Biblia Todo Logo
Bìoball air-loidhne

- Sanasan -

Yeremia 39 - ŊMALƐ KRƆŊKRƆŊ LƐ


Henyɛlɔi ŋɔ Yerusalɛm

1 Yuda Maŋtsɛ Zedekia yinɔ afi ni ji nɛɛhu lɛ nɔ nyɔŋ ni ji nyɔŋma lɛ nɔ lɛ, Babilon Maŋtsɛ Nebukadnezar kɛ etabilɔi fɛɛ ba, ni amɛbasa Yerusalɛm yi;

2 ni Zedekia yinɔ afi ni ji nyɔŋma kɛ ekome lɛ nɔ nyɔŋ ni ji ejwɛ lɛ nɔ gbi ni ji nɛɛhu lɛ nɔ lɛ, agbu Yerusalɛm he gbogbo lɛ awo mli.

3 Be ni henyɛlɔi lɛ ŋɔ Yerusalɛm lɛ, Babilon maŋtsɛ lɛ lumɛi lɛ fɛɛ ba, ni amɛbatara shi yɛ Teŋ Koi lɛ shishi. Gbɔmɛi nɛɛ ji: Nergal-Sarezer kɛ Samgar-Nebo kɛ Sarsekim piafoiatsɛ lɛ, kɛ Nergal-Sarezer kroko ko hu kɛ Babilon maŋtsɛ lɛ tsuji krokomɛi lɛ fɛɛ hu.

4 Be ni Yuda Maŋtsɛ Zedekia kɛ etabilɔi lɛ na Babilon maŋtsɛ tsuji lɛ, amɛka foijee; amɛshi maŋ lɛ mli nyɔɔŋ; amɛtsɔ̃ maŋtsɛ trom lɛ gbɛ lɛ nɔ agbo lɛ ni yɔɔ maŋ gbogboi enyɔ lɛ ateŋ lɛ mli, ni amɛyi Yordan Jɔɔ lɛ mli gbɛ.

5 Shi Babilon tabilɔi lɛ tiu amɛ, ni amɛyanina Zedekia yɛ Yeriko ŋa kplanaa lɛ nɔ, ni amɛmɔ lɛ. Amɛkɛ lɛ ba Babilon Maŋtsɛ Nebukadnezar ŋɔɔ yɛ Ribla, yɛ Hamat shikpɔŋ lɛ nɔ. Nebukadnezar bu Zedekia fɔ yɛ jɛi.

6 Egbe Zedekia bihii lɛ fɛɛ yɛ Ribla yɛ Zedekia hiɛ. Asaŋ egbe Yuda lumɛi lɛ fɛɛ hu.

7 No sɛɛ lɛ, Nebukadnezar hã afamɔ Zedekia hiŋmɛii, ni ehã awo lɛ gboklɛ koni akɛ lɛ aya Babilon.

8 Babilonbii lɛ ma maŋtsɛ we lɛ kɛ maŋbii lɛ ashĩai lɛ anaa la, ni amɛshã; ni amɛkumɔ Yerusalɛm he gbogboi lɛ amɛshwie shi.

9 Naagbee mli lɛ Nebuzaradan, Babilon tabilɔiatsɛ lɛ, ŋɔ maŋbii ni ashi yɛ maŋ lɛ mli lɛ kɛ maŋbii ni kɛ amɛhe yahã Babilon maŋtsɛ lɛ kɛ maŋbii ni eshwɛ lɛ nom kɛtee Babilon.

10 Shi Nebuzaradan, tabilɔiatsɛ lɛ, shi maŋ lɛ mli ohiafoi ni bɛ nɔ ko nɔ ko lɛ ateŋ mɛi komɛi yɛ Yuda shikpɔŋ lɛ nɔ, ni ehã amɛ wain tromi kɛ shikpɔji nakai be lɛ mli nɔŋŋ ni amɛhu nɔ.


Aŋmɛɛ Yeremia he

11 Nebukadnezar, Babilon maŋtsɛ lɛ, fã Nebuzaradan, tabilɔiatsɛ lɛ, ni ekɛɛ lɛ yɛ Yeremia hewɔ akɛ,

12 “Ŋɔɔ Yeremia, ni okwɛ lɛ jogbaŋŋ. Okafee lɛ efɔŋ ko, shi moŋ bɔ ni eeekɛɛ bo lɛ, ofee nakai ohã lɛ.”

13 No hewɔ lɛ, Nebuzaradan, tabilɔiatsɛ lɛ, kɛ Nebushazban, piafoiatsɛ lɛ, kɛ Nergal Sarezer kɛ Babilon maŋtsɛ lɛ tsuji nukpai lɛ fɛɛ

14 tsu ni ayaŋɔ Yeremia kɛjɛ Bulɔi Akpo lɛ nɔ kɛba. Amɛkɛ lɛ bahã Shafan bi Ahikam bi Gedalia koni ekɛ lɛ aya ewe lɛ mli. No hewɔ lɛ, Yeremia hi maŋbii lɛ ateŋ.


Ebedmelek na hiɛnɔkãmɔ

15 Be ni atsi Yeremia naa yɛ Bulɔi Akpo lɛ nɔ lɛ, Yehowa kɛ lɛ wie, ni ekɛɛ lɛ akɛ,

16 “Yaa koni oyakɛɛ Ebed-Melek, Kushnyo lɛ, akɛ, bɔ ni Yehowa Taiatsɛ, Israel Nyɔŋmɔ lɛ, kɛɔ nɛ, ‘Naa, mibahã nɔ ni mikɛɛ yɛ maŋ nɛɛ he lɛ aba mli, ebaana nɔ fɔŋ, shi jeee nɔ kpakpa; ni nɔ fɛɛ nɔ baaba mli, ni okɛ ohiŋmɛi baana.

17 Shi, mi Yehowa, miikɛɛ akɛ mibahere oyiwala yɛ nakai gbi lɛ nɔ, ni aŋɔŋ bo awoŋ hii ni osheɔ amɛ gbeyei lɛ adɛŋ;

18 shi oyi baana wala, ni onyɔŋ yɛ ta lɛ naa, shi owala baatsɔ̃ tamɔ ta mli haanii ahã bo, ejaakɛ ohiɛ kã minɔ. Mi Yehowa, mikɛɛ.’ ”

Bible in Ga Language © Bible Society of Ghana, 2020.

Bible Society of Ghana
Lean sinn:



Sanasan