Yeremia 36 - ŊMALƐ KRƆŊKRƆŊ LƐ

Baruk kane wolo kpo lɛ yɛ Sɔlemɔ we lɛ

¹ Yuda Maŋtsɛ Yehoiakim, Yosia bi lɛ, maŋtsɛyeli afi ni ji ejwɛ lɛ nɔ lɛ, Yehowa kɛ Yeremia wie, ni ekɛɛ lɛ akɛ,

² “Kɔ wolo kpo ko koni oŋmã wiemɔi fɛɛ ni mikɛ bo ewie yɛ Israel kɛ Yuda kɛ maji krokomɛi fɛɛ ahe, kɛjɛ Yosia yinɔ aahu kɛbashi ŋmɛnɛ lɛ, owo mli.

³ Aleenɔ, ekolɛ kɛji Yudabii aaanu efɔŋ ni mito miyiŋ akɛ mafee amɛ lɛ, amɛteŋ mɔ fɛɛ mɔ aaakpa enifɔɔji anii ni efeɔ lɛ, ni no aaahã mikɛ amɛnishaianii kɛ amɛhe eshai lɛ afa amɛ.”

⁴ Kɛkɛ ni Yeremia tsɛ Neria bi Baruk kɛba, ni Yeremia wie wiemɔi fɛɛ ni Yehowa kɛ lɛ, Yeremia, ewie lɛ, ni Baruk ŋmã ewo wolo kpo lɛ mli.

⁵ Ni Yeremia fã Baruk akɛ, “Mi lɛ atsi mi gbɛ, ni ehiii mi Yehowa we lɛ mli yaa.

⁶ No hewɔ lɛ, bo yaa koni oyakane Yehowa wiemɔi ni onu kɛjɛ minaa ni oŋmã owo wolo kpo lɛ mli lɛ, faŋŋ otsɔ̃ɔ maŋ lɛ yɛ Yehowa we lɛ, yɛ ŋmaahilɛ gbi lɛ eko nɔ. Asaŋ okane faŋŋ otsɔ̃ɔ Yudabii ni jɛɔ amɛmaji krokomɛi amli amɛbaa lɛ hu.

⁷ Eko lɛ amɛfaikpamɔ aaashɛ Yehowa hiɛ, ni amɛteŋ mɔ fɛɛ mɔ aaakpa enifɔɔji anii ni efeɔ, ejaakɛ Yehowa mli ni efu kɛ emli ni ewo la lɛ naa wa naakpa.”

⁸ Baruk, Neria bi lɛ, fee bɔ ni Gbalɔ Yeremia fã lɛ lɛ pɛpɛɛpɛ. Eyakane Yehowa wiemɔi ni yɔɔ wolo kpo lɛ mli lɛ yɛ Yehowa we lɛ.

⁹ Yuda Maŋtsɛ Yehoiakim, Yosia bi lɛ, maŋtsɛyeli afi ni ji enumɔ lɛ mli nyɔŋ ni ji nɛɛhu lɛ nɔ lɛ, Yerusalɛmbii kɛ mɛi ni jɛɔ Yuda maji amli amɛbaa Yerusalɛm lɛ hi ŋmaa yɛ Yehowa hiɛ.

¹⁰ Kɛkɛ ni Baruk kane wiemɔi ni Yeremia wie ni yɔɔ wolo lɛ mli lɛ faŋŋ etsɔ̃ɔ maŋbii lɛ fɛɛ, yɛ woloŋmalɔ Shafan bi Gemaria pia lɛ mli, yɛ Yehowa we lɛ yiteŋgbɛ kpo lɛ nɔ, yɛ Agbo Hee lɛ naa.

