Yeremia 37 - ŊMALƐ KRƆŊKRƆŊ LƐ

Maŋtsɛ Zedekia bi Yeremia koni esɔle ehã maŋ lɛ

¹ Babilon Maŋtsɛ Nebukadnezar to Zedekia, Yosia bi lɛ, Yuda maŋtsɛ, yɛ Yehoiakin, Yehoiakim bi lɛ, najiaŋ.

² Shi Zedekia ni jio, etsuji lɛ ni jio, maŋbii lɛ ni jio, mɔ ko mɔ ko yeee wiemɔi ni Yehowa kɛtsɔ̃ Gbalɔ Yeremia nɔ lɛ nɔ.

³ Maŋtsɛ Zedekia tsu Yehukal, Shelemia bi lɛ, kɛ Osɔfo Zefania, Maaseia bi lɛ, Yeremia ŋɔɔ akɛ esɔle ekpa Yehowa, amɛNyɔŋmɔ lɛ, fai ehã maŋ lɛ.

⁴ Nɛkɛ be mli lɛ Yeremia yaa baa yɛ maŋbii lɛ ateŋ, ejaakɛ anako awo lɛ tsuŋ.

⁵ Farao tabilɔi efã kɛjɛ Ijipt kɛba. Be ni Babilonbii ni amɛba amɛmiisa Yerusalɛm maŋ lɛ yi lɛ nu akɛ Ijipt maŋtsɛ lɛ ewo tabilɔi agbɛ kɛmiiba lɛ, Babilonbii lɛ gbala amɛhe shi kɛje Yerusalɛm.

⁶ Kɛkɛ ni Yehowa kɛ Yeremia wie, ni ekɛɛ lɛ akɛ, “Bɔ ni mi, Yehowa, Israel Nyɔŋmɔ lɛ, mikɛɔ nɛ. Yaakɛɛ Yuda maŋtsɛ lɛ ni tsu bo miŋɔɔ koni obabi mi nii lɛ akɛ,

⁷ Naa, Ijipt maŋtsɛ lɛ tabilɔi ni ba koni amɛbaye amɛbua bo lɛ, miiku amɛsɛɛ kɛya Ijipt amɛ diɛŋtsɛ amɛshikpɔŋ lɛ nɔ,

⁸ ni Babilonbii baaku amɛsɛɛ kɛba amɛbatua maŋ nɛɛ. Amɛbaaye maŋ lɛ nɔ, ni amɛbaama enaa la amɛshã.

⁹ Nɔ ni mi, Yehowa, mikɛɔ ji akɛ, ‘Nyɛkashishiua nyɛhe ni nyɛmiikɛɛ akɛ Babilonbii lɛ etee kwraa; ejaakɛ jeee tee amɛtee lɛ.

¹⁰ Kɛji nyɛye Babilonbii ni kɛ nyɛ wuɔ nɛɛ anɔ, ni eshwɛ amɛpilafoi sɔŋŋ ni kamɔ amɛbuui amli kɛkɛ po, pilafoi nɛɛ ateŋ mɔ fɛɛ mɔ baate shi, ni amɛbaama maŋ lɛ naa la amɛshã.’ ”

Awo Yeremia tsuŋ

¹¹ Be ni Babilon tabilɔi lɛ egbala amɛhe shi amɛshi Yerusalɛm amɛtee yɛ Ijipt maŋtsɛ ta ni fã kɛbaa lɛ hewɔ lɛ,

¹² Yeremia je Yerusalɛm akɛ eeya Benyamin shikpɔŋ lɛ nɔ koni eyaŋɔ egbɛfaŋnii ko yɛ eweku gboshinii mli.

¹³ Be ni eyashɛ Benyamin Agbo lɛ naa lɛ, asafoiatsɛ ni kwɛɔ agbo lɛ naa bulɔi lɛ anɔ lɛ, ni atsɛɔ lɛ Iriya ni eji Shelemia binuu kɛ Hanania nabi lɛ, mɔ Gbalɔ Yeremia, ni ebi lɛ akɛ, “Te Babilonbii lɛ aŋɔɔ ojoɔ foi kɛyaa nɛɛ bɛɛ?”

¹⁴ Yeremia jie naa akɛ, “Dabida! Jeee Babilonbii lɛ aŋɔɔ mijoɔ foi kɛya.” Shi Iriya eŋɔɔɔ nɔ ehãaa Yeremia, ni emɔ lɛ kɛba lumɛi lɛ aŋɔɔ.

¹⁵ Lumɛi lɛ gri wo Yeremia, ni amɛhã agwao lɛ, ni no sɛɛ lɛ awo lɛ kpabuŋ yɛ woloŋmalɔ Yonatan shĩa lɛ mli, ejaakɛ akɛ eshĩa lɛ efee tsuŋwoohe.

¹⁶ Awo Yeremia kpabuŋ yɛ shĩa lɛ shishigbɛ, ni eye gbii pii yɛ jɛi.

¹⁷ Fee sɛɛ lɛ Maŋtsɛ Zedekia tsu ayaŋɔ Yeremia nigii abahã lɛ, ni ebi Yeremia yɛ teemɔ mli yɛ maŋtsɛ we lɛ mli akɛ, “Ani Yehowa kɛ bo ewie nɔ ko lo?” Yeremia to he akɛ, “Hɛɛ, ekɛɛ mi nɔ ko.” Asaŋ Yeremia kɛɛ akɛ, “Aaaŋɔ bo awo Babilon maŋtsɛ lɛ dɛŋ.”

¹⁸ Kɛkɛ ni Yeremia bi Maŋtsɛ Zedekia akɛ, “Mɛɛ tɔ̃mɔ mitɔ̃ bo loo otsuji lɛ loo maŋ nɛɛ mli bii anɔ, hewɔ ni nyɛwo mi tsuŋ nɛɛ?

¹⁹ Nɛgbɛ nyɛgbalɔi lɛ ni gba tsɔ̃ɔ nyɛ akɛ Babilon maŋtsɛ baŋ ebatuaŋ maŋ nɛɛ kɛ shikpɔŋ nɛɛ lɛ yɔɔ?

²⁰ Agbɛnɛ, minuŋtsɔ Maŋtsɛ, ofainɛ ni ona tsui fioo ohã mi koni omɔ fai ni mikpaa bo nɛɛ mli ohã mi, koni okahã akɛmi ku sɛɛ kɛtee woloŋmalɔ Yonatan we lɛ dɔŋŋ koni mikayagbo yɛ jɛi.”

²¹ No hewɔ lɛ, Maŋtsɛ Zedekia fã, ni agbɛnɛ awo Yeremia kpabuŋ yɛ maŋtsɛ we lɛ hebulɔi lɛ akpo lɛ nɔ. Jɛi ehi, ni daa gbi lɛ ahãa lɛ aboloo akwaabɔ kome kɛjɛɔ abolooshãlɔi lɛ adɛŋ. Nɛkɛ ji bɔ ni afee aahu kɛyashi beyinɔ ni maŋ lɛ mli aboloo fɛɛ tã.