Yeremia 34 - ŊMALƐ KRƆŊKRƆŊ LƐ

Wiemɔ ni akɛbahã Maŋtsɛ Zedekia

¹ Yehowa kɛ Yeremia wie be mli ni Babilon Maŋtsɛ Nebukadnezar kɛ lɛ diɛŋtsɛ etabilɔi lɛ fɛɛ kɛ tabilɔi krokomɛi ni jɛ jeŋ maji fɛɛ ni yɔɔ enɔyeli shishi kɛ mɛi krokomɛi fɛɛ eba, ni amɛ kɛ Yerusalɛm kɛ ehe maji lɛ fɛɛ miiwu ta lɛ.

² Yehowa, Israel Nyɔŋmɔ lɛ, kɛɛ Yeremia akɛ, “Yaa koni okɛ Yuda Maŋtsɛ Zedekia ayawie, ni okɛɛ lɛ akɛ, bɔ ni Yehowa kɛɔ nɛ, “Naa, miijɔɔ maŋ nɛɛ nɔ miihã Babilon maŋtsɛ, ni ebaama maŋ lɛ naa la ni eshã.

³ Bo diɛŋtsɛ lɛ ojeŋ edɛŋ; shi mɔ kɛ̃ aaamɔ bo, ni akɛ bo baaya ayawo edɛŋ. Okɛ Babilon maŋtsɛ lɛ baakpe hiɛ kɛ hiɛ, ni okɛ lɛ baawie hiɛ kɛ hiɛ.

⁴ Shi kɛ̃lɛ, bo Yuda Maŋtsɛ Zedekia, bo nɔ ni Yehowa kɛɔ yɛ bo tuuŋtu ohe toi. Ogboŋ yɛ klante naa.

⁵ Obaagbo yɛ hejɔlɛ mli; ni bɔ ni maŋbii shãshãa ohɛ amɛhã otsɛmɛi ni ji maŋtsɛmɛi ni ebaye nɔ kɛtsɔ̃ ohiɛ lɛ, nakai nɔŋŋ maŋbii baashãshãa ohɛ amɛhã bo kɛfee oyara; ni amɛaawo yara amɛfo bo akɛ, ‘Nuŋtsɔ, kpoo oŋ!’ Mi, Yehowa, mikɛɛ.”

⁶ Kɛkɛ ni Yeremia hã wiemɔ lɛ shɛ Yuda Maŋtsɛ Zedekia dɛŋ yɛ Yerusalɛm,

⁷ be ni Babilon maŋtsɛ lɛ tabilɔi lɛ kɛ Yerusalɛm kɛ Yuda maji ni eshwɛ, ni ji Lakish kɛ Azeka, wuɔ ta lɛ; ejaakɛ nomɛi pɛ ji Yuda maji ni eshwɛ ni atswa gbogbo awo amɛhe.

Ayeee anɔkwa yɛ nyɔji agbɛfaŋ

⁸ Yehowa kɛ Yeremia wie be ni Maŋtsɛ Zedekia kɛ Yerusalɛm maŋ muu lɛ fɛɛ kpãŋ akɛ, lɛ maŋtsɛ lɛ, ebaawo heyeli he akpɔ ehã maŋbii lɛ

⁹ akɛ mɔ fɛɛ mɔ ahã enyɔŋ ni ji Hebrinuu loo Hebriyoo aye ehe tswaa koni mɔ ko akaye enyɛmi Hebrinyo nyɔŋ dɔŋŋ.

¹⁰ Lumɛi lɛ fɛɛ kɛ maŋbii fɛɛ ni kpãŋ akɛ amɛteŋ mɔ fɛɛ mɔ ahã enyɔŋnuu kɛ enyɔŋyoo aye amɛhe koni mɔ ko mɔ ko akaye enyɛmi Hebrinyo nyɔŋ dɔŋŋ lɛ ye kpãŋmɔ lɛ nɔ, ni amɛŋmɛɛ nyɔji lɛ ahe.

¹¹ Shi fee sɛɛ lɛ amɛku sɛɛ ni amɛyaŋɔ amɛnyɔji ni kulɛ amɛhã amɛye amɛhe lɛ kɛba ekoŋŋ, ni amɛbaye amɛ nyɔŋ ekoŋŋ.

