Yeremia 26 - ŊMALƐ KRƆŊKRƆŊ LƐ

Ayakojo Yeremia

¹ Yosia bi Yuda Maŋtsɛ Yehoiakim maŋtsɛyeli lɛ shishijee mli lɛ wiemɔ nɛɛ jɛ Yehowa ŋɔɔ ba;

² ni ekɛɛ mi akɛ, “Yaadamɔ Yehowa Sɔlemɔ we lɛ kpo lɛ nɔ, koni okɛ wiemɔi fɛɛ ni mifã bo akɛ owie lɛ ashwie Yuda maji lɛ amli bii fɛɛ ni baa amɛbajaa yɛ Yehowa Sɔlemɔ we lɛ ahiɛ. Kaashi wiemɔ ko wiemɔ ko.

³ Eko lɛ aleenɔ amɛaabo toi, ni amɛteŋ mɔ fɛɛ mɔ baakpa ejeŋba fɔŋ lɛ koni efɔŋ ni mito akɛ mafee amɛ yɛ amɛnifɔ̃ɔjianii lɛ ahewɔ lɛ mafo mli.”

⁴ Kɛkɛ ni Yehowa kɛɛ mi akɛ mikɛɛ maŋbii lɛ akɛ, “Nɔ ni Yehowa kɛɛ nɛ, ‘Esa ni nyɛboɔ mi toi koni nyɛba nyɛjeŋ yɛ mimla ni miwo nyɛ lɛ naa,

⁵ koni nyɛye mitsuji gbalɔi lɛ ni mitsuɔ amɛ nyɛŋɔɔ kɛ hiɛdɔɔ lɛ awiemɔi lɛ anɔ, shi nyɛbooo amɛ toi,

⁶ hewɔ lɛ mafee Sɔlemɔ we nɛɛ tamɔ mifee Shilo lɛ, ni mahã maŋ nɛɛ atsɔ̃ loomɔ nɔ̃ ahã shikpɔŋ lɛ nɔ maji fɛɛ.’ ”

⁷ Osɔfoi lɛ kɛ gbalɔi lɛ kɛ maŋ muu lɛ fɛɛ nu akɛ Yeremia miiwie wiemɔi nɛɛ yɛ Yehowa Sɔlemɔ we lɛ.

⁸ Be ni Yeremia wie wiemɔi fɛɛ ni Yehowa fã lɛ akɛ ekɛ maŋ muu lɛ fɛɛ awie lɛ egbe naa lɛ, osɔfoi lɛ kɛ gbalɔi lɛ kɛ maŋ muu lɛ fɛɛ mɔ lɛ, ni amɛbolɔ akɛ, “Ja ogbo!

⁹ Mɛɛba ogba yɛ Yehowa gbɛi mli akɛ, ‘Nɛkɛ Sɔlemɔ we nɛɛ baatsɔ̃ tamɔ Shilo, ni maŋ nɛɛ baatsɔ̃ amaŋfɔ̃ ni gbɔmɔ ehiŋ mli dɔŋŋ lɛ?’ ” Kɛkɛ ni maŋbii lɛ fɛɛ kpe wo Yeremia he yɛ Yehowa Sɔlemɔ we lɛ.

¹⁰ Be ni Yuda lumɛi lɛ nu wiemɔi ni eje Yeremia naa lɛ, amɛjɛ maŋtsɛ we lɛ kɛba Yehowa Sɔlemɔ we lɛ, ni amɛbatara shi yɛ Yehowa Sɔlemɔ we lɛ agbo ni gbɛi ji Agbo Hee lɛ naa.

¹¹ Kɛkɛ ni osɔfoi lɛ kɛ gbalɔi lɛ kɛɛ maŋ lumɛi lɛ akɛ, “Nuu nɛɛ sa gbele, ejaakɛ egba yɛ nyɛ fɛɛ nyɛtoiŋ eshi maŋ nɛɛ.”

¹² Kɛkɛ ni Yeremia kɛɛ lumɛi lɛ fɛɛ kɛ maŋbii lɛ fɛɛ akɛ, “Yehowa ji mɔ ni kɛ wiemɔi ni nyɛnu lɛ fɛɛ tsu mi koni mibagba mashi Sɔlemɔ we nɛɛ kɛ maŋ nɛɛ.

¹³ No hewɔ lɛ, agbɛnɛ, nyɛtsakea nyɛjeŋba kɛ nyɛnifeemɔnii; asaŋ nyɛboa Yehowa, nyɛNyɔŋmɔ lɛ, toi, ni lɛ hu ebaatsake ejwɛŋmɔ yɛ efɔŋ ni eto eyiŋ akɛ ebaafee nyɛ lɛ hewɔ.

¹⁴ Shi mi lɛ, naa miyɛ nyɛdɛŋ. Nyɛfea mi nɔ ni hi, kɛ nɔ ni ja yɛ nyɛhiɛ;

¹⁵ shi moŋ nyɛnaa nyɛlea krɛdɛɛ akɛ kɛji nyɛgbe mi lɛ, no lɛ mɔ ko ni efeko nɔ fɔŋ ko lá yi sɔ̃ nyɛbaaloo nyɛbua nyɛ kɛ maŋ nɛɛ kɛ emli bii bluublu ayiteŋ, ejaakɛ anɔkwale mli lɛ, Yehowa ji mɔ ni tsu mi nyɛŋɔɔ akɛ mibawie nɛkɛ wiemɔi nɛɛ fɛɛ yɛ nyɛtoiaŋ lɛ.”

¹⁶ Kɛkɛ ni lumɛi lɛ kɛ maŋbii lɛ fɛɛ kɛɛ osɔfoi lɛ akɛ, “Nuu nɛɛ esaaa gbele, ejaakɛ ekɛ wɔ wie yɛ Yehowa, wɔNyɔŋmɔ lɛ, gbɛi mli.”

¹⁷ Maŋ onukpai lɛ ateŋ mɛi komɛi te shi, ni amɛkɛɛ asafo muu ni ebabɔ gwa lɛ fɛɛ akɛ,

¹⁸ “Be ko lɛ Mika ni jɛ Moreshet lɛ gba yɛ Yuda Maŋtsɛ Hezekia yinɔ, ni ekɛɛ Yudabii fɛɛ akɛ, ‘Nɔ ni Yehowa, Taiatsɛ lɛ, kɛɛ ji,’ ‘Abaahu Zion tamɔ ahuɔ ŋmɔ, Yerusalɛm baatsɔ̃ koikoi, ni Sɔlemɔ we lɛ gɔŋ lɛ baatsɔ̃ koo ni etsa sulaŋŋ.’

¹⁹ Ani gbe Yuda Maŋtsɛ Hezekia kɛ Yuda fɛɛ gbe Mika lo? Ani jeee gbeyei moŋ Hezekia she Yehowa ni efee nɔ ni hã Yehowa na ehe tsui, ni no hewɔ lɛ, Yehowa tsake ejwɛŋmɔ ni efee akɛ ebaakpãtã amɛhiɛ lɛ? Shi wɔ lɛ wɔmiitao wɔloo musu kpele nɛɛ wɔbua wɔyiteŋ.”

²⁰ Nuu kroko hu hi shi, ni egba yɛ Yehowa gbɛi mli. Egbɛi ji Uria, Shemaia ni jɛ Kiriat-Yearim lɛ bi lɛ. Egba eshi Yerusalɛm maŋ nɛɛ kɛ shikpɔŋ nɛɛ fɛɛ tamɔ bɔ pɛ ni Yeremia gba nɛɛ.

²¹ Be ni Maŋtsɛ Yehoiakim kɛ esraafoi lɛ kɛ maŋ lumɛi lɛ nu Uria wiemɔi lɛ maŋtsɛ lɛ tao Uria egbe. Shi be ni Uria nu maŋtsɛ yiŋtoo lɛ he lɛ eshe gbeyei, ni ejo foi etee Ijipt.

²² Shi Maŋtsɛ Yehoiakim tsu hii komɛi ni ji Akbor bi Elnatan kɛ mɛi komɛi ni fata ehe kɛtee Ijipt.

²³ Gbɔmɛi nɛɛ tee ni amɛyamɔ Uria yɛ Ijipt kɛba amɛbahã Maŋtsɛ Yehoiakim, ni maŋtsɛ lɛ hã akɛ klante gbe Uria, ni ashɛ egbonyo lɛ afɔ̃ mɛi foji agbonyobu lɛ mli.

²⁴ Shi akɛni Shafan bi Ahikam fã Yeremia he, ni eyɛ esɛɛ hewɔ lɛ, anaaa aŋmɛɛ Yeremia he ahã maŋbii lɛ koni amɛgbe lɛ.