Yeremia 35 - ŊMALƐ KRƆŊKRƆŊ LƐ

Yeremia kɛ Rekabbii lɛ

¹ Be mli ni Yosia bi Yehoiakim yeɔ Yuda maŋtsɛ lɛ, Yehowa kɛ Yeremia wie ni ekɛɛ lɛ akɛ,

² “Yaa Rekab webii lɛ aŋɔɔ koni okɛ amɛ ayawie; ni okɛ amɛ aba Yehowa Sɔlemɔ we lɛ mli piai lɛ eko mli koni ohã amɛ wain amɛnu yɛ jɛi.”

³ No hewɔ lɛ, mitee, ni miyaŋɔ Yaazania, ni atsɛɔ etsɛ Yeremia, Habazinia bi lɛ, kɛ enyɛmimɛi hii lɛ kɛ ebihii lɛ fɛɛ kɛ Rekab weku lɛ fɛɛ,

⁴ ni mikɛ amɛ ba Yehowa Sɔlemɔ we lɛ, ni wɔtee Igdalia bi Gbalɔ Hanan kaselɔi lɛ apia lɛ mli, yɛ lumɛi apia lɛ masɛi, yɛ Shalum, shinaanaabulɔ lɛ, bi Maaseia pia lɛ yiteŋ.

⁵ Kɛkɛ ni mikɛ gbɛi ni eyimɔ obɔ̃bɔ̃ kɛ wain kɛ kɔɔpoi bamamɔ Rekab weku lɛ hiɛ, ni mikɛɛ amɛ akɛ, “Nyɛnua wain koo!”

⁶ Shi amɛto he akɛ, “Wɔnuuu wain ejaakɛ wɔtsɛ Yonadab, ni ji Rekab bi lɛ, wo wɔ kitã akɛ, ‘Nyɛkanua wain gbi ko gbi ko, nyɛ kɛ nyɛshwiei fɛɛ.

⁷ Nyɛkamamɔa tsui, ni nyɛkadua nii, ni nyɛkafea wain trom nyɛhãa nyɛhe, shi moŋ nyɛwala bei amli fɛɛ lɛ, nyɛhia bui amli bɔ ni afee ni nyɛhi shi be babaoo yɛ shikpɔŋ ni nyɛbato gbɔ yɛ nɔ lɛ nɔ.

⁸ Wɔye kitã ni wɔtsɛ Yonadab, Rekab bi lɛ, wo wɔ akɛ wɔ diɛŋtsɛ jio, wɔŋamɛi jio, wɔbihii jio, wɔbiyei jio, wɔkanu wain wɔwala be fɛɛ lɛ nɔ;

⁹ ni asaŋ ekɛɛ akɛ wɔkamamɔ tsui hu wɔhi mli lɛ. Wɔbɛ wain trom loo ŋmɔji loo abele.

¹⁰ Shi wɔhi bui amli, ni bɔ ni wɔtsɛ Yonadab wo wɔ kitã lɛ wɔbo toi, ni wɔye nɔ pɛpɛɛpɛ kɛ ŋmɛnɛ.

¹¹ Shi be ni Babilon Maŋtsɛ Nebukadnezar fã ta kɛba ebatua shikpɔŋ lɛ, wɔye wɔfua akɛ wɔɔba Yerusalɛm yɛ gbeyei ni wɔshe Babilon ta lɛ kɛ Siria ta lɛ hu hewɔ. No ji Yerusalɛm ni wɔyɔɔ nɛɛ.’ ”

¹² Kɛkɛ ni Yehowa kɛɛ Yeremia akɛ,

¹³ “Yaa ni oyakɛɛ Yudahii lɛ kɛ Yerusalɛmbii lɛ akɛ mi, Yehowa Taiatsɛ, Israel Nyɔŋmɔ lɛ, miibi akɛ, ‘Aso nyɛkpɛlɛŋ tsɔsemɔ koni nyɛbo miwiemɔ lɛ toi?’

¹⁴ Kitã ni Rekab bi Yonadab, wo eshwiei akɛ amɛkanu wain lɛ, amɛye nɔ, ni amɛnuuu wain kɛ ŋmɛnɛ, ejaakɛ amɛye amɛtsɛ kitã lɛ nɔ. Mitee nɔ mikɛ nyɛ ewie shii abɔ, shi nyɛbooo mi toi.

¹⁵ Mitsu mitsuji, ni ji gbalɔi lɛ nyɛŋɔɔ shii abɔ kɛ wiemɔ akɛ, ‘Nyɛteŋ mɔ fɛɛ mɔ ashi ejeŋba gbonyo lɛ sɛɛ koni etsake, ni nyɛkayanyiɛa nyɔŋmɔi krokomɛi asɛɛ ni nyɛsɔ̃mɔ amɛ; ja no dani nyɛaahi shikpɔŋ ni mikɛhãa nyɛ kɛ nyɛtsɛmɛi lɛ nɔ. Shi nyɛbooo mi toi, ni nyɛfeee nɔ ni mikɛɛ lɛ.

¹⁶ Rekab bi Yonadab shwiei lɛ eye kitã ni amɛtsɛ lɛ wo amɛ lɛ nɔ; shi nyɛ maŋ nɛɛ nyɛbooo mi toi.

¹⁷ No hewɔ lɛ, naa, mi Yehowa, Nyɔŋmɔ Taiatsɛ, ni ji Israel Nyɔŋmɔ lɛ, mibahã saji fɔ̃ji fɛɛ ni mito miyiŋ akɛ mahã aye Yuda kɛ Yerusalɛmbii fɛɛ lɛ aba amɛ amɛnɔ, ejaakɛ miwie mitsɔ̃ɔ amɛ, ni amɛbooo mi toi, ni mitsɛ amɛ, ni amɛhereee mi nɔ.’ ”

¹⁸ Shi Yeremia kɛɛ Rekabbii lɛ akɛ, nɔ ni Yehowa, Taiatsɛ, Israel Nyɔŋmɔ lɛ, kɛɛ yɛ amɛhe nɛ; “Akɛni nyɛye kitã ni nyɛtsɛ Yonadab wo nyɛ lɛ nɔ, ni nyɛhiɛ akpɔi ni ewo lɛ amli, ni nyɛfee nibii fɛɛ ni ekɛɛ nyɛfee lɛ,

¹⁹ hewɔ lɛ, mi Yehowa Taiatsɛ, Israel Nyɔŋmɔ, miikɛɛ akɛ be ko baŋ ni anaŋ Rekab bi Yonadab shwie ni aaasɔmɔ mi.”