Akane Wolo kpo lɛ atsɔ̃ɔ Maŋ Lumɛi lɛ

¹¹ Be ni Mikaia, ni ji Shafan bi Gemaria bi lɛ, nu Yehowa naa wiemɔi lɛ fɛɛ ni yɔɔ wolo ni akane lɛ mli lɛ,

¹² eyiŋ etee maŋtsɛ we lɛ, ni ebote woloŋmalɔ lɛ pia lɛ mli. Eyanina woloŋmalɔ lɛ kɛ Delaia, Shemaia bi lɛ, kɛ Elnatan, Akbor bi lɛ, kɛ Gemaria, Shafan bi lɛ, kɛ Zedekia, Hanania bi lɛ, kɛ maŋ lumɛi krokomɛi lɛ fɛɛ yɛ jɛi.

¹³ Mikaia gba amɛ nibii fɛɛ ni enu be ni Baruk kane wolo lɛ faŋŋ etsɔ̃ɔ maŋbii lɛ.

¹⁴ Kɛkɛ ni maŋ lumɛi lɛ tsu Kushi bi Shelemia bi Netania bi Yehudi kɛtee Baruk ŋɔɔ, ni eyabi lɛ koni ekɔ wolo kpo lɛ ni ekane emli sane etsɔ̃ɔ maŋbii lɛ kɛba amɛŋɔɔ. Baruk, Neria bi lɛ, kɔ wolo kpo lɛ ehiɛ edɛ̃ kɛtee lumɛi lɛ aŋɔɔ.

¹⁵ Be ni eshɛ jɛi lɛ lumɛi lɛ kɛɛ Baruk akɛ, “Ta shi koni okane wolo lɛ.” No hewɔ lɛ, Baruk kane wolo lɛ etsɔ̃ɔ amɛ.

¹⁶ Be ni amɛnu wolo lɛ mli sane lɛ, amɛkwɛkwɛɛ amɛhiɛiaŋ kɛ tsuifãa, ni amɛkɛɛ Baruk akɛ, “Ja wɔyakɛɛ Maŋtsɛ wolo nɛɛ mli sane lɛ.”

¹⁷ Kɛkɛ ni amɛbi Baruk akɛ, “Te fee tɛŋŋ ni oŋmã wiemɔi nɛɛ hu? Kɛɛmɔ wɔ. Ani Yeremia diɛŋtsɛ naa wiemɔi ni?”

¹⁸ Baruk to he akɛ, “Lɛ diɛŋtsɛ enaa wiemɔi ni. Lɛ ewie; ni be mli ni ewieɔ lɛ belɛ mikɛ blɛgi miiŋma miiwo wolo lɛ mli.”

¹⁹ Kɛkɛ ni lumɛi lɛ kɛɛ Baruk akɛ, “Ole sane ko? Bo kɛ Yeremia fɛɛ, nyɛyaa koni nyɛyatee nyɛhe yɛ he ko; ni nyɛkahãa mɔ ko mɔ ko leɔ he ni nyɛyatee yɛ lɛ.”

Maŋtsɛ shã Wolo kpo lɛ

²⁰ Maŋ lumɛi lɛ shi wolo kpo lɛ yɛ woloŋmalɔ Elishama pia lɛ mli, ni amɛtee maŋtsɛ lɛ ŋɔɔ yɛ ekoi lɛ shi, ni amɛyagba lɛ wolo lɛ mli sane lɛ fɛɛ.

²¹ Maŋtsɛ lɛ tsu Yehudi akɛ eyakɔ wolo lɛ yɛ woloŋmalɔ Elishama pia lɛ mli kɛba. Yehudi kane wolo lɛ etsɔ̃ɔ maŋtsɛ lɛ kɛ maŋ lumɛi ni damɔ maŋtsɛ lɛ he lɛ fɛɛ.

²² Nyɔŋ ni ji nɛɛhu lɛ nɔ ni; ni maŋtsɛ lɛ ta efɛ̃i be tsu lɛ mli, ni ŋɛsu kɛ emli la ni atsɛ̃ ma ehiɛ.

²³ Kɛji Yehudi kane wolo lɛ baafãi etɛ̃ loo ejwɛ lɛ, maŋtsɛ lɛ kɛ kakla bibioo ko folɔɔ wolo baafãi ni akane lɛ mli, kɛkɛ lɛ eshɛrɛ eshwie ŋɛsu kɛ la lɛ mli kɛyashi beyinɔ ni wolo kpo lɛ fɛɛ shã wɛɛ!

²⁴ Maŋtsɛ lɛ ni jio, etsuji lɛ fɛɛ ni nu wolo kpo lɛ mli wiemɔi lɛ ni jio, amɛteŋ mɔ ko mɔ ko sheee gbeyei aloo egbalaaa ehebo ekɛtsɔ̃ɔ akɛ ewerɛ eho ehe.

²⁵ Yɛ mli akɛ Elnatan kɛ Delaia kɛ Gemaria kpa maŋtsɛ lɛ fai akɛ ekashã wolo kpo lɛ nɛ, shi ebooo amɛ toi.

²⁶ Shi moŋ maŋtsɛ lɛ fã Yerameel, maŋtsɛ binuu lɛ, kɛ Seraia, Azriel bi lɛ, kɛ Shelemia, Abdeel bi lɛ, akɛ amɛyamɔ Gbalɔ Yeremia kɛ woloŋmalɔ Baruk kɛba; shi Yehowa kɛ amɛ to.

Yeremia ŋma wolo kroko

²⁷ Agbɛnɛ be ni maŋtsɛ lɛ shã wolo kpo lɛ ni Gbalɔ Yeremia naa wiemɔi ni woloŋmalɔ Baruk ŋmã lɛ yɔɔ mli lɛ sɛɛ lɛ, Yehowa kɛ Yeremia wie, ni ekɛɛ lɛ akɛ,

²⁸ “Kɔ wolo kpo kroko koni oŋmã tsuutsu wiemɔi lɛ fɛɛ ni yɔɔ klɛŋklɛŋ wolo kpo lɛ ni Yuda Maŋtsɛ Yehoiakim shã lɛ mli lɛ owo mli.

²⁹ Ni Yuda Maŋtsɛ Yehoiakim lɛ, nɔ ni okɛɛ yɛ ehe nɛ. Bɔ ni Yehowa kɛɔ nɛ, ‘Bo lɛ oshã nɛkɛ wolo kpo nɛɛ, ni obi Yeremia akɛ mɛni hewɔ oŋma yɛ wolo kpo lɛ mli akɛ, Babilon maŋtsɛ lɛ baaba kɛ̃ koni ebafite shikpɔŋ nɛɛ, koni ekpãtã enɔ gbɔmɛi kɛ kooloi fɛɛ ahiɛ lɛ.’

³⁰ No hewɔ lɛ, mi Yehowa, nɔ ni mikɛɔ yɛ Yuda Maŋtsɛ Yehoiakim he ji akɛ eshwie ko eshwie ko taŋ David maŋtsɛ sɛ̃i lɛ nɔ kɔkɔɔkɔ; ni abaashɛ egbonyo afɔ̃ he ko ni baahã hulu ashã lɛ shwane, ni bɔ baanyɔ enɔ nyɔɔŋ.

³¹ Mibagbala lɛ kɛ eshwiei kɛ etsuji lɛ atoi yɛ nishaianii ni amɛfee lɛ hewɔ; ni mibahã haomɔi fɛɛ ni mi kɛ amɛ ewie he, shi amɛbuuu lɛ aba amɛ kɛ Yerusalɛmbii kɛ Yudabii anɔ.”

³² Kɛkɛ ni Yeremia kɔ wolo kpo kroko, ni ekɛhã Neria bi Baruk ni ji ewoloŋmalɔ lɛ. Yeremia saa ewie wiemɔi lɛ fɛɛ ni yɔɔ tsuutsu wolo kpo ni Yuda Maŋtsɛ Yehoiakim shã lɛ mli lɛ, ni Baruk ŋmã fɛɛ ewo wolo hee lɛ mli. Ni Yeremia kɛ wiemɔi krokomɛi ni tamɔ wiemɔi ni ewie ni Baruk ŋmã lɛ shi nɔ.