¹² Enɛ hewɔ lɛ, Yehowa kɛ Yeremia wie, ni ekɛɛ lɛ akɛ,

¹³ “Nɔ ni mi, Yehowa, Israel Nyɔŋmɔ lɛ, kɛɔ nɛ, ‘Mikɛ nyɛblematsɛmɛi lɛ kpãŋ be mli ni miyakpɔ̃ amɛ yɛ Ijipt shikpɔŋ lɛ nɔ, he ni aye amɛ nyɔŋ yɛ lɛ akɛ,

¹⁴ nyɛteŋ mɔ fɛɛ mɔ ahã enyɛmi Hebrinyo ni ahɔ̃ɔ lɛ akɛ nyɔŋ ahã lɛ, ni esɔmɔ lɛ afii ekpaa lɛ aŋɔ ehe eye tswaa yɛ afi ni ji kpawo lɛ nɔ; aŋmɛɛ nɛkɛ gbɔmɔ he, ni eŋɔ ehe eye. Shi nyɛtsɛmɛi lɛ booo mi toi, ni amɛyeee miwiemɔ lɛ nɔ.’

¹⁵ “Nyɛsɛɛ nɛɛ lɛ, nyɛje nyɛhe sɛɛ, ni nyɛfee nɔ ni sa mihiɛ, ejaakɛ nyɛye nyɛfua akɛ nyɛteŋ mɔ fɛɛ mɔ baahã enyɛmi Israelnyo aŋɔ ehe eye tswaa; ni nyɛkpãŋ yɛ enɛ he yɛ mihiɛ yɛ Sɔlemɔ we lɛ he ni ajaa mi yɛ lɛ.

¹⁶ Shi nyɛku nyɛsɛɛ nyɛtsake nyɛjwɛŋmɔ, ni nyɛwo migbɛi lɛ he muji. Ejaakɛ nyɛyaŋɔ nyɛwehii kɛ nyɛweyei ni nyɛhã amɛye amɛhe yɛ amɛsuɔmɔ naa lɛ kɛba ekoŋŋ ni nyɛbaye amɛ nyɔŋ ekoŋŋ.

¹⁷ No hewɔ lɛ, mi, Yehowa, miikɛɛ nyɛ akɛ nyɛgbo minɔ toi, ejaakɛ nyɛhãko nyɛnyɛmimɛi Israelbii kɛ nyɛnanemɛi aŋɔ amɛhe amɛye tswaa. Shi naa, mi lɛ mahã ta kɛ hɔmɔ kɛ gbele hela kɛ nyɛ aye. Jeŋ shikpɔji fɛɛ ahe aaajɔ̃ amɛhe yɛ nɔ ni mafee nyɛ lɛ hewɔ.

¹⁸ Ni hii lɛ ni yeee mikpãŋmɔ lɛ nɔ lɛ, mibafee amɛ tamɔ afee kpãŋmɔ tsinabi lɛ ni agba emli enyɔ, ni amɛtsɔ̃ fãfãafãi lɛ ateŋ kɛho lɛ.

¹⁹ Yuda lumɛi lɛ kɛ Yerusalɛm lumɛi lɛ kɛ maŋtsɛ we lɛ mli nitsulɔi lɛ kɛ osɔfoi lɛ kɛ maŋ hiɛnyiɛlɔi lɛ fɛɛ ni tsɔ̃ tsinabi lɛ fãfãafãi lɛ ateŋ kɛho lɛ ahe miwieɔ nɛɛ.

²⁰ Mibaŋɔ amɛ mawo amɛhenyɛlɔi ni taoɔ amɛgbele lɛ adɛŋ, ni amɛgbohii baatsɔ̃ niyenii ahã ŋwɛi loofɔji kɛ shikpɔŋ nɔ kooloi kakawuai.

²¹ Ni Yuda Maŋtsɛ Zedekia kɛ elumɛi lɛ mibaŋɔ amɛ mawo amɛhenyɛlɔi ni taoɔ amɛgbele lɛ adɛŋ. Mibajɔɔ amɛnɔ mahã Babilon maŋtsɛ lɛ tabilɔi ni ba amɛbatua nyɛ shi amɛku amɛsɛɛ lɛ.

²² Naa, mibafã, Yehowa kɛɛ, ni mahã amɛku amɛsɛɛ kɛba ni amɛbaatua maŋ nɛɛ, ni amɛbaaye nɔ, ni amɛbaama maŋ lɛ naa la amɛshã. Mibahã Yuda maji lɛ atsɔ̃mɔ amaŋfɔ̃i ni gbɔmɛi bɛ mli.”