ ni amɛbakɛɛ lɛ akɛ, “Ani ole akɛ Baalis, Amonbii amaŋtsɛ lɛ, etsu Ishmael, Netania bi lɛ, koni ebagbe bo lo?” Shi Gedalia, Ahikam bi lɛ heee amɛ eyeee.

¹⁵ Kɛkɛ ni Yohanan, Karea bi lɛ, kɛɛ Gedalia yɛ teemɔ mli yɛ Mizpa akɛ, “Ŋmɛɛ mi gbɛ koni mayagbe Ishmael, Netania bi lɛ nigii. Mɛni hewɔ esa akɛ egbe bo koni Yudafoi fɛɛ ni ebabua amɛhe naa yɛ oŋɔɔ nɛɛ agbɛ ashwã, koni mɛi ni eshwɛ yɛ Yuda shikpɔŋ lɛ nɔ lɛ ahiɛ akpãtã lo?”

¹⁶ Shi Gedalia, Ahikam bi lɛ, kɛɛ Yohanan, Karea bi lɛ akɛ, “Kaafee nakai nɔ ko; ejaakɛ nɔ ni owieɔ yɛ Ishmael he nɛɛ ebɛ mli